1973-ലെ ഒക്ടോബർ യുദ്ധത്തിന്റെ 53-ാം വാർഷികത്തിൽ നിർണായക നിരീക്ഷണവുമായി യുഎഇ പ്രസിഡന്റിന്റെ നയതന്ത്ര ഉപദേഷ്ടാവ്.
ദുബായ്, ഒക്ടോബർ 6 : യുദ്ധം രാഷ്ട്രീയത്തിന്റെ തുടർച്ചയാണെന്നും സൈനിക കരുത്ത് സമാധാന ചർച്ചകൾക്കുള്ള മാർഗ്ഗമായി മാറണമെന്നും തെളിയിച്ച മുൻ ഈജിപ്ഷ്യൻ പ്രസിഡന്റ് അൻവർ സാദത്തിന്റെ നയതന്ത്ര സമീപനം ഇന്നത്തെ ഭരണാധികാരികൾക്ക് വലിയ പാഠമാണെന്ന് യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് ഡോ. അൻവർ ഗർഗാഷ് വ്യക്തമാക്കി.
1973-ലെ ഒക്ടോബർ യുദ്ധത്തിന്റെ 53-ാം വാർഷിക ദിനത്തിലാണ് ഈജിപ്തിന്റെ ചരിത്രപരമായ നീക്കങ്ങളെയും അന്നത്തെ പ്രസിഡന്റ് അൻവർ സാദത്തിന്റെ ദീർഘവീക്ഷണത്തെയും അനുസ്മരിച്ച് ഡോ. അൻവർ ഗർഗാഷ് രംഗത്തെത്തിയത്. അവകാശങ്ങളും താൽപ്പര്യങ്ങളും സംരക്ഷിക്കുന്ന നീതിപൂർവ്വമായ സമാധാനത്തിലേക്ക് എത്താൻ സൈനിക നടപടികളെ എങ്ങനെ ഫലപ്രദമായി ഉപയോഗിക്കാം എന്ന് സാദത്ത് കാണിച്ചുതന്നതായി അദ്ദേഹം ചൂണ്ടിക്കാട്ടി.
“യുദ്ധം രാഷ്ട്രീയത്തിന്റെ വിപുലീകരണമാണെന്നും, അവകാശങ്ങളും താൽപ്പര്യങ്ങളും സംരക്ഷിക്കുന്ന ശാശ്വത സമാധാനമാണ് ലക്ഷ്യമെങ്കിൽ സൈനിക ശക്തി ചർച്ചകൾക്കുള്ള ഉപകരണമായി മാറുമെന്നും അൻവർ സാദത്ത് തെളിയിച്ചു,” ഡോ. ഗർഗാഷ് സോഷ്യൽ മീഡിയയിൽ കുറിച്ചു. പതിറ്റാണ്ടുകൾക്ക് മുൻപ് സാദത്ത് നടപ്പാക്കിയ ഈ തന്ത്രപരമായ ഉൾക്കാഴ്ച ഇന്നത്തെ പല ലോകനേതാക്കളുടെയും ചിന്തകളിൽ കാണാനില്ലെന്നും അദ്ദേഹം നിരീക്ഷിച്ചു.
ഈജിപ്തിൽ വിപുലമായ പരിപാടികളോടെയാണ് രാജ്യം ഒക്ടോബർ യുദ്ധ വാർഷികം ആചരിച്ചത്. തലസ്ഥാനമായ കെയ്റോയിലെ സായുധസേനാ രക്തസാക്ഷി സ്മാരകത്തിലും മുൻ പ്രസിഡന്റുമാരായ അൻവർ സാദത്ത്, ജമാൽ അബ്ദുൽ നാസർ എന്നിവരുടെ സ്മൃതികൂടീരങ്ങളിലും ഈജിപ്ഷ്യൻ പ്രസിഡന്റ് അബ്ദുൽ ഫത്താഹ് അൽ സിസി പുഷ്പചക്രം അർപ്പിച്ചു. പതിറ്റാണ്ടുകൾ നീണ്ട സംഘർഷങ്ങൾ ഒടുവിൽ നയതന്ത്ര ചർച്ചകളിലേക്കും വെടിനിർത്തലിലേക്കും വഴിമാറേണ്ടതുണ്ടെന്ന് അൽ സിസി തന്റെ വാർഷിക പ്രസംഗത്തിൽ എടുത്തുപറഞ്ഞു.
1973 ഒക്ടോബർ 6-ന് സൂയസ് കനാൽ കടന്ന് ഈജിപ്ത് നടത്തിയ നീക്കം പശ്ചിമേഷ്യൻ രാഷ്ട്രീയ ഭൂപടത്തിൽ വലിയ മാറ്റങ്ങൾക്കാണ് വഴിവെച്ചത്. ഈ സൈനിക മുന്നേറ്റം സൃഷ്ടിച്ച നയതന്ത്ര അന്തരീക്ഷമാണ് പിന്നീട് 1978-ലെ ക്യാമ്പ് ഡേവിഡ് ഉടമ്പടിയിലേക്കും 1979-ലെ ഈജിപ്ത്-ഇസ്രായേൽ സമാധാന കരാറിലേക്കും നയിച്ചത്. ഒരു അറബ് രാജ്യം ഇസ്രായേലുമായി ഒപ്പുവെച്ച ആദ്യ സമാധാന ഉടമ്പടിയായിരുന്നു അത്.
പശ്ചിമേഷ്യയിൽ സംഘർഷങ്ങൾ രൂക്ഷമായി തുടരുന്ന പശ്ചാത്തലത്തിൽ, സൈനിക നടപടികൾ ശാശ്വത പരിഹാരമല്ലെന്നും സമഗ്രമായ രാഷ്ട്രീയ ചർച്ചകളിലൂടെ മാത്രമേ സ്ഥിരത കൈവരിക്കാനാകൂ എന്നുമുള്ള സന്ദേശമാണ് യുഎഇ നയതന്ത്ര ഉപദേഷ്ടാവിന്റെ വാക്കുകൾ അടിവരയിടുന്നത്.
