ദുബായ്: പശ്ചിമേഷ്യയിൽ തുടരുന്ന ഭൗമരാഷ്ട്രീയ സംഘർഷങ്ങളും അതിന്റെ പശ്ചാത്തലത്തിൽ വ്യോമഗതാഗത മേഖലയിലുണ്ടായ തടസ്സങ്ങളും താൽക്കാലികമാണെന്നും എമിറേറ്റ്സ് എയർലൈൻ ശക്തമായും വേഗത്തിലും തിരിച്ചുവരുമെന്നും എമിറേറ്റ്സ് പ്രസിഡൻ്റ് ടിം ക്ലാർക്ക് വ്യക്തമാക്കി. നിലവിലെ സാഹചര്യങ്ങൾ എമിറേറ്റ്സിന്റെ ദീർഘകാല പ്രവർത്തനങ്ങളെ ബാധിക്കില്ലെന്നും സർവീസുകൾ വെട്ടിക്കുറയ്ക്കാനോ പ്രധാന റൂട്ടുകളിൽ നിന്ന് പിന്മാറാനോ കമ്പനിക്ക് യാതൊരു പദ്ധതിയുമില്ലെന്നും അദ്ദേഹം പറഞ്ഞു.
പശ്ചിമേഷ്യയിലെ വിവിധ മേഖലകളിൽ രൂപപ്പെട്ട സുരക്ഷാ വെല്ലുവിളികളും വ്യോമപാതകളിലെ നിയന്ത്രണങ്ങളും കാരണം ചില സർവീസുകൾക്ക് തടസ്സം നേരിട്ടിരുന്നെങ്കിലും, ഈ പ്രതിസന്ധികളെ അതിജീവിക്കാനുള്ള ശേഷി മേഖലയിലെ വിമാനക്കമ്പനികൾക്കുണ്ടെന്ന് ടിം ക്ലാർക്ക് ചൂണ്ടിക്കാട്ടി. നിലവിലെ സാഹചര്യം മുതലെടുത്ത് വിപണി വിഹിതം വർധിപ്പിക്കാൻ ശ്രമിക്കുന്ന യൂറോപ്യൻ വിമാനക്കമ്പനികൾ ജാഗ്രത പാലിക്കണമെന്നും അദ്ദേഹം മുന്നറിയിപ്പ് നൽകി.
മിഡിൽ ഈസ്റ്റിലെ പ്രമുഖ വിമാനക്കമ്പനികൾ നേരിടുന്ന താൽക്കാലിക പ്രതിസന്ധികളെ ദീർഘകാല അവസരമായി കണക്കാക്കുന്നത് തെറ്റായ വിലയിരുത്തലായിരിക്കുമെന്ന് അദ്ദേഹം പറഞ്ഞു. മേഖലയിലെ എയർലൈനുകൾ വേഗത്തിൽ തന്നെ സാധാരണ പ്രവർത്തനത്തിലേക്ക് മടങ്ങിയെത്തുമെന്നും യാത്രക്കാരുടെ വിശ്വാസവും സേവനങ്ങളുടെ ശക്തിയും അവരെ വീണ്ടും മുൻനിരയിലേക്കെത്തിക്കുമെന്നും അദ്ദേഹം കൂട്ടിച്ചേർത്തു.
അതേസമയം, നിലവിലെ സാഹചര്യം മൂലം എമിറേറ്റ്സ് ഉൾപ്പെടെയുള്ള മിഡിൽ ഈസ്റ്റ് വിമാനക്കമ്പനികൾക്ക് നേരിടേണ്ടി വന്ന പ്രവർത്തന തടസ്സങ്ങൾ അധികകാലം നീണ്ടുനിൽക്കില്ലെന്ന് ഇന്റർനാഷണൽ എയർ ട്രാൻസ്പോർട്ട് അസോസിയേഷൻ (IATA) വിലയിരുത്തി. മേഖലയിലെ വിമാനക്കമ്പനികൾ അതിവേഗം പ്രതിസന്ധികളെ മറികടന്ന് ശക്തമായ തിരിച്ചുവരവ് നടത്തുമെന്നും ആഗോള വ്യോമയാന മേഖലയിലെ പ്രവർത്തനങ്ങൾ ഉടൻ തന്നെ സാധാരണ നിലയിലാകുമെന്നും ഐഎടിഎ അഭിപ്രായപ്പെട്ടു.
പശ്ചിമേഷ്യയിലെ വ്യോമഗതാഗത മേഖലയിലെ അനിശ്ചിതത്വങ്ങൾക്കിടയിലും യാത്രക്കാരുടെ ആവശ്യകതയും അന്താരാഷ്ട്ര യാത്രാ വിപണിയിലെ വളർച്ചയും തുടരുമെന്ന പ്രതീക്ഷയാണ് വ്യോമയാന രംഗത്തുള്ളത്. ഇതോടെ മേഖലയിലെ പ്രധാന വിമാനക്കമ്പനികൾ വീണ്ടും ശക്തമായ വളർച്ചാ പാതയിലേക്ക് തിരിച്ചെത്തുമെന്ന വിലയിരുത്തലും ശക്തമാകുകയാണ്.
