മദീനത്ത് ജുമൈറയിൽ നടന്ന ചടങ്ങിൽ പ്രഖ്യാപനം; 2028 ആദ്യ പാദത്തിൽ പദ്ധതി കൈമാറും
ദുബായ്, യു.എ.ഇ — ദുബായ് ഐലൻഡ്‌സിൽ നിർമിക്കുന്ന ആഡംബര വാട്ടർഫ്രണ്ട് റസിഡൻഷ്യൽ പ്രൊജക്ടായ ‘അക്വോറ’യുടെ (AQUORA) രണ്ടാം ഘട്ടം പ്രമുഖ റിയൽ എസ്റ്റേറ്റ് ഡെവലപ്പറായ കാസ വിസ്ത ഡെവലപ്‌മെന്റ് പുറത്തിറക്കി. ഔദ്യോഗിക ലോഞ്ചിന് മുന്നോടിയായിത്തന്നെ പദ്ധതിയുടെ ഒന്നാം ഘട്ടത്തിലെ മുഴുവൻ യൂണിറ്റുകളും വിറ്റഴിഞ്ഞ പശ്ചാത്തലത്തിലാണ് അടുത്ത ഘട്ടത്തിന്റെ വിൽപ്പന ആരംഭിച്ചത്.
ഒക്ടോബർ 28-ന് മദീനത്ത് ജുമൈറയിൽ നടന്ന ഔദ്യോഗിക ചടങ്ങിൽ എണ്ണൂറിലധികം വിശിഷ്ടാതിഥികളുടെ സാന്നിധ്യത്തിലായിരുന്നു പ്രഖ്യാപനം. ജലത്തിന്റെ ശാന്തതയും ഒഴുക്കും പ്രതിഫലിക്കുന്ന ‘ഫോം ഫോളോസ് ഫ്ലോ’ എന്ന ആർക്കിടെക്ചറൽ മാതൃകയിലാണ് അക്വോറ രൂപകൽപ്പന ചെയ്തിരിക്കുന്നത്.
50,000 ചതുരശ്ര അടി വിസ്തൃതിയുള്ള സ്ഥലത്ത് 2,42,000 ചതുരശ്ര അടി വിസ്തീർണത്തിലാണ് ഈ പദ്ധതി ഉയരുന്നത്. 105 റെസിഡൻഷ്യൽ അപ്പാർട്ട്‌മെന്റുകളും ആറ് വാട്ടർഫ്രണ്ട് റീട്ടെയിൽ ഔട്ട്‌ലെറ്റുകളും ഉൾപ്പെടുന്നതാണ് പ്രൊജക്റ്റ്. റൂഫ്‌ടോപ്പിലെ 22 മീറ്റർ ഇൻഫിനിറ്റി പൂൾ, ടെക്നോജിം ഫിറ്റ്‌നസ് സെന്റർ, യോഗ സ്റ്റുഡിയോ, സെൻ ഗാർഡൻ, പിക്കിൾബോൾ കോർട്ട് എന്നിവയുൾപ്പെടെ ഇരുപതിലധികം അത്യാധുനിക ജീവിതശൈലി സൗകര്യങ്ങൾ ഇവിടെ ഒരുക്കിയിട്ടുണ്ട്. 2028-ന്റെ ആദ്യ പാദത്തിൽ നിർമാണം പൂർത്തിയാക്കി പദ്ധതി കൈമാറും.
അക്വോറയുടെ പ്രഖ്യാപന വേളയിൽ തന്നെ നിക്ഷേപകരിൽനിന്ന് ലഭിച്ച പിന്തുണ പദ്ധതിയിലുള്ള വിശ്വാസ്യത തെളിയിക്കുന്നതാണെന്ന് കാസ വിസ്ത ഡെവലപ്‌മെന്റ് ചെയർമാൻ അബ്ദുൽ ബാസിത് പറഞ്ഞു. ഒന്നാം ഘട്ടം വേഗത്തിൽ വിറ്റഴിഞ്ഞ സാഹചര്യത്തിലാണ് രണ്ടാം ഘട്ടം വിപണിയിലെത്തിച്ചതെന്നും, ദുബായിൽ കൂടുതൽ പുതിയ ഭവന പദ്ധതികൾ അവതരിപ്പിക്കാനുള്ള ഒരുക്കത്തിലാണ് കമ്പനിയെന്നും അദ്ദേഹം വ്യക്തമാക്കി.
നിർമാണം, റിയൽ എസ്റ്റേറ്റ്, ലോജിസ്റ്റിക്സ്, ചരക്ക് വ്യാപാരം എന്നീ മേഖലകളിൽ 2012 മുതലുള്ള പ്രവർത്തന പരിചയവുമായാണ് കാസ വിസ്ത ഡെവലപ്‌മെന്റ് പ്രവർത്തിക്കുന്നത്. 2015-ൽ തുടക്കമിട്ട നിക്ഷേപ പദ്ധതികളുടെ തുടർച്ചയായി ദുബായിലെ തന്ത്രപ്രധാന മേഖലകളിൽ കൂടുതൽ വികസനങ്ങൾ എത്തിക്കാനാണ് കമ്പനി ലക്ഷ്യമിടുന്നത്.
