യുഎൻ കുറ്റകൃത്യ പ്രതിരോധ കോൺഗ്രസിൽ ഇന്റർപോൾ, യുഎൻഒഡിസി പങ്കാളിത്തത്തോടെ പുതിയ രാജ്യാന്തര പദ്ധതി; ആമസോൺ മേഖലയിലെ അധോലോക ശൃംഖലകൾ ലക്ഷ്യം.
അബുദാബി — പ്രകൃതിവിഭവങ്ങൾ കൊള്ളയടിക്കുകയും വനനശീകരണത്തിലൂടെ കോടികൾ സമ്പാദിക്കുകയും ചെയ്യുന്ന രാജ്യാന്തര കുറ്റകൃത്യ സംഘങ്ങളെ നേരിടാൻ ‘അബുദാബി കോൾ ടു ആക്ഷൻ’ പ്രഖ്യാപിച്ച് യുണൈറ്റഡ് അറബ് എമിറേറ്റ്സ്. ആഗോളതലത്തിൽ പ്രതിരോധം ശക്തമാക്കാനും നിയമപാലകരുടെ കൂട്ടായ്മ വിപുലീകരിക്കാനും ലക്ഷ്യമിട്ടാണ് ആഭ്യന്തര മന്ത്രാലയം പുതിയ പദ്ധതിക്ക് തുടക്കമിട്ടത്.
അബുദാബിയിൽ നടക്കുന്ന 15-ാമത് യുഎൻ കുറ്റകൃത്യ പ്രതിരോധ-ക്രിമിനൽ നീതിന്യായ കോൺഗ്രസിനോടനുബന്ധിച്ച് സംഘടിപ്പിച്ച ഉന്നതതല യോഗത്തിലാണ് ഈ പ്രഖ്യാപനം. ഐക്യരാഷ്ട്രസഭയുടെ ഡ്രഗ്സ് ആൻഡ് ക്രൈം ഓഫീസ് (യുഎൻഒഡിസി), ഇന്റർപോൾ, ഫ്രാൻസ്, അസർബൈജാൻ എന്നിവയുടെ സഹകരണത്തോടെയായിരുന്നു സമ്മേളനം.
പരിസ്ഥിതി സംരക്ഷണം കേവലം പ്രഖ്യാപനങ്ങളിൽ ഒതുക്കാതെ നേരിട്ടുള്ള നിയമനടപടികളിലേക്ക് മാറണമെന്ന് യുഎഇ ആഭ്യന്തര മന്ത്രാലയത്തിലെ രാജ്യാന്തര കാര്യ വിഭാഗം ഡയറക്ടർ ജനറൽ കേണൽ ദാന അൽ മർസൂഖി വ്യക്തമാക്കി. പ്രകൃതിയെ സംരക്ഷിക്കുക എന്നത് മുൻ ഭരണാധികാരി അന്തരിച്ച ശൈഖ് സായിദ് ബിൻ സുൽത്താൻ അൽ നഹ്യാൻ പകർന്നുനൽകിയ പാരമ്പര്യമാണെന്നും, പരിസ്ഥിതി സുരക്ഷ രാജ്യത്തിന്റെ പരമാധികാരവുമായി ബന്ധപ്പെട്ടിരിക്കുന്നുവെന്നും അവർ ചൂണ്ടിക്കാട്ടി.
ലാറ്റിനമേരിക്കയിലെ ആമസോൺ തടത്തിൽ അനധികൃത ഖനനം, വനംവെളുപ്പിക്കൽ, വന്യജീവി കടത്ത്, ഇന്ധനക്കടത്ത് എന്നിവ നടത്തുന്ന അധോലോക മാഫിയകളെ ലക്ഷ്യമിട്ട് യുഎഇയുടെ പിന്തുണയോടെ നടത്തിയ ‘ഓപ്പറേഷൻ ഗ്രീൻ ഷീൽഡ് 2026’ പരിശോധനയുടെ വിശദാംശങ്ങളും യോഗത്തിൽ വിശദീകരിച്ചു. യുഎഇയും യുഎൻഒഡിസിയും സംയുക്തമായി 2023-ൽ രൂപീകരിച്ച ഇന്റർനാഷണൽ ഇനിഷ്യേറ്റീവ് ഫോർ ലോ എൻഫോഴ്സ്മെന്റ് ഫോർ ക്ലൈമറ്റ് (I2LEC) വഴിയാണ് തെക്കേ അമേരിക്കൻ സേനകൾക്ക് ആവശ്യമായ വിവരശേഖരണവും പരിശീലനവും നൽകിയത്.
പരിസ്ഥിതി ചൂഷണം നടത്തുന്ന സംഘങ്ങൾക്ക് മയക്കുമരുന്ന്, ആയുധക്കടത്ത്, മനുഷ്യക്കടത്ത് മാഫിയകളുമായി അടുത്ത ബന്ധമുണ്ടെന്ന് യുഎൻഒഡിസി എക്സിക്യൂട്ടീവ് ഡയറക്ടർ ഘാദ വാലി ചൂണ്ടിക്കാട്ടി. ഉൽപന്നങ്ങൾ മാറിയാലും ക്രിമിനൽ പ്രവർത്തനങ്ങളുടെ രീതി ഒന്നാണെന്നും, ശക്തമായ നിയമങ്ങളുണ്ടെങ്കിലും അവ നടപ്പാക്കുന്നതിലെ വീഴ്ചകൾ പരിഹരിക്കപ്പെടണമെന്നും അവർ പറഞ്ഞു.
പരിസ്ഥിതി കുറ്റകൃത്യങ്ങളിലൂടെ സമ്പാദിക്കുന്ന കള്ളപ്പണം വെളുപ്പിക്കുന്നത് തടയുകയാണ് മുഖ്യ ലക്ഷ്യമെന്ന് ഫ്രഞ്ച് നീതിന്യായ മന്ത്രി ജെറാൾഡ് ഡാർമനിൻ വ്യക്തമാക്കി. അതിർത്തികൾ കടന്നുള്ള കുറ്റകൃത്യങ്ങൾ തടയാൻ അന്വേഷണ ഏജൻസികൾ തമ്മിലുള്ള വിവരവിനിമയം വേഗത്തിലാക്കണമെന്ന് ഇന്റർപോൾ പ്രതിനിധി ലൂക്കാസ് ഫിലിപ്പും, പ്രോസിക്യൂഷൻ സംവിധാനങ്ങൾ ശക്തമാക്കണമെന്ന് അസർബൈജാൻ പ്രതിനിധി വുഖാർ അലിയേവും ആവശ്യപ്പെട്ടു. ഇന്റർനാഷണൽ യൂണിയൻ ഫോർ കൺസർവേഷൻ ഓഫ് നേച്ചർ (ഐയുസിഎൻ) പ്രസിഡന്റ് റസാൻ ഖലീഫ അൽ മുബാറക് ചർച്ചകൾ നിയന്ത്രിച്ചു.
