ദുബായ് : ലയൺസ് അംഗങ്ങളും കുടുംബാംഗങ്ങളും അതിഥികളും പങ്കെടുത്ത ആഘോഷം ലയൺസ് ഇന്റർനാഷണൽ സോൺ ചെയർപേഴ്സൺ ടി. എൻ. കൃഷ്ണകുമാർ ഉദ്ഘാടനം ചെയ്തു. ക്ലബ് പ്രസിഡന്റ് സിജു ജോസഫ് അധ്യക്ഷത വഹിച്ചു. സെക്രട്ടറി രഞ്ജിത്ത് ശശിധരൻ, ട്രഷറർ ബേബി വർഗീസ് ,പ്രോഗ്രാം കൺവീനർ അനിത സന്തോഷ്, സന്തോഷ് കേട്ടേത്ത്, അജയ് ഗുപ്ത, വിജയ് മാധവൻ, വിനോദ് എസ് നായർ, ഗിരീഷ് വാര്യർ, ഇഗ്നേഷ്യസ് ,ശ്രീനാഥ് കാടഞ്ചേരി,നയന രഞ്ജിത്ത് , എന്നിവർ പ്രസംഗിച്ചു.
2026–27 വർഷത്തിലെ ആദ്യ പ്രധാന സേവന പദ്ധതിയായ Gift of Sight ന്റെ വിശദാംശങ്ങൾ കൺവീനർ വിനോദ് എസ്. നായർ ചടങ്ങിൽ അവതരിപ്പിച്ചു . വിഷൻ ആൻഡ് സ്റ്റൈൽ ഒപ്ടിക്കൽസ് , Abreco Freight LLC എന്നിവരുടെ സഹകരണത്തോടെ ട്രക്ക്
ഡ്രൈവർമാർക്ക് സൗജന്യ നേത്ര പരിശോധന നടത്തുകയും ആവശ്യമായവർക്ക് പ്രിസ്ക്രിപ്ഷൻ കണ്ണടകൾ സൗജന്യമായി നൽകുകയും ചെയ്യുന്നതാണ് പദ്ധതി.
ലയൺസ് അംഗങ്ങളെയും കുടുംബാംഗങ്ങളെയും ആരോഗ്യകരവും സജീവവുമായ ജീവിതശൈലിയിലേക്ക് നയിക്കുന്ന ഫാമിലി ഫിറ്റ്നസ് പദ്ധതിയുടെ വിശദാംശങ്ങൾ പദ്ധതി കൺവീനർ ഗിരീഷ് വാര്യർ അവതരിപ്പിച്ചു. 2027 ജനുവരിയിൽ നടക്കുന്ന ദുബായ് മാരത്തണിൽ പങ്കെടുക്കുവാൻ അംഗങ്ങളെ തയ്യാറാക്കുന്നതിനും ഈ പദ്ധതി ലക്ഷ്യമിടുന്നു.
ക്ലബ് അംഗമായ Dr. ടൈറ്റസ് പീറ്റർ നിർമിച്ച എസെക്കിയേൽ എന്ന ചലച്ചിത്രത്തിന്റെ ട്രയ്ലർ പ്രകാശനവും ചടങ്ങിനോടനുബന്ധിച്ചു നടന്നു.
ലോകമെമ്പാടുമുള്ള ലയൺസ് ക്ലബുകൾ എല്ലാ വർഷവും 11 മുതൽ 13 വയസുവരെ പ്രായമുള്ള സ്കൂൾ വിദ്യാർത്ഥികൾക്കായി സംഘടിപ്പിക്കുന്ന അന്താരാഷ്ട്ര ചിത്രരചനാ മത്സരം UAE യിലെ രണ്ട് വിദ്യാലയങ്ങളിൽ സംഘടിപ്പിക്കുന്നതിന്റെ വിശദാംശങ്ങൾ ചടങ്ങിൽ അവതരിപ്പിച്ചു .വിദ്യാർത്ഥികളിൽ സമാധാനം, സൗഹൃദം, സഹിഷ്ണുത, സഹവർത്തിത്വം എന്നീ ആശയങ്ങൾ വളർത്തുകയും , ലോകസമാധാനത്തെക്കുറിച്ചുള്ള അവരുടെ ചിന്തകളും ,സ്വപ്നങ്ങളും ചിത്രങ്ങളിലൂടെ അവതരിപ്പിക്കുവാൻ കുട്ടികൾക്ക് അവസരം നൽകുകയുമാണ് മത്സരത്തിന്റെ പ്രധാന ലക്ഷ്യം.
തിരുവാതിര അടക്കമുളള നിരവധി പരമ്പരാഗത കലാപരിപാടികളും മാവേലിയുടെ സാന്നിധ്യവും ആഘോഷത്തിന് മാറ്റുകൂട്ടി. തുടർന്ന് നടന്ന ഓണസദ്യയും കുടുംബാംഗങ്ങളുടെ പങ്കാളിത്തവും പരിപാടിയെ കൂടുതൽ ആഘോഷപൂർണമാക്കി.
ഈ വർഷം ക്ലബ്ബ് മുന്നോട്ടുവച്ചിട്ടുള്ള Together We Can എന്ന ആശയത്തെ മുൻനിർത്തി സംസ്കാരം, കുടുംബ സൗഹൃദം, സാമൂഹിക സേവനം, ആരോഗ്യബോധവൽക്കരണം, യുവജന പങ്കാളിത്തം എന്നിവ സമന്വയിപ്പിച്ചുകൊണ്ടുള്ള മനോഹരമായ ആഘോഷമായി ലയണോണം 2026 മാറുകയുണ്ടായി.
