ശൈഖ ബോദൂർ അൽ ഖാസിമി സ്ഥാപിച്ച പബ്ലിഷർ കൂട്ടായ്മയുടെ സൗജന്യ ഓൺലൈൻ പരിശീലന പരിപാടിയിലേക്ക് ഓഗസ്റ്റ് 1 വരെ അപേക്ഷിക്കാം.
ഷാർജ, ജൂലൈ 2, 2026 — പുസ്തക പ്രസാധന രംഗത്തെ വനിതാ പങ്കാളിത്തവും നേതൃത്വവും മുൻനിർത്തി പ്രവർത്തിക്കുന്ന ആഗോള കൂട്ടായ്മയായ ‘പബ്ലിഷർ’ (PublisHer), വനിതകൾക്കായി ‘പബ്ലിഷർ സ്റ്റുഡിയോ’ (PublisHer Studio) എന്ന പേരിൽ പുതിയ ഓൺലൈൻ പഠന പ്ലാറ്റ്‌ഫോം ആരംഭിച്ചു. പ്രസാധന രംഗത്തെ നൂതന സാങ്കേതികവിദ്യകൾ, ആർട്ടിഫിഷ്യൽ ഇന്റലിജൻസ് (AI), നേതൃപാടവം എന്നിവയിൽ വനിതകളെ പ്രാപ്തരാക്കുകയാണ് ഈ പദ്ധതിയുടെ ലക്ഷ്യം. ആദ്യ ബാച്ചിലേക്കുള്ള അപേക്ഷകൾ ജൂലൈ 1 മുതൽ സ്വീകരിച്ചു തുടങ്ങി. ഓഗസ്റ്റ് 1 ആണ് അപേക്ഷിക്കാനുള്ള അവസാന തീയതി.
ആർട്ടിഫിഷ്യൽ ഇന്റലിജൻസ്, സാങ്കേതിക മുന്നേറ്റങ്ങൾ, പുതിയ ബിസിനസ് മാതൃകകൾ എന്നിവ കാരണം പ്രസാധന രംഗത്തുണ്ടാകുന്ന ആഗോള മാറ്റങ്ങളെ ഉൾക്കൊള്ളാൻ വനിതകളെ സഹായിക്കുന്ന രീതിയിലാണ് പബ്ലിഷർ സ്റ്റുഡിയോയുടെ പാഠ്യപദ്ധതി തയ്യാറാക്കിയിരിക്കുന്നത്. ഒക്ടോബർ 5-ന് ആരംഭിക്കുന്ന എട്ട് ആഴ്ചത്തെ ഈ ഓൺലൈൻ കോഴ്സിലേക്ക് ലോകമെമ്പാടുമുള്ള 20 വനിതകളെയാണ് തിരഞ്ഞെടുക്കുക. പൂർണ്ണമായും സൗജന്യമായാണ് ഈ പരിശീലനം നൽകുന്നത്. അന്താരാഷ്ട്ര തലത്തിലെ പ്രമുഖ പ്രസാധകരും വിദഗ്ധരുമാണ് ക്ലാസുകൾക്ക് നേതൃത്വം നൽകുന്നത്.
പബ്ലിഷർ കൂട്ടായ്മ കഴിഞ്ഞ ഏഴ് വർഷമായി നടത്തിയ ഗവേഷണങ്ങളുടെയും ആഗോള ചർച്ചകളുടെയും ഫലമായാണ് ഈ പ്ലാറ്റ്‌ഫോം രൂപീകരിച്ചിരിക്കുന്നത്. വ്യവസായ സംബന്ധമായ അറിവുകൾക്ക് പുറമെ, നേതൃപാടവം, കമ്മ്യൂണിക്കേഷൻ സ്കിൽസ്, മാനസികാരോഗ്യം എന്നിവയ്ക്കും കോഴ്സിൽ പ്രാധാന്യം നൽകുന്നുണ്ട്.
പദ്ധതിയെക്കുറിച്ച് പബ്ലിഷർ സ്ഥാപക ശൈഖ ബോദൂർ അൽ ഖാസിമി പറഞ്ഞത് ഇങ്ങനെ: “കഴിഞ്ഞ ഏഴ് വർഷമായി ആഗോള പ്രസാധന രംഗത്തെ വനിതകളുടെ ആവശ്യങ്ങൾ പബ്ലിഷർ സൂക്ഷ്മമായി നിരീക്ഷിക്കുന്നുണ്ട്. തൊഴിലവസരങ്ങൾക്കപ്പുറം, നേതൃനിരയിലേക്ക് വരാൻ ആവശ്യമായ അറിവും ആത്മവിശ്വാസവും മികച്ച ശൃംഖലയും കെട്ടിപ്പടുക്കാൻ സ്ത്രീകൾ ആഗ്രഹിക്കുന്നു. ഇതിനുള്ള മറുപടിയാണ് പബ്ലിഷർ സ്റ്റുഡിയോ. സ്ത്രീകൾ നേതൃത്വത്തിലേക്ക് വരുമ്പോൾ പ്രസാധന രംഗം കൂടുതൽ ശക്തവും നൂതനവുമായി മാറും.”
വിജയകരമായി കോഴ്സ് പൂർത്തിയാക്കുന്നവർക്ക് സർട്ടിഫിക്കറ്റും, അതോടൊപ്പം പബ്ലിഷർ പ്രീമിയത്തിൽ ഒരു വർഷത്തെ സൗജന്യ അംഗത്വവും ലഭിക്കും. പുസ്തക പ്രസാധന രംഗത്ത് പ്രവർത്തിക്കുന്ന, ഇംഗ്ലീഷ് ഭാഷ കൈകാര്യം ചെയ്യാൻ അറിയാവുന്ന 18 വയസിന് മുകളിൽ പ്രായമുള്ള സ്ത്രീകൾക്ക് അപേക്ഷിക്കാം. ചെറുകിട-സ്വതന്ത്ര പ്രസാധന സ്ഥാപനങ്ങളിൽ ജോലി ചെയ്യുന്നവർക്കും, കരിയറിന്റെ പ്രാരംഭ-മധ്യ ഘട്ടങ്ങളിലുള്ളവർക്കും മുൻഗണന ഉണ്ടായിരിക്കും. ഡിസംബറിൽ വിർച്വൽ ബിരുദദാന ചടങ്ങോടെ ആദ്യ ബാച്ചിന്റെ കോഴ്സ് അവസാനിക്കും. താല്പര്യമുള്ളവർക്ക് womeninpublishing.org എന്ന വെബ്സൈറ്റ് വഴി അപേക്ഷിക്കാവുന്നതാണ്.
