യുഎഇയിൽ നിന്ന് ഇന്ത്യയിലേക്കുള്ള നിക്ഷേപവാതിൽ തുറന്ന് ബർജീൽ ജിയോജിത്; ‘ഇന്ത്യ ഓപ്പർച്യൂണിറ്റീസ് ഫണ്ട്’ വിപണിയിൽ

യുഎഇയെ ആഗോള ഫണ്ട് മാനേജ്മെന്റ് കേന്ദ്രമാക്കാനുള്ള ദീർഘകാല ദർശനത്തോടൊപ്പം ചുവടുചേർത്ത് ബർജീൽ ജിയോജിത് ഫിനാൻഷ്യൽ സർവീസസ് നിക്ഷേപ മാനേജ്മെന്റ് മേഖലയിലേക്ക് ഔപചാരികമായി കടക്കുന്നു. ഇതിന്റെ ഭാഗമായി ‘ബർജീൽ ജിയോജിത് ഇന്ത്യ ഓപ്പർച്യൂണിറ്റീസ് ഫണ്ട്’ (BGIOF) എന്ന പുതിയ ഫണ്ട് കമ്പനി പുറത്തിറക്കി. ഇന്ത്യയുടെ ദീർഘകാല സാമ്പത്തിക വളർച്ചയിൽ പങ്കുചേരാൻ ആഗ്രഹിക്കുന്ന നിക്ഷേപകർക്ക് സുരക്ഷിതവും നിയന്ത്രിതവുമായ ഒരു വഴിയാണ് ഈ ഫണ്ട് തുറക്കുന്നത്. യുഎഇയിൽ നിന്ന് ഇന്ത്യയിലേക്കുള്ള നിക്ഷേപ പ്രവാഹത്തിന് ഇത് ഒരു പുതിയ അധ്യായമാകുമെന്ന് വിലയിരുത്തപ്പെടുന്നു.

യുഎഇ സെക്യൂരിറ്റീസ് ആൻഡ് കൊമോഡിറ്റീസ് അതോറിറ്റിയിൽ നിന്ന് (SCA) മെയിൻലാൻഡ് ഇൻവെസ്റ്റ്മെന്റ് ഫണ്ട് മാനേജ്മെന്റ് ലൈസൻസ് ലഭിച്ചതോടെയാണ് ബർജീൽ ജിയോജിത്തിന്റെ ഈ നിർണായക മുന്നേറ്റം. 25 വർഷത്തിലേറെയായുള്ള യുഎഇയിലെ പ്രവർത്തന പാരമ്പര്യത്തിന് മേൽപടിയായാണ് ഈ വികസനം. രാജ്യത്തിന്റെ ധനകാര്യ പരിസ്ഥിതി ശക്തിപ്പെടുത്താനും നിക്ഷേപ ഉൽപ്പന്നങ്ങളുടെ വൈവിധ്യം വർധിപ്പിക്കാനും ലക്ഷ്യമിട്ടുള്ള യുഎഇയുടെ നയങ്ങളോടുള്ള പ്രതിബദ്ധതയാണ് ഈ അനുമതിയിലൂടെ കമ്പനി വീണ്ടും ഉറപ്പിക്കുന്നത്.

ബർജീൽ ജിയോജിത് ഇന്ത്യ ഓപ്പർച്യൂണിറ്റീസ് ഫണ്ട് ഒരു യുഎഇ നിയന്ത്രിത മെയിൻലാൻഡ് അംബ്രെല്ല ഫണ്ടാണ്. ഓരോ സബ്-ഫണ്ടിനും വേറിട്ട നിയമപരമായ വ്യക്തിത്വവും സാമ്പത്തിക ശേഷിയുമുള്ള ‘സെഗ്രിഗേറ്റഡ് ലൈബിലിറ്റി’ ഘടനയിലാണ് ഇത് രൂപകൽപ്പന ചെയ്തിരിക്കുന്നത്. ഇന്ത്യയിൽ നിക്ഷേപിക്കുന്ന UCITS നിയന്ത്രിത ഫണ്ടുകളിലേക്കാണ് ഓരോ സബ്-ഫണ്ടും നിക്ഷേപം നടത്തുന്നത്. വിവിധ മേഖലകളിലെയും മാർക്കറ്റ് സെഗ്മെന്റുകളിലെയും നിക്ഷേപ സാധ്യതകൾ ഒരൊറ്റ ഘടനയിൽ ലഭ്യമാക്കുന്നതാണ് BGIOF-ന്റെ പ്രത്യേകത.

ഈ ഫണ്ടിന്റെ ന്യൂ ഫണ്ട് ഓഫർ (NFO) 2026 ജനുവരി 14 മുതൽ ഫെബ്രുവരി 13 വരെയാണ് തുറന്നിരിക്കുന്നത്. യുഎസ് ഡോളർ അടിസ്ഥാനത്തിലുള്ള ഫണ്ടായ ഇതിൽ കുറഞ്ഞത് 5,000 ഡോളറാണ് നിക്ഷേപ പരിധി. ഇന്ത്യയുടെ ഘടനാപരമായ വളർച്ചാ കഥയിൽ പങ്കാളികളാകാൻ താൽപര്യമുള്ള ആഗോള നിക്ഷേപകർക്ക് അനുയോജ്യമായ രീതിയിലാണ് ഫണ്ട് രൂപകൽപ്പന ചെയ്തിരിക്കുന്നത്.

