നടപടി വ്യാഴാഴ്ച മുതൽ പ്രാബല്യത്തിൽ; യുഎസ് ഉപരോധ പശ്ചാത്തലത്തിൽ തീരുമാനവുമായി ജനറൽ സിവിൽ ഏവിയേഷൻ അതോറിറ്റി
അബുദാബി: ഇറാനിയൻ വിമാനക്കമ്പനികൾ യുഎഇയിലേക്കും തിരിച്ചും നടത്തുന്ന മുഴുവൻ സർവീസുകളും അനിശ്ചിതകാലത്തേക്ക് നിർത്തിവെച്ചതായി യുഎഇ ജനറൽ സിവിൽ ഏവിയേഷൻ അതോറിറ്റി (ജിസിഎഎ) അറിയിച്ചു.
വ്യാഴാഴ്ച (സെപ്റ്റംബർ 24) മുതൽ ഉത്തരവ് പ്രാബല്യത്തിൽ വന്നതായി സിവിൽ ഏവിയേഷൻ അതോറിറ്റി വ്യക്തമാക്കി. യുഎസ് ഏർപ്പെടുത്തിയ വ്യോമയാന നിയന്ത്രണങ്ങളുടെയും രാജ്യാന്തര വ്യോമഗതാഗത സുരക്ഷാ ചട്ടങ്ങളുടെയും അടിസ്ഥാനത്തിലാണ് യുഎഇ വിമാനത്താവളങ്ങളിൽ ഇറാൻ വിമാനങ്ങൾക്ക് വിലക്കേർപ്പെടുത്തിയത്.
തീരുമാനം പ്രാബല്യത്തിൽ വന്നതോടെ ദുബായ്, അബുദാബി, ഷാർജ തുടങ്ങിയ അന്താരാഷ്ട്ര വിമാനത്താവളങ്ങളിൽ നിന്നുള്ള ഇറാൻ സർവീസുകൾ പൂർണമായും നിലച്ചു. ഇറാൻ എയർ, മഹാൻ എയർ ഉൾപ്പെടെയുള്ള സർവീസുകളെ തീരുമാനം ബാധിക്കും.
ടിക്കറ്റ് എടുത്ത യാത്രക്കാർ വിമാനത്താവളങ്ങളിലേക്ക് പുറപ്പെടുന്നതിന് മുൻപായി ബന്ധപ്പെട്ട വിമാനക്കമ്പനികളുമായോ ട്രാവൽ ഏജൻസികളുമായോ ബന്ധപ്പെട്ട് ടിക്കറ്റ് റദ്ദാക്കൽ, റീഫണ്ട് നടപടികൾ സ്വീകരിക്കണമെന്ന് വിമാനത്താവള അധികൃതർ അറിയിച്ചു.
സാഹചര്യങ്ങൾ നിരന്തരം നിരീക്ഷിച്ചു വരികയാണെന്നും ഇതുമായി ബന്ധപ്പെട്ട പുതിയ വിവരങ്ങൾ ഔദ്യോഗിക ചാനലുകൾ വഴി യഥാസമയം പൊതുജനങ്ങളെ അറിയിക്കുമെന്നും സിവിൽ ഏവിയേഷൻ അതോറിറ്റി കൂട്ടിച്ചേർത്തു. വ്യാജ പ്രചാരണങ്ങളിൽ വിശ്വസിക്കരുതെന്നും അംഗീകൃത സ്രോതസ്സുകളിൽ നിന്നുള്ള വിവരങ്ങൾ മാത്രം ആശ്രയിക്കണമെന്നും ജിസിഎഎ നിർദേശിച്ചു.
