400-ലധികം സ്ഥാപനങ്ങൾക്ക് ക്ഷണം; എട്ട് വിഭാഗങ്ങളിലായി 24 വിജയികളെ തെരഞ്ഞെടുക്കും.
അബുദാബി, ഓഗസ്റ്റ് 18, 2026:അബുദാബിയിലെ വിനോദസഞ്ചാര മേഖലയിലെ സേവന നിലവാരം ഉയർത്തുന്നതിനും മികച്ച പ്രവർത്തനം കാഴ്ചവെക്കുന്ന സ്ഥാപനങ്ങളെയും ജീവനക്കാരെയും ആദരിക്കുന്നതിനുമായി സാംസ്കാരിക വിനോദസഞ്ചാര വകുപ്പ് (ഡിസിടി അബുദാബി) കന്നി ‘വിസിറ്റർ എക്സ്പീരിയൻസ് അവാർഡുകൾ’ പ്രഖ്യാപിച്ചു.
മേഖലയിലെ നാനൂറിലധികം ടൂറിസം, സാംസ്കാരിക, ആതിഥേയത്വ സ്ഥാപനങ്ങളെ അവാർഡിന്റെ ആദ്യ പതിപ്പിലേക്ക് ക്ഷണിച്ചിട്ടുണ്ട്. അബുദാബി സന്ദർശിക്കുന്നവർക്ക് മികച്ച അനുഭവം ഉറപ്പാക്കുന്നതിനായി പ്രതിവർഷം ഈ പുരസ്കാരം നൽകാനാണ് വകുപ്പിന്റെ തീരുമാനം.
ബിസിനസ് അവാർഡുകൾ, ഫ്രണ്ട്ലൈനർ അവാർഡുകൾ എന്നീ രണ്ട് പ്രധാന വിഭാഗങ്ങളിലായി എട്ട് സബ്കാറ്റഗറികളാണ് ഇതിൽ ഉൾപ്പെടുത്തിയിരിക്കുന്നത്. സന്ദർശകരുമായി നേരിട്ട് ഇടപഴകുകയും മികച്ച സേവനം നൽകുകയും ചെയ്യുന്ന ജീവനക്കാരെ പ്രോത്സാഹിപ്പിക്കുന്നതിനാണ് ഫ്രണ്ട്ലൈനർ അവാർഡുകൾ നൽകുന്നത്.
സന്ദർശകരുടെ അനുഭവങ്ങളാണ് ഒരു രാജ്യത്തെ വിനോദസഞ്ചാര മേഖലയുടെ വിജയത്തെ നിശ്ചയിക്കുന്നതെന്ന് ഡിസിടി അബുദാബി ടൂറിസം ഡയറക്ടർ ജനറൽ സ്വാലിഹ് മുഹമ്മദ് അൽ ജസീരി പറഞ്ഞു. ഈ മേഖലയിലെ മികച്ച മാതൃകകളെ ആദരിക്കുന്നതിലൂടെ സേവന മികവും നൂതനാശയങ്ങളും വർദ്ധിപ്പിക്കാൻ സാധിക്കുമെന്നും അദ്ദേഹം വ്യക്തമാക്കി.
പൊതു-സ്വകാര്യ മേഖലകളിലെ ടൂറിസം, ആതിഥേയത്വം, ഉപഭോക്തൃ സേവനം എന്നീ രംഗങ്ങളിലെ വിദഗ്ധരടങ്ങുന്ന സ്വതന്ത്ര ജൂറിയാണ് അവാർഡ് ജേതാക്കളെ തെരഞ്ഞെടുക്കുക. ഈ വർഷം അവസാനം നടക്കുന്ന ചടങ്ങിൽ എട്ട് വിഭാഗങ്ങളിലായി ആകെ 24 വിജയികൾക്ക് പുരസ്കാരങ്ങൾ സമ്മാനിക്കും.
ഡിസിടി അബുദാബിയുടെ സമഗ്ര വിസിറ്റർ എക്സ്പീരിയൻസ് പദ്ധതിയുടെ ഭാഗമായാണ് ഈ അവാർഡുകൾ സംഘടിപ്പിക്കുന്നത്. മേഖലയിലെ ജീവനക്കാർക്ക് പരിശീലനം നൽകുന്നതിനായി അടുത്തിടെ ആരംഭിച്ച ‘വിഎക്സ് അക്കാദമി’, പുതിയ സേവന മാർഗ്ഗനിർദ്ദേശങ്ങൾ എന്നിവയും ഇതിന്റെ ഭാഗമാണ്.