ആഗോള മാനദണ്ഡങ്ങളുടെ അടിസ്ഥാനത്തിൽ ഉത്തരവാദിത്തത്തോടെ നിക്ഷേപങ്ങൾ നിയന്ത്രിക്കുകയും കൂടുതൽ അവസരങ്ങൾ ഒരുക്കുകയും ചെയ്യുകയാണ് കമ്പനിയുടെ ലക്ഷ്യമെന്ന്
ബർജീൽ ജിയോജിത് ചെയർമാൻ ഷെയ്ഖ് സുൽത്താൻ ബിൻ സഊദ് അൽ ഖാസിമി, പറഞ്ഞു. “വിശ്വാസ്യതയും സുതാര്യതയും മുൻനിർത്തി ഉത്തരവാദിത്വത്തോടെ നിക്ഷേപങ്ങൾ കൈകാര്യം ചെയ്യുക ,മാറിക്കൊണ്ടിരിക്കുന്ന ആവിശ്യങ്ങൾ നിറവേറ്റുന്നതിനായി രൂപകൽപ്പന ചെയ്തിട്ടുള്ളതാണ് ബർജീൽ ജിയോജിത് ഇന്ത്യ ഓപ്പർച്യൂണിറ്റിസ്‌ ഫണ്ട് എന്ന് ചീഫ് എക്സിക്യൂട്ടീവ് ഓഫീസർ. സുരേന്ദ്ര ദ്വിവേദി,വ്യക്തമാക്കി. ഇന്ത്യയിലെ വിവിധ നിക്ഷേപ തന്ത്രങ്ങൾ ഒരൊറ്റ, നന്നായി നിയന്ത്രിത ഘടനയിൽ ഉൾപ്പെടുത്തി നിക്ഷേപകരുടെ മാറുന്ന ആവശ്യങ്ങൾ നിറവേറ്റുന്നതാണ് ഈ ഫണ്ടിന്റെ ശക്തിയെന്ന് വ്യക്തമാക്കി.

ആശോക വൈറ്റ്‌ഓക്ക്, എ.എസ്.കെ, ആര്യഭട്ട, ഡി.എസ്.പി, ഫ്രാങ്ക്ലിൻ, കൊടക് ഇ.എസ്.ജി, മിറായ് ആസറ്റ്, ടാറ്റ, നിപ്പോൺ, എ.ബി.എസ്.എൽ എന്നിവയുൾപ്പെടെയുള്ള പ്രമുഖ ഇന്ത്യ കേന്ദ്രീകൃത ഫണ്ടുകളാണ് BGIOF അംബ്രെല്ല ഫണ്ടിന് കീഴിൽ ഉൾപ്പെടുത്തിയിരിക്കുന്നത്. ഇത് ബർജീൽ ജിയോജിത്ത് അവതരിപ്പിക്കുന്ന ഫണ്ടുകളുടെ ആദ്യഘട്ടം മാത്രമാണെന്നും, പ്രാദേശികവും ആഗോളവുമായ വിപണികളെ ഉൾക്കൊള്ളുന്ന കൂടുതൽ ഉൽപ്പന്നങ്ങൾ വരാനിരിക്കുന്നതാണെന്നും കമ്പനി അറിയിച്ചു.

ഷെയ്ഖ് സുൽത്താൻ ബിൻ സഊദ് അൽ ഖാസിമിയും ജിയോജിത് ഫിനാൻഷ്യൽ സർവീസസ് ലിമിറ്റഡും തമ്മിലുള്ള സംയുക്ത സംരഭമാണ് ബർജീൽ ജിയോജിത് ഫിനാൻഷ്യൽ സർവീസസ്. യുഎഇ യിലെ കമ്പനിയുടെ ഫൗണ്ടർ ആൻഡ് ഡയറക്ടർ കെ.വി.ശംസുദ്ധീൻ ആണ്. 50,000 ത്തിലേറെ എൻ.ആർ. ഐ ഉപഭോക്താക്കളുള്ള കമ്പനിക്ക് യുഎഇ യിൽ 20 വർഷത്തിലേറെ പൈതൃകമുണ്ട്.

ഇന്ത്യയുടെയും യുഎഇയുടെയും ധനകാര്യ ബന്ധം കൂടുതൽ ആഴപ്പെടുത്തുന്ന ഈ നീക്കം, നിക്ഷേപ ലോകത്ത് പുതിയ ചിന്തകൾക്കും അവസരങ്ങൾക്കും വഴിയൊരുക്കുന്നു. ആഗോള നിക്ഷേപകർ ഇന്ത്യയെ എങ്ങനെ കാണുന്നു എന്നതിലേക്കും യുഎഇയുടെ സാമ്പത്തിക ദർശനത്തിലേക്കും വീണ്ടും ശ്രദ്ധ ക്ഷണിക്കുന്ന ഒരു ഘട്ടമാണിത്. ദീർഘകാല വിശ്വാസത്തോടെയും ഉത്തരവാദിത്വത്തോടെയും നിക്ഷേപം എന്ന ആശയം ശക്തിപ്പെടുത്തുന്ന ഈ തുടക്കം, വായനക്കാരെ ചിന്തിക്കാനും പങ്കുവെക്കാനും പ്രേരിപ്പിക്കുന്നു.