വായനക്കാരല്ലാത്തവരെയും ആകർഷിക്കാൻ ചെലവുകുറഞ്ഞ പ്രായോഗിക തന്ത്രങ്ങൾ അനിവാര്യമെന്ന് എക്സ്പോ സെന്ററിലെ വിദഗ്ധ ചർച്ച
ഷാർജ, യു.എ.ഇ —വൻ സാമ്പത്തികച്ചെലവുകൾ വരുത്തിവെക്കുന്ന വിപുലീകരണങ്ങൾക്ക് പകരം, നിലവിലുള്ള ഇടങ്ങൾ കാര്യക്ഷമമായി ഉപയോഗിച്ചും പുതിയ വായനാസംസ്കാരം വളർത്തിയെടുത്തും പുസ്തകശാലകൾക്ക് കൂടുതൽ ലാഭകരമായി പ്രവർത്തിക്കാനാകുമെന്ന് അന്താരാഷ്ട്ര വിദഗ്ധർ. ഷാർജ ബുക്ക് അതോറിറ്റി (എസ്.ബി.എ) സംഘടിപ്പിച്ച അഞ്ചാമത് ഷാർജ ബുക്ക് സെല്ലേഴ്സ് കോൺഫറൻസിലെ വട്ടമേശ ചർച്ചകളിലാണ് രാജ്യാന്തര പുസ്തകവിപണിയിലെ പ്രമുഖർ ഈ നിർദേശങ്ങൾ മുന്നോട്ടുവെച്ചത്.
ഷാർജ എക്സ്പോ സെന്ററിൽ രണ്ടുദിവസങ്ങളിലായി നടന്ന കോൺഫറൻസിൽ, പരമ്പരാഗത വായനക്കാർക്ക് പുറത്തുള്ള വലിയൊരു ജനവിഭാഗത്തെ പുസ്തകശാലകളിലേക്ക് എങ്ങനെ എത്തിക്കാമെന്ന വിഷയത്തിന് വലിയ പ്രാധാന്യമാണ് ലഭിച്ചത്. ഡിജിറ്റൽ യുഗത്തിൽ സ്വതന്ത്ര പുസ്തകശാലകൾ നേരിടുന്ന വെല്ലുവിളികൾക്ക് ചെലവുകുറഞ്ഞ പ്രായോഗിക പരിഹാരങ്ങൾ ചർച്ചകൾ മുന്നോട്ടുവെച്ചു.
പുസ്തകശാലകളുടെ വിജയം അവയുടെ വിസ്തീർണം കൂട്ടുന്നതിലല്ലെന്ന് മലേഷ്യൻ റീട്ടെയിൽ ശൃംഖലയായ ‘ബുക്ക് എക്സസ്’ സി.ഇ.ഒയും ‘ബിഗ് ബാഡ് വുൾഫ് ബുക്സ്’ സഹസ്ഥാപകനുമായ ആൻഡ്രൂ യാപ് ചൂണ്ടിക്കാട്ടി. പുസ്തകശാലകളുടെ അകത്തളങ്ങൾ രൂപകൽപ്പന ചെയ്യുന്നതിലെ പുതുമകൾക്കും സൗഹൃദാന്തരീക്ഷത്തിനും പുതിയ ഉപഭോക്താക്കളെ സൃഷ്ടിക്കാൻ കഴിയുമെന്ന് അദ്ദേഹം പറഞ്ഞു.
സ്ഥിരം വായനക്കാരെ മാത്രം ലക്ഷ്യമിട്ട് പരസ്പരം മത്സരിക്കുന്നതിന് പകരം, വായനാശീലമില്ലാത്തവരെ ആകർഷിച്ച് വിപണിയുടെ വ്യാപ്തി വർധിപ്പിക്കുകയാണ് വേണ്ടതെന്ന് ആൻഡ്രൂ യാപ് വ്യക്തമാക്കി. ലളിതമായ ഇരിപ്പിടങ്ങൾ ഒരുക്കുന്നതും സൗജന്യമായി ചായയോ കാപ്പിയോ നൽകുന്നതും പോലുള്ള ചെറിയ കാര്യങ്ങൾ പോലും വായനക്കാരല്ലാത്തവരെ കടകളിലേക്ക് ആകർഷിക്കാൻ സഹായിക്കും.
വലിപ്പം കൂട്ടാതെ തന്നെ പുസ്തകശാലകളുടെ സ്വീകാര്യത വർധിപ്പിക്കാമെന്ന് സ്പെയിനിലെ ‘എൽ റെറ്റിറോ ഡി ലാസ് ലെത്രാസ്’ ഉടമ ഇസബെൽ ക്രിസ്റ്റീന ജിറാൾഡോ പറഞ്ഞു. കടയിലുള്ള ചെറിയ ഇടങ്ങൾ ഭംഗിയായി ക്രമീകരിക്കുകയും തദ്ദേശീയ കൂട്ടായ്മകളുമായി സഹകരിച്ച് പ്രവർത്തിക്കുകയും ചെയ്താൽ വിൽപനയിൽ വലിയ മുന്നേറ്റമുണ്ടാക്കാം. ഉപഭോക്താക്കൾക്ക് കൂടുതൽ സൗകര്യപ്രദവും വീണ്ടും വരാൻ പ്രേരിപ്പിക്കുന്നതുമായ അന്തരീക്ഷമാണ് ഓരോ പുസ്തകശാലയും ഒരുക്കേണ്ടതെന്നും അവർ ഓർമ്മിപ്പിച്ചു.
പ്രത്യേക താൽപ്പര്യങ്ങളുള്ള വായനാ സമൂഹങ്ങളെ കേന്ദ്രീകരിച്ച് പ്രവർത്തിക്കുന്ന രീതിയെക്കുറിച്ചും സമ്മേളനം ചർച്ച ചെയ്തു. ദുബായ് മാളിലെ കിനൊകുനിയ സ്റ്റോർ മാനേജർ സ്റ്റീവ് ജോൺസ്, മാംഗാ സ്പോട്ട് ഡയറക്ടർ ജെയിംസ് കില്ലൻ എന്നിവർ കോമിക്സ്, പോപ്പ് കൾച്ചർ പ്രേമികളെ സ്ഥിരം സന്ദർശകരാക്കി മാറ്റുന്നതിനുള്ള വഴികൾ പങ്കുവെച്ചു. കുട്ടികളുടെ സാഹിത്യോത്സവങ്ങൾ പുസ്തകശാലകളിൽ സംഘടിപ്പിച്ച് ഭാവി വായനക്കാരെ എങ്ങനെ വളർത്താമെന്ന് സ്പാനിഷ് പുസ്തകശാലാ ഉടമ എലീന മാർട്ടിനെസും, വായനാ കൂട്ടായ്മകളുടെ പ്രാധാന്യത്തെക്കുറിച്ച് ഇന്ത്യയിലെ കുൻസും ബുക്ക്‌സ്റ്റോർസ് സി.ഇ.ഒ അജയ് ജെയിനും സംസാരിച്ചു.
പുസ്തക വിൽപ്പന രംഗത്തെ ആഗോള പ്രവണതകളും പുതിയ വിപണന സാധ്യതകളും അടിവരയിടുന്നതായിരുന്നു ഷാർജ ബുക്ക് അതോറിറ്റിയുടെ നേതൃത്വത്തിൽ നടന്ന ഈ രാജ്യാന്തര സംഗമം.
