ദുബൈ: യു.എ.ഇയിൽ ഘട്ടംഘട്ടമായി നടപ്പിലാക്കുന്ന ഇ-ഇൻവോയ്സിംഗ് സംവിധാനത്തെക്കുറിച്ച് ബിസിനസ് സമൂഹത്തിന് കൃത്യമായ ധാരണ നൽകുന്നതിനും പുതിയ സംവിധാനത്തിലേക്കുള്ള മാറ്റത്തിന് ആവശ്യമായ മുന്നൊരുക്കങ്ങൾ പരിചയപ്പെടുത്തുന്നതിനുമായി ദുബൈ കെ.എം.സി.സി കാസർഗോഡ് ജില്ലാ കമ്മിറ്റി സൗജന്യ ഇ-ഇൻവോയ്സിംഗ് ശിൽപശാല സംഘടിപ്പിക്കുന്നു. പ്രമുഖ സോഫ്റ്റ്വെയർ സേവനദാതാക്കളായ മാട്രിക്സ് ടെക്നോളജീസും ടാലി സൊല്യൂഷൻസും സഹകരിച്ചാണ് ശിൽപശാല സംഘടിപ്പിക്കുന്നത്.
ഓഗസ്റ്റ് 16 ഞായറാഴ്ച ഉച്ചയ്ക്ക് 1 മണി മുതൽ വൈകിട്ട് 5 മണി വരെ അബുഹൈലിലെ ദുബൈ കെ.എം.സി.സി ഓഡിറ്റോറിയത്തിലാണ് ശിൽപശാല നടക്കുക.
യു.എ.ഇയിലെ പുതിയ ഇ-ഇൻവോയ്സിംഗ് ചട്ടങ്ങളും സ്ഥാപനങ്ങൾ പാലിക്കേണ്ട നടപടിക്രമങ്ങളും സംബന്ധിച്ച് വിദഗ്ധർ വിശദമായ ക്ലാസുകൾ നയിക്കും. ഇ-ഇൻവോയ്സിംഗ് സംവിധാനം എന്താണ്, സ്ഥാപനങ്ങളിൽ ഇത് എങ്ങനെ നടപ്പിലാക്കണം, നിലവിലെ അക്കൗണ്ടിംഗ് സംവിധാനങ്ങളിൽ വരുത്തേണ്ട മാറ്റങ്ങൾ, ആവശ്യമായ സോഫ്റ്റ്വെയർ സജ്ജീകരണങ്ങൾ, ഡിജിറ്റൽ ഇൻവോയ്സുകളുടെ കൈമാറ്റവും സംരക്ഷണവും, സ്ഥാപനങ്ങൾ സ്വീകരിക്കേണ്ട മുന്നൊരുക്കങ്ങൾ തുടങ്ങിയ വിഷയങ്ങൾ ശിൽപശാലയിൽ വിശദീകരിക്കും.
ഇ-ഇൻവോയ്സിംഗിലേക്ക് മാറുന്നതിന് മുമ്പ് സ്ഥാപനങ്ങൾ തയ്യാറാകേണ്ടതെങ്ങനെ എന്നതിനെക്കുറിച്ചും നിലവിലുള്ള അക്കൗണ്ടിംഗ് സംവിധാനങ്ങളെ പുതിയ രീതിയുമായി എങ്ങനെ ഏകോപിപ്പിക്കാമെന്നതിനെക്കുറിച്ചും പങ്കെടുക്കുന്നവർക്ക് വിദഗ്ധരിൽ നിന്ന് നേരിട്ട് മനസ്സിലാക്കാനുള്ള അവസരവും ഉണ്ടായിരിക്കും.
യു.എ.ഇയിലെ പുതിയ സാമ്പത്തിക-സാങ്കേതിക മാറ്റങ്ങളെക്കുറിച്ച് കൃത്യമായ അറിവ് നേടുന്നതിനും ഭാവിയിൽ ഉണ്ടാകാവുന്ന പ്രായോഗിക ബുദ്ധിമുട്ടുകൾ ഒഴിവാക്കുന്നതിനും ശിൽപശാല സഹായകരമാകുമെന്ന് സംഘാടകർ അറിയിച്ചു.
സംരംഭകർ, ബിസിനസ് ഉടമകൾ, അക്കൗണ്ടന്റുമാർ, ഫിനാൻസ് പ്രൊഫഷണലുകൾ, സ്ഥാപനങ്ങളുടെ മാനേജർമാർ, ഇ-ഇൻവോയ്സിംഗ് സംവിധാനത്തെക്കുറിച്ച് കൂടുതൽ അറിയാൻ ആഗ്രഹിക്കുന്നവർ എന്നിവർക്ക് ശിൽപശാലയിൽ പങ്കെടുക്കാം.
പരിപാടിയിൽ പങ്കെടുക്കുന്നതിന് മുൻകൂട്ടി രജിസ്റ്റർ ചെയ്യണം. ആദ്യം രജിസ്റ്റർ ചെയ്യുന്ന 150 പേർക്ക് മാത്രമായിരിക്കും പ്രവേശനം. സൗജന്യമായാണ് ശിൽപശാല സംഘടിപ്പിക്കുന്നത്.
കൂടുതൽ വിവരങ്ങൾക്കും രജിസ്ട്രേഷനുമായി സലാം തട്ടാഞ്ചേരി: 055 119 8155 എന്ന നമ്പറിൽ ബന്ധപ്പെടണം. എന്ന്
ദുബൈ കെ.എം.സി.സി കാസർഗോഡ് ജില്ലാ പ്രസിഡന്റ് സലാം കന്യപ്പാടി, ആക്ടിംഗ് ജനറൽ സെക്രട്ടറി അഷ്റഫ് ബായാർ, ട്രഷറർ ഡോ. ഇസ്മായിൽ മൊഗ്രാൽ എന്നിവർ അറിയിച്ചു
