ദുബൈ : ലോകത്തുള്ള മുഴുവന് മനുഷ്യര്ക്കും മാതൃകായാക്കാന് കഴിയുന്ന പരിശുദ്ധമായ കുടുംബ ജീവിതമാണ് തിരുനബിയുടേതെന്ന് ഇന്ത്യന് ഗ്രാന്ഡ് മുഫ്തി കാന്തപുരം എപി അബൂബക്കര് മുസ്ലിയാര് പ്രസ്താവിച്ചു. ജീവിതത്തിന്റെ എല്ലാ തലങ്ങളിലും അവിടുത്തെ ജീവിതം എക്കാലത്തും പകര്ത്താനാകുന്ന വിധം ധാര്മ്മിക മൂല്യങ്ങള് ഉയര്ത്തിപ്പിടിച്ച് കൊണ്ടുള്ളതായിരുന്നു. യു എ ഇ ആചരിക്കുന്ന കുടുംബ വര്ഷം കുടുംബ ജീവിതത്തിന്റെ മഹിതമായ സന്ദേശമാണ് ലോകത്തിന് നല്കുന്നതെന്നും അദ്ദേഹം കൂട്ടിച്ചേര്ത്തു.
സമൂഹത്തെ നേര്വഴിയില് നയിക്കാനുള്ള ഇടപെടലുകള് പണ്ഡിതന്മാര് എപ്പോഴും നടത്താറുണ്ട്, അത് തുടരേണ്ടത് പണഅ്ഡി ബാധ്യതയാണെന്നും തുടര്ന്ന് കൊണ്ടേയിരിക്കുമെന്നും കാന്തപുരം പറഞ്ഞു.
മര്കസ് ഐ സി എഫ് ആഭിമുഖ്യത്തില് ദുബൈ മതകാര്യ വകുപ്പുമായി സഹകരിച്ച് ദുബൈയില് നടത്തിയ അന്താരാഷ്ട്ര ഫാമിലി കോണ്ഫറന്സില് മുഖ്യ പ്രഭാഷണം നടത്തുകയായിരുന്നു അദ്ദേഹം.
ഐ സി എഫ് ഇന്റര് നാഷനല് പ്രസിഡന്റ് അബ്ദുല് അസീസ് സഖാഫി മമ്പാടിന്റെ അധ്യക്ഷതയില് മര്കസ് നോളജ് സിറ്റി ഡയറക്ടര് ഡോ. അബ്ദുല് ഹകീം അസ്ഹരി ഉല്ഘാടനം ചെയ്തു. ബദ്റുസ്സാദാത്ത് സയ്യിദ് ഇബ്രാഹിം ഖലീല് അല് ബുഖാരി, എസ് എസ് എഫ് കേരള സെക്രട്ടറി അനസ് അമാനി പുഷ്പഗിരി മദ്ഹ് റസൂല് പ്രഭാഷണം നടത്തി. ഇസാം സഖർ സുൽത്താൻ അസ്സുവയ്ധി, സയ്യിദ് ത്വാഹാ ബാഫഖി, സയ്യിദ് ഇല്യാസ് അഹ്സനി ജീലാനി, അബൂബക്കര് മുസ്ലിയാര് കട്ടിപ്പാറ, ഫാറൂഖ് വട്ടേക്കാട്, തുടങ്ങിയവര് സംബന്ധിച്ചു.
