യു.എ.ഇ ദേശീയ ദിനാഘോഷത്തിന്റെ ഭാഗമായി നാല് എമിറേറ്റുകളിലായി ഇരുപതോളം ക്ലിനിക്കുകളുടെ സഹകരണത്തോടെയാണ് ക്യാമ്പ് സംഘടിപ്പിക്കുന്നത്.
ദുബൈ — യു.എ.ഇ ദേശീയ ദിനാഘോഷത്തോടനുബന്ധിച്ച് ഗാർഹിക തൊഴിലാളികൾക്കായി സൗജന്യ മെഡിക്കൽ ക്യാമ്പ് സംഘടിപ്പിക്കുന്നു. ഓൾ കേരള പ്രവാസി അസോസിയേഷനും ഹോപ്പ് ഓഫ് ലൈഫും സംയുക്തമായാണ് ഡിസംബർ ആറ് ഞായറാഴ്ച ക്യാമ്പ് ഒരുക്കുന്നത്.
ക്യാമ്പിന്റെ ഔദ്യോഗിക ബ്രോഷർ സുപ്രീം കോടതി അഡ്വക്കേറ്റ് ഓൺ റെക്കോർഡും പ്രവാസി ലീഗൽ സെൽ ഗ്ലോബൽ പ്രസിഡന്റുമായ അഡ്വ. ജോസഫ് എബ്രഹാം പ്രകാശനം ചെയ്തു. പ്രവാസി ലീഗൽ സെൽ ദുബൈ പ്രസിഡന്റ് ടി.എൻ. കൃഷ്ണകുമാർ, ഷാർജ പ്രസിഡന്റ് ഹാജിറ ബി. വാലികത്ത്, ജനറൽ സെക്രട്ടറി അൽ നിഷാജ് ഷാഹുൽ, അഡ്വ. ഗിരിജ, അഡ്വ. നജുമുദ്ദീൻ, സാമൂഹിക പ്രവർത്തകൻ ജോൺസൺ എന്നിവർ ചടങ്ങിൽ പങ്കെടുത്തു. ജീവകാരുണ്യ സംരംഭത്തിന് പ്രവാസി ലീഗൽ സെൽ പൂർണ്ണ പിന്തുണ പ്രഖ്യാപിച്ചു.
ദുബൈ, ഷാർജ, അജ്മാൻ, റാസൽഖൈമ എമിറേറ്റുകളിലായി പ്രവർത്തിക്കുന്ന ഇരുപതോളം പ്രമുഖ മെഡിക്കൽ ക്ലിനിക്കുകളുടെ സഹകരണത്തോടെ രാവിലെ 8.30 മുതൽ ഉച്ചയ്ക്ക് 12 വരെയാണ് ക്യാമ്പ് നടക്കുക. യു.എ.ഇയിൽ ജോലി ചെയ്യുന്ന ഗാർഹിക തൊഴിലാളികൾക്ക് മാത്രമായിരിക്കും പ്രവേശനം.
ജനറൽ ഫിസിഷ്യൻ കൺസൾട്ടേഷൻ, ഗൈനക്കോളജിസ്റ്റ് പരിശോധന, ദന്ത പരിശോധന, കൊളസ്ട്രോൾ രക്തപരിശോധന എന്നിവ ക്യാമ്പിൽ സൗജന്യമായി ലഭിക്കും. അർഹരായ പരമാവധി തൊഴിലാളികളിലേക്ക് ഈ സേവനം എത്തിക്കാൻ എല്ലാവരും സഹകരിക്കണമെന്ന് സംഘാടകർ അഭ്യർത്ഥിച്ചു.
കൂടുതൽ വിവരങ്ങൾക്കും രജിസ്ട്രേഷനുമായി 00918593027475 എന്ന വാട്സാപ്പ് നമ്പറിൽ ബന്ധപ്പെടാം.










