പ്രമുഖ എഴുത്തുകാരൻ ടി.ഡി. രാമകൃഷ്ണൻ പുസ്തകം പ്രകാശനം ചെയ്തു; സാമൂഹ്യപ്രവർത്തക പ്രൊഫ. കുസുമം ജോസഫ് ആദ്യ പ്രതി ഏറ്റുവാങ്ങി.
ഷാർജ, യു.എ.ഇ — റിപ്പോർട്ടർ ടി.വി പ്രിൻസിപ്പൽ കറസ്പോണ്ടന്റ് ആർ. റോഷിപാൽ രചിച്ച ‘അവൾക്കൊപ്പം: ഒരു മാധ്യമപ്രവർത്തകന്റെ അന്വേഷണ യാത്ര’ എന്ന പുസ്തകത്തിന്റെ മൂന്നാം പതിപ്പ് പുറത്തിറങ്ങി. ഷാർജ അന്താരാഷ്ട്ര പുസ്തകോത്സവത്തിൽ നടന്ന ചടങ്ങിൽ പ്രമുഖ എഴുത്തുകാരൻ ടി.ഡി. രാമകൃഷ്ണൻ പുസ്തകം പ്രകാശനം ചെയ്തു. സാമൂഹ്യപ്രവർത്തക പ്രൊഫ. കുസുമം ജോസഫ് പുസ്തകം ഏറ്റുവാങ്ങി.
കൊച്ചിയിൽ നടിയെ ആക്രമിച്ച കേസുമായി ബന്ധപ്പെട്ട് ആർ. റോഷിപാൽ നടത്തിയ അന്വേഷണങ്ങളാണ് ഡി.സി ബുക്സ് പുസ്തകരൂപത്തിൽ പ്രസിദ്ധീകരിച്ചിരിക്കുന്നത്. അതിജീവിതയുടെ പോരാട്ടത്തിന്റെ രേഖപ്പെടുത്തൽ കൂടിയാണ് ഈ കൃതി.
സമൂഹം ഭൗതികമായി മാത്രം വളർച്ച നേടിയിട്ട് കാര്യമില്ലെന്നും പരസ്പര സ്നേഹവും ബഹുമാനവുമുള്ള ഇടമായി സമൂഹത്തെ നിലനിർത്തേണ്ടത് അനിവാര്യമാണെന്നും പ്രകാശന വേളയിൽ ടി.ഡി. രാമകൃഷ്ണൻ പറഞ്ഞു. ഈ ഉത്തരവാദിത്തം ഏറ്റെടുത്ത് നിർവഹിക്കുന്നതിൽ പത്രപ്രവർത്തകർക്ക് വലിയ പങ്കുണ്ടെന്നും അദ്ദേഹം ചൂണ്ടിക്കാട്ടി. വീടുകൾക്കുള്ളിലും പുറത്തും ഭയം തോന്നുന്ന തരത്തിലുള്ള കാര്യങ്ങളാണ് നടക്കുന്നത്. സ്ത്രീകൾക്കെതിരെയുള്ള ഹിംസയുടെ രൗദ്രമായ ആഘോഷങ്ങളിലേക്ക് സമൂഹം മാറുകയാണെന്നും അദ്ദേഹം കുറ്റപ്പെടുത്തി.
ചടങ്ങിൽ യുവ എഴുത്തുകാരി ഹണി ഭാസ്‌കരൻ പുസ്തകം പരിചയപ്പെടുത്തി. മുൻ ലോക കേരള സഭ അംഗം ടി.കെ. അബ്ദുൽ ഹമീദ് ചടങ്ങിൽ സംസാരിച്ചു.
