ഷീഖ ബുദൂർ ബിന്ത് സുൽത്താൻ അൽ ഖാസിമിയുടെ നിർദേശപ്രകാരം ഷെറാ സംഘടിപ്പിക്കുന്ന ആറുമാസത്തെ ഫെലോഷിപ്പിലേക്ക് സെപ്റ്റംബർ 13 വരെ അപേക്ഷിക്കാം
ഷാർജ, യു.എ.ഇ:വനിതാ സംരംഭകരെ പിന്തുണയ്ക്കുന്നതിനും വ്യവസായ സംരംഭങ്ങളുടെ വളർച്ച ത്വരിതപ്പെടുത്തുന്നതിനുമായി സംഘടിപ്പിക്കുന്ന ‘ഷാർജ വുമൺ ഇംപാക്ട് ഫെലോഷിപ്പിന്റെ’ (SWIF) രണ്ടാം പതിപ്പിലേക്ക് ഷാർജ എന്റെർപ്രണർഷിപ്പ് സെന്റർ (Sheraa) അപേക്ഷ ക്ഷണിച്ചു. ഷെറാ അധ്യക്ഷ ഷീഖ ബുദൂർ ബിന്ത് സുൽത്താൻ അൽ ഖാസിമിയുടെ നിർദേശപ്രകാരമാണ് പദ്ധതി നടപ്പിലാക്കുന്നത്.
സെപ്റ്റംബർ 13 വരെ ഔദ്യോഗിക പോർട്ടൽ വഴി അപേക്ഷ സമർപ്പിക്കാം. യു.എ.ഇയിലും ഷാർജയിലും ബിസിനസ് വിപുലീകരിക്കാൻ ലക്ഷ്യമിടുന്ന, കഴിവ് തെളിയിച്ച വനിതാ സ്റ്റാർട്ടപ്പ് സ്ഥാപകർക്കും സംരംഭകർക്കുമാണ് അവസരം. ആറുമാസം നീണ്ടുനിൽക്കുന്ന പരിശീലന പരിപാടിയിലൂടെ നേതൃത്വ പാഠങ്ങൾ, വ്യവസായ രംഗത്തെ പ്രമുഖരിൽ നിന്നുള്ള മാർഗ്ഗനിർദ്ദേശം, നിക്ഷേപകരുമായുള്ള സമ്പർക്കം എന്നിവ പങ്കാളികൾക്ക് ലഭിക്കും.
ഷെറായുടെ പിന്തുണയോടെ പ്രവർത്തിക്കുന്ന സ്ഥാപനങ്ങളിൽ 49 ശതമാനവും നയിക്കുന്നത് വനിതകളാണ്. ആഗോള ശരാശരിയേക്കാൾ വളരെ ഉയർന്ന നിരക്കാണിത്.
“വ്യവസായ സംരംഭങ്ങൾ വളരുമ്പോൾ കൂടുതൽ സങ്കീർണ്ണമായ വെല്ലുവിളികളാണ് സ്ഥാപകർ നേരിടുന്നത്. വലുതാകുന്ന ടീമുകളെ മികച്ച വ്യക്തതയോടെയും ആത്മവിശ്വാസത്തോടെയും നയിക്കാൻ അവരെ പ്രാപ്തരാക്കുകയാണ് സ്വിഫ് ഫെലോഷിപ്പിലൂടെ ലക്ഷ്യമിടുന്നത്,” ഷെറാ സി.ഇ.ഒ സാറ അബ്ദുൽ അസീസ് അൽ നുഐമി പറഞ്ഞു.
സ്ഥാപകരുടെ വ്യക്തിഗത-വാണിജ്യ ശേഷികൾ വർദ്ധിപ്പിക്കുന്നതിനായി ‘ലിഡ്’ (LEAD) എന്ന പ്രത്യേക പരിശീലന രീതിയും ഈ പതിപ്പിൽ അവതരിപ്പിച്ചിട്ടുണ്ട്. ലീഡ് സെൽഫ്, ഇക്വിപ്പ് ദി വെഞ്ചർ, ആംപ്ലിഫൈ പ്രസൻസ്, ഡ്രൈവ് ഇംപാക്ട് എന്നിങ്ങനെ നാല് ഘടകങ്ങളിലൂന്നിയാണ് പരിശീലനം നൽകുന്നത്.
ഷാർജ സംരംഭകത്വ മേള ഉൾപ്പെടെയുള്ള പ്രമുഖ വേദികളിൽ തങ്ങളുടെ പദ്ധതികൾ അവതരിപ്പിക്കാനും ആഗോള നിക്ഷേപകരുമായി ബന്ധം സ്ഥാപിക്കാനും ഫെലോഷിപ്പിലൂടെ അവസരം ലഭിക്കും. മുൻ പതിപ്പിൽ പങ്കെടുത്ത ഭൂരിഭാഗം സംരംഭങ്ങളും തങ്ങളുടെ ബിസിനസ് വിപുലീകരിക്കുകയും പുതിയ നിക്ഷേപങ്ങൾ ആകർഷിക്കുകയും ചെയ്തിരുന്നു.
