ഹിൽട്ടൺ ദുബായ് അൽ ഹബ്തൂർ സിറ്റിയിൽ നടന്ന 121-ാമത് ലേലത്തിൽ ഇരുവർക്ക പ്ലേറ്റുകൾക്ക് കനത്ത മത്സരം.
ദുബായ്, 26 ഒക്ടോബർ 2026 : ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) സംഘടിപ്പിച്ച 121-ാമത് പ്രത്യേക വാഹന നമ്പർ പ്ലേറ്റ് ലേലത്തിൽ ആകെ വരുമാനം 6.57 കോടി ദിർഹം (65.721 ദശലക്ഷം ദിർഹം) കടന്നു. ലേലത്തിൽ വെച്ച ‘CC44’ എന്ന നമ്പറാണ് ഏറ്റവും ഉയർന്ന തുകയായ 67.2 ലക്ഷം ദിർഹത്തിന് (6.72 ദശലക്ഷം ദിർഹം) വിറ്റുപോയത്.
വാഹനപ്രേമികളുടെയും നിക്ഷേപകരുടെയും സജീവ പങ്കാളിത്തത്തോടെ ഹിൽട്ടൺ ദുബായ് അൽ ഹബ്തൂർ സിറ്റിയിൽ നടന്ന ആർടിഎയുടെ 121-ാമത് പരസ്യ ലേലത്തിൽ ലഭിച്ചത് 65.721 ദശലക്ഷം ദിർഹം.
പ്രത്യേക പദവിയും വ്യക്തിഗത താത്പര്യങ്ങളും പ്രതിഫലിപ്പിക്കുന്ന അപൂർവ നമ്പറുകൾ സ്വന്തമാക്കാൻ വാശിയേറിയ ലേലവിളിയാണ് ഹാളിൽ നടന്നത്. ലേലത്തിലെ പ്രധാന ആകർഷണമായിരുന്ന ‘CC44’ സ്വന്തമാക്കാൻ തുടങ്ങിയ വിളി 6.72 ദശലക്ഷം ദിർഹത്തിലാണ് അവസാനിച്ചത്. തൊട്ടുപിന്നാലെ എത്തിയ ‘BB18’ എന്ന നമ്പർ 6.62 ദശലക്ഷം ദിർഹത്തിന് ഉടമയെ കണ്ടെത്തി.
മറ്റ് പ്രമുഖ നമ്പറുകളിൽ ‘BB80’ നേടിയത് 5.9 ദശലക്ഷം ദിർഹമാണ്. മൂന്നക്ക ശ്രേണിയിൽ ഉൾപ്പെട്ട ‘BB117’ പത്ത് ലക്ഷത്തിലേറെ ദിർഹം (1.016 ദശലക്ഷം ദിർഹം) നേടി ശ്രദ്ധേയമായ വിൽപ്പന നിരക്ക് രേഖപ്പെടുത്തി.
രണ്ട്, മൂന്ന്, നാല്, അഞ്ച് അക്കങ്ങളിലായി 60 പ്രത്യേക നമ്പർ പ്ലേറ്റുകളാണ് അതോറിറ്റി ഇത്തവണ പൊതുലേലത്തിൽ അവതരിപ്പിച്ചത്. AA, BB, CC, H, U, V, W, X, Y, Z എന്നീ കോഡുകളിലെ നമ്പറുകളാണ് ഉൾപ്പെടുത്തിയിരുന്നത്.
തുല്യ അവസരങ്ങളും സുതാര്യതയും മുൻനിർത്തി നടപ്പാക്കുന്ന ഓൺലൈൻ, ഓപ്പൺ ലേല നയങ്ങളുടെ വിജയമാണ് ഉയർന്ന വരുമാനം വ്യക്തമാക്കുന്നതെന്ന് ആർടിഎ വിലയിരുത്തി. യുഎഇയിൽ വാഹന നമ്പറുകൾ വ്യക്തിഗത അടയാളമായും ദീർഘകാല മൂല്യമുള്ള ആസ്തിയായുമാണ് പലരും കണക്കാക്കുന്നത്.
