ദി വ്യൂ പാം ജുമൈറയ്ക്ക് അഞ്ചാം വാർഷികം; എട്ട് ഗ്ലാസ് ലെഡ്ജുകളിലൂടെ ആകാശത്തേക്ക് ചുവടുവെക്കാം
: നഗരത്തിന്റെ ആകാശക്കാഴ്ചകൾക്ക് പുതിയ ആവേശം പകരാൻ ദി വ്യൂ പാം ജുമൈറയിൽ എട്ട് ഗ്ലാസ് ലെഡ്ജുകളുമായി പുതിയ അനുഭവം അവതരിപ്പിച്ചു. ദി വ്യൂ പാം ജുമൈറയുടെ അഞ്ചാം വാർഷികത്തോടനുബന്ധിച്ച് ആരംഭിച്ച ‘ദി ലെഡ്ജ് അറ്റ് ദി വ്യൂ’ എന്ന ആകർഷണത്തിലൂടെ സമുദ്രനിരപ്പിൽ നിന്ന് 240 മീറ്റർ ഉയരത്തിൽ ഗ്ലാസ് പ്രതലത്തിലൂടെ പുറത്തേക്ക് ചുവടുവെക്കുന്ന അനുഭവമാണ് സന്ദർശകർക്ക് ലഭിക്കുക.
പാം ജുമൈറ, അറേബ്യൻ ഗൾഫ്, ദുബായ് നഗരത്തിന്റെ വിസ്മയിപ്പിക്കുന്ന ആകാശക്കാഴ്ചകൾ എന്നിവ ആസ്വദിക്കുന്നതിനൊപ്പം കാലിനടിയിലെ സുതാര്യമായ ഗ്ലാസിലൂടെ താഴേക്ക് നോക്കാനും ഇവിടെ അവസരമുണ്ട്. നിലവിലെ നിരീക്ഷണ ഡെക്കിൽ നിന്ന് 1.5 മീറ്റർ പുറത്തേക്ക് നീളുന്ന ഓരോ ഗ്ലാസ് ലെഡ്ജും സന്ദർശകർക്ക് വ്യത്യസ്തമായ അനുഭവം സമ്മാനിക്കും.
എട്ട് ഗ്ലാസ് ലെഡ്ജുകളിൽ നാലെണ്ണം പാം ജുമൈറയുടെ പാം ശാഖകളും ചന്ദ്രക്കലയുടെ ആകൃതിയിലുള്ള ഭാഗവും അറേബ്യൻ ഗൾഫിന്റെ പശ്ചാത്തലത്തിൽ കാണാൻ കഴിയുന്ന വിധത്തിലാണ് ഒരുക്കിയിരിക്കുന്നത്. മറ്റ് നാലെണ്ണത്തിൽ നിന്ന് ദുബായുടെ ആകാശചുംബികളായ കെട്ടിടങ്ങളുടെ മനോഹരമായ കാഴ്ചകൾ ആസ്വദിക്കാം.
പകൽ സമയത്തെ നീലക്കടലിന്റെ കാഴ്ചകൾ, സൂര്യാസ്തമയത്തിലെ സുവർണവർണങ്ങൾ, രാത്രിയിലെ പ്രകാശപൂരിതമായ നഗരദൃശ്യങ്ങൾ എന്നിവ ഈ അനുഭവത്തെ കൂടുതൽ ആകർഷകമാക്കും.
2021-ലാണ് ദി വ്യൂ പാം ജുമൈറ സന്ദർശകർക്കായി തുറന്നത്. കഴിഞ്ഞ അഞ്ച് വർഷത്തിനിടെ 130 രാജ്യങ്ങളിൽ നിന്നുള്ള ദശലക്ഷക്കണക്കിന് സന്ദർശകരെ ഈ കേന്ദ്രം സ്വാഗതം ചെയ്തു. 1,827 സൂര്യോദയങ്ങൾക്കും അത്രതന്നെ സൂര്യാസ്തമയങ്ങൾക്കും സാക്ഷ്യം വഹിച്ച ഇവിടെ 40 വിവാഹാഭ്യർഥനകൾക്കും വേദിയായി. പാം ജുമൈറയുടെയും ദുബായ് നഗരത്തിന്റെയും ദൃശ്യങ്ങൾ പകർത്താൻ 300-ലധികം പ്രാദേശിക, അന്തർദേശീയ പ്രൊഫഷണൽ ഫോട്ടോഗ്രാഫർമാരും ഈ കേന്ദ്രം തിരഞ്ഞെടുത്തിട്ടുണ്ട്.
പാം ജുമൈറയിലെ ലെവൽ 52-ലാണ് 360 ഡിഗ്രി കാഴ്ചകൾ സമ്മാനിക്കുന്ന പ്രധാന നിരീക്ഷണ ഡെക്ക് സ്ഥിതി ചെയ്യുന്നത്. പാം ജുമൈറയുടെ ചരിത്രവും നിർമാണവുമെല്ലാം പരിചയപ്പെടുത്തുന്ന ഇന്ററാക്ടീവ് പ്രദർശനങ്ങളിലൂടെയാണ് സന്ദർശനാനുഭവം ആരംഭിക്കുന്നത്. കൂടുതൽ ഉയരത്തിൽ നിന്നുള്ള കാഴ്ചകൾ ആഗ്രഹിക്കുന്നവർക്കായി സമുദ്രനിരപ്പിൽ നിന്ന് 250 മീറ്റർ ഉയരത്തിലുള്ള ലെവൽ 54-ലെ ‘ദി നെക്സ്റ്റ് ലെവൽ’ നിരീക്ഷണ ഡെക്കും ഇവിടെയുണ്ട്.
ദി വ്യൂ പാം ജുമൈറയുടെ സാധാരണ പ്രവേശന ടിക്കറ്റിൽ ഉൾപ്പെടുത്തിയാണ് പുതിയ ഗ്ലാസ് ലെഡ്ജ് അനുഭവം ലഭ്യമാക്കിയിരിക്കുന്നത്. മുതിർന്നവർക്ക് 115 ദിർഹം മുതലും കുട്ടികൾക്ക് 80 ദിർഹം മുതലുമാണ് ടിക്കറ്റ് നിരക്ക്. www.theviewpalm.ae എന്ന വെബ്സൈറ്റിലൂടെ ടിക്കറ്റുകൾ ബുക്ക് ചെയ്യാം.
ദുബായ് ഹോൾഡിങ് എന്റർടെയ്ൻമെന്റിന്റെ ഭാഗമായ ദി വ്യൂ പാം ജുമൈറ, നഗരത്തിന്റെ പ്രധാന വിനോദസഞ്ചാര കേന്ദ്രങ്ങളിലൊന്നായ പാം ജുമൈറയെ പുതിയൊരു കാഴ്ചപ്പാടിലൂടെ അനുഭവിക്കാൻ സന്ദർശകർക്ക് അവസരമൊരുക്കുകയാണ്. അഞ്ചാം വാർഷികത്തിൽ അവതരിപ്പിച്ച പുതിയ ഗ്ലാസ് ലെഡ്ജുകൾ ദുബായിലെ സാഹസിക വിനോദസഞ്ചാര അനുഭവങ്ങൾക്ക് മറ്റൊരു ആകർഷണം കൂടിയാകും.
