വേൾഡ് മലയാളി കൗൺസിൽ ഗ്ലോബൽ ചെയർമാൻ ഐസക് ജോൺ പട്ടാണിപറമ്പിൽ ഉദ്ഘാടനം ചെയ്തു; ഡോ. ഗോപിനാഥ് മുതുകാട് മുഖ്യാതിഥി
ദുബായ് —വേൾഡ് മലയാളി കൗൺസിൽ (ഡബ്ലിയു.എം.സി) ഷാർജ പ്രൊവിൻസിന്റെ ആഭിമുഖ്യത്തിൽ ദുബായ് അസിയാന ഹോട്ടലിൽ വിപുലമായ ഓണാഘോഷം സംഘടിപ്പിച്ചു. യുഎഇയിലെ വിവിധ പ്രൊവിൻസുകളിൽ നിന്നുള്ള പ്രതിനിധികളും പ്രവാസി മലയാളി കുടുംബങ്ങളും ഒത്തുചേർന്ന വേദിയിൽ ഭിന്നശേഷി കുട്ടികളുടെ പുനരധിവാസ പ്രവർത്തനങ്ങൾക്ക് പിന്തുണ പ്രഖ്യാപിച്ചു.
ഡബ്ലിയു.എം.സി ഗ്ലോബൽ ചെയർമാൻ ഐസക് ജോൺ പട്ടാണിപറമ്പിൽ ആഘോഷ പരിപാടികൾ ഉദ്ഘാടനം ചെയ്തു. പ്രവാസ ലോകത്ത് കൂട്ടായ്മകളും പരസ്പര സഹകരണവും നിലനിർത്തുന്നതിൽ ഓണം പോലുള്ള സാംസ്കാരിക ഒത്തുചേരലുകൾ വലിയ പങ്കുവഹിക്കുന്നുണ്ടെന്ന് അദ്ദേഹം ഓർമ്മിപ്പിച്ചു.
പ്രശസ്ത മോട്ടിവേഷണൽ സ്പീക്കറും സാമൂഹിക പ്രവർത്തകനുമായ ഡോ. ഗോപിനാഥ് മുതുകാട് ചടങ്ങിൽ മുഖ്യാതിഥിയായിരുന്നു. മുതുകാടിന്റെ നേതൃത്വത്തിൽ തിരുവനന്തപുരത്ത് പ്രവർത്തിക്കുന്ന ഭിന്നശേഷി കുട്ടികൾക്കായുള്ള കേന്ദ്രത്തിന് ആവശ്യമായ എല്ലാ പിന്തുണയും സഹായങ്ങളും ഷാർജ പ്രൊവിൻസും ചടങ്ങിൽ പങ്കെടുത്ത സദസ്സും ഉറപ്പുനൽകി. മാത്തുകുട്ടി കടോൺ ചടങ്ങിൽ പങ്കെടുത്തവർക്ക് ഓണാശംസകൾ നേർന്നു.
ഷാർജ പ്രൊവിൻസ് ഭാരവാഹികളായ രവീന്ദ്രൻ, അനിൽ കുമാർ, വിശാഖ് മോഹൻ, സന്തോഷ് നായർ, വിനയ റെജി, അഞ്ജന വിശാഖ്, രശ്മി സന്തോഷ്, ശാന്തി പ്രേം എന്നിവർ പരിപാടികൾ ഏകോപിപ്പിച്ചു.
ഡബ്ലിയു.എം.സി ഗ്ലോബൽ ഭാരവാഹികളായ ചാൾസ് പോൾ, സി.യു. മത്തായി, ഷാഹുൽ ഹമീദ്, എസ്തർ ഐസക്, വി.എസ്. ബിജു കുമാർ എന്നിവരും മിഡിൽ ഈസ്റ്റ് റീജിയൻ നേതാക്കളായ സന്തോഷ് കെട്ടേത്ത്, വിനേഷ് മോഹൻ, ജൂഡിൻ ഫെർണാണ്ടസ്, തോമസ് ജോസഫ്, അജിത് കുമാർ, സാവൻ കുട്ടി, ചാക്കോ ഊളക്കാടൻ, മിലാന അജിത്, റാണി സുധീർ എന്നിവരും സന്നിഹിതരായിരുന്നു.
ചടങ്ങിന്റെ ഭാഗമായി നന്ദഗോവിന്ദനം ടീം അവതരിപ്പിച്ച ഫ്യൂഷൻ സംഗീതവിരുന്നും കൗൺസിൽ അംഗങ്ങളുടെ നേതൃത്വത്തിൽ അരങ്ങേറിയ വിവിധ നൃത്ത-സംഗീത പരിപാടികളും നടന്നു.
