അതിരുകളില്ലാത്ത ഡിജിറ്റൽ ഭീഷണികളെ പ്രതിരോധിക്കാൻ രാജ്യാന്തര ഇന്റലിജൻസ് പങ്കിടലും പോസ്റ്റ്-ക്വാണ്ടം സുരക്ഷാ സംവിധാനങ്ങളും അനിവാര്യമെന്ന് യുഎഇ സൈബർ സുരക്ഷാ മേധാവി ഡോ. മുഹമ്മദ് അൽ കുവൈത്തി.
ന്യൂയോർക്ക് —ആർട്ടിഫിഷ്യൽ ഇന്റലിജൻസ് ഭരണത്തിലും സൈബർ പ്രതിരോധത്തിലും വിട്ടുവീഴ്ചയില്ലാത്ത രാജ്യാന്തര സഹകരണം ഉറപ്പാക്കണമെന്ന് ഐക്യരാഷ്ട്രസഭയുടെ പൊതുസഭാ സമ്മേളനത്തിൽ യുണൈറ്റഡ് അറബ് എമിറേറ്റ്സ് വ്യക്തമാക്കി. ഡിജിറ്റൽ സംവിധാനങ്ങൾ പരസ്പരം ബന്ധിപ്പിക്കപ്പെടുന്ന ഇക്കാലത്ത് മുൻകരുതലുകൾ സുരക്ഷാ രൂപകൽപ്പനയിൽ തന്നെ ഉൾപ്പെടുത്തണമെന്ന് യുഎഇ ആവശ്യപ്പെട്ടു.
ന്യൂയോർക്കിൽ നടക്കുന്ന യുഎൻ പൊതുസഭാ ഹൈ-ലെവൽ വീക്കിലെ തന്ത്രപ്രധാന റൗണ്ട് ടേബിൾ ചർച്ചകളിലും ഉഭയകക്ഷി കൂടിക്കാഴ്ചകളിലും യുഎഇയെ പ്രതിനിധീകരിച്ച് സംസാരിക്കുകയായിരുന്നു യുഎഇ ഗവൺമെന്റിന്റെ സൈബർ സുരക്ഷാ കൗൺസിൽ മേധാവി ഡോ. മുഹമ്മദ് അൽ കുവൈത്തി.
സുരക്ഷിതമായ ഡിജിറ്റൽ പരിവർത്തനത്തിനും സാമ്പത്തിക മുന്നേറ്റത്തിനും ശക്തമായ സൈബർ സുരക്ഷ അനിവാര്യമാണെന്ന് അദ്ദേഹം പറഞ്ഞു. സർക്കാരുകളും അടിസ്ഥാന സൗകര്യങ്ങളും സാങ്കേതികവിദ്യയിലേക്ക് പൂർണമായി മാറുമ്പോൾ ഓരോ ഡിജിറ്റൽ സേവനങ്ങളുടെയും രൂപകൽപ്പനയിൽ തന്നെ പരമാവധി സുരക്ഷ ഉറപ്പുവരുത്തണം.
ഡിജിറ്റൽ സുരക്ഷ ഏതെങ്കിലും ഒരു രാജ്യത്തിന്റെ മാത്രം ആഭ്യന്തര വിഷയമല്ലെന്നും രാജ്യാന്തര അതിരുകൾ ഭേദിക്കുന്നതാണെന്നും അദ്ദേഹം ഓർമ്മിപ്പിച്ചു. തത്സമയ സൈബർ വിവരങ്ങൾ കൈമാറുന്നതിലും ഭീഷണികൾ നേരിടുന്നതിലും രാജ്യങ്ങൾക്കിടയിൽ യോജിച്ച പ്രവർത്തനം വേണം. പ്രത്യേകിച്ച് ക്വാണ്ടം കമ്പ്യൂട്ടിങ് ഉയർത്തുന്ന പുതിയ വെല്ലുവിളികളെ പ്രതിരോധിക്കാൻ അന്താരാഷ്ട്ര തലത്തിൽ നയങ്ങളും സാങ്കേതിക മാനദണ്ഡങ്ങളും ഏകോപിപ്പിക്കേണ്ടതുണ്ട്.
സ്വകാര്യ മേഖലയുമായുള്ള പങ്കാളിത്തത്തെക്കുറിച്ചും യുഎഇ പ്രതിനിധിസംഘം കൃത്യമായ നിർദ്ദേശങ്ങൾ മുന്നോട്ടുവെച്ചു. വെറുമൊരു സാങ്കേതികവിദ്യ വാങ്ങുന്നതിനപ്പുറം, സംയുക്ത ഗവേഷണം, പുതിയ ആപ്ലിക്കേഷനുകളുടെ പരീക്ഷണ ശാലകൾ (ടെസ്റ്റിംഗ് സാൻഡ്ബോക്സുകൾ), അക്കാദമിക് സഹകരണം എന്നിവയിലൂടെ ശാശ്വതമായ ദേശീയ ശേഷി വളർത്തിയെടുക്കാൻ സർക്കാരുകൾ ശ്രദ്ധിക്കണം. ഇത് ഓരോ രാജ്യത്തിനും സ്വന്തം സൈബർ സ്വയംഭരണാധികാരം സംരക്ഷിക്കാൻ സഹായകരമാകും.
സ്വന്തം സുരക്ഷാ പ്രവർത്തനങ്ങളിൽ മെഷീൻ ലേണിംഗ്, ഓട്ടോമേഷൻ, ആർട്ടിഫിഷ്യൽ ഇന്റലിജൻസ് എന്നിവ ഇതിനകം യുഎഇ വിജയകരമായി നടപ്പാക്കിയിട്ടുണ്ട്. ഇത്തരം മുൻകരുതലുകൾ പ്രതിസന്ധികൾ മുൻകൂട്ടി തിരിച്ചറിഞ്ഞ് തടയാൻ ഭരണകൂടത്തെ സഹായിക്കുന്നു. അതോടൊപ്പം പ്രാദേശിക സ്റ്റാർട്ടപ്പുകളെയും ഇൻകുബേറ്ററുകളെയും പിന്തുണച്ചുകൊണ്ട് വിപണിയിലേക്ക് നൂതന സൈബർ ഉൽപ്പന്നങ്ങൾ എത്തിക്കുന്ന പ്രവർത്തനരീതിയും രാജ്യം തുടരുകയാണെന്ന് ഡോ. മുഹമ്മദ് അൽ കുവൈത്തി കൂട്ടിച്ചേർത്തു.
