ഗൾഫ് വിപണിയിലേക്ക് ഇന്ത്യൻ ഐടി സംരംഭങ്ങൾക്ക് വാതിൽ തുറക്കുന്നതിനൊപ്പം ഷാർജയിലെ സ്റ്റാർട്ടപ്പുകൾക്ക് ആഗോളതലത്തിൽ നിക്ഷേപവും അവസരങ്ങളും ഉറപ്പാക്കും.
ഷാർജ —ഗൾഫ് മേഖലയിലെ സാങ്കേതിക വികസനം, ഗവേഷണം, സംരംഭകത്വം എന്നിവ ശക്തിപ്പെടുത്തുന്നതിനായി ഷാർജ റിസർച്ച്, ടെക്നോളജി ആൻഡ് ഇന്നൊവേഷൻ പാർക്കും (സ്പാർക്ക്) വേൾഡ് തെലുങ്ക് ഇൻഫർമേഷൻ ടെക്നോളജി കൗൺസിലും (ഡബ്ല്യു.ടി.ഐ.ടി.സി) ധാരണാപത്രത്തിൽ ഒപ്പുവെച്ചു.
ഷാർജ ഇന്നൊവേഷൻ പാർക്ക് ആസ്ഥാനത്ത് നടന്ന ചടങ്ങിൽ ചീഫ് സ്ട്രാറ്റജി ഓഫീസർ ഡോ. ഫരീദ് മഹ്മൂദ് അബ്ദല്ല അൽ അമീരിയും കൗൺസിൽ ചെയർമാൻ സുന്ദീപ് കുമാർ മക്തലയുമാണ് കരാർ ഒപ്പിട്ടത്. പുതിയ സഹകരണം വഴി 63 രാജ്യങ്ങളിലായി പടർന്നു കിടക്കുന്ന 2,800-ലധികം ഐടി കമ്പനികൾക്ക് യുഎഇയിലേക്കും മറ്റു ജിസിസി രാജ്യങ്ങളിലേക്കും തങ്ങളുടെ പ്രവർത്തനം വിപുലീകരിക്കാൻ വഴിയൊരുങ്ങും.
പ്രായോഗിക ഗവേഷണം, സാങ്കേതികവിദ്യ കൈമാറ്റം, സംയുക്ത പൈലറ്റ് പ്രോജക്ടുകൾ, പ്രതിഭകളുടെ കൈമാറ്റം, ഉൽപ്പന്ന വാണിജ്യവൽക്കരണം തുടങ്ങിയ മേഖലകളിലാണ് ഇരു സ്ഥാപനങ്ങളും കൈകോർക്കുന്നത്. ഷാർജയിലെ സർവ്വകലാശാലകൾ, ഗവേഷണ കേന്ദ്രങ്ങൾ, സ്റ്റാർട്ടപ്പുകൾ എന്നിവയുമായി ചേർന്ന് പ്രവർത്തിക്കാൻ ഇന്ത്യൻ കമ്പനികൾക്ക് ഇതുവഴി സാധിക്കും. സമാനമായി ഷാർജയിൽ വികസിപ്പിച്ചെടുക്കുന്ന സാങ്കേതിക ഉൽപ്പന്നങ്ങൾക്ക് അന്താരാഷ്ട്ര വിപണിയിലേക്ക് എത്താനുള്ള വേദിയായും കൗൺസിൽ മാറും.
ഷാർജയുടെ സമഗ്ര സാങ്കേതിക പരിസ്ഥിതിയെ ആഗോള തലത്തിലെ അറിവുകളുമായും നിക്ഷേപങ്ങളുമായും ബന്ധിപ്പിക്കാനാണ് ലക്ഷ്യമിടുന്നതെന്ന് ഡോ. ഫരീദ് മഹ്മൂദ് അബ്ദല്ല അൽ അമീരി വ്യക്തമാക്കി. ഗവേഷണ ഫലങ്ങളെ പ്രായോഗിക ബിസിനസ് മോഡലുകളാക്കി മാറ്റാൻ ഈ പങ്കാളിത്തം വഴിയൊരുക്കുമെന്നും അദ്ദേഹം കൂട്ടിച്ചേർത്തു.
ആഗോള തെലുങ്ക് സാങ്കേതിക സമൂഹത്തിന്റെ കരുത്തും ശേഷിയും ഷാർജയുടെ അത്യാധുനിക ഇന്നൊവേഷൻ സംവിധാനങ്ങളുമായി ബന്ധിപ്പിക്കുന്നതിൽ ഈ കരാർ നിർണായകമാണെന്ന് സുന്ദീപ് കുമാർ മക്തല പറഞ്ഞു. യുഎഇയിലെ സർക്കാർ, അക്കാദമിക് പ്രതിനിധികളുമായി നടത്തിയ ചർച്ചകൾക്ക് ശേഷമാണ് കരാർ യാഥാർത്ഥ്യമായത്.
ഗവേഷണം, വ്യവസായം, അക്കാദമിക് രംഗം എന്നിവയെ ഒരു കുടക്കീഴിൽ അണിനിരത്തി പശ്ചിമേഷ്യയിലെ പ്രധാന ടെക്നോളജി ഹബ്ബായി വളരുന്ന ഷാർജയുടെ മുന്നേറ്റത്തിന് ഈ രാജ്യാന്തര സഹകരണം കൂടുതൽ ഊർജ്ജം പകരും. പുതിയ സ്റ്റാർട്ടപ്പുകൾക്ക് നിക്ഷേപ സൗകര്യങ്ങൾ ഒരുക്കുന്നതിനും വിപണി കണ്ടെത്തുന്നതിനുമായി പ്രത്യേക ബിസിനസ് മീറ്റുകളും ഉടൻ സംഘടിപ്പിക്കും.
