ദുബായ്: ലോകത്തെ ഏറ്റവും വലിയ ഭക്ഷ്യ-പാനീയ പ്രദർശനമായ ‘ഗൾഫുഡ് 2026’-ന്റെ 31-ആം പതിപ്പിന് ദുബായിൽ ആവേശകരമായ തുടക്കം. ദുബായ് വേൾഡ് ട്രേഡ് സെന്ററിലും ദുബായ് എക്സിബിഷൻ സെന്ററിലുമായി നടക്കുന്ന ഈ ബൃഹത്തായ മേളയിൽ, ഇന്ത്യ ഇത്തവണ ‘പാർട്ണർ കൺട്രി’ എന്ന പദവിയോടെയാണ് പങ്കെടുക്കുന്നത് എന്നത് രാജ്യത്തിന് അഭിമാനകരമായി. ഇന്ത്യൻ കാർഷിക-ഭക്ഷ്യോത്പന്നങ്ങളുടെ കയറ്റുമതി സാധ്യതകൾ വർദ്ധിപ്പിക്കുന്നതിനായി അപഡ (APEDA) സജ്ജമാക്കിയ കൂറ്റൻ പവലിയൻ കേന്ദ്ര ഭക്ഷ്യസംസ്കരണ മന്ത്രാലയ സെക്രട്ടറി എ.പി. ദാസ് ജോഷി ഉദ്ഘാടനം ചെയ്തു. അപഡ ചെയർമാൻ അഭിഷേക് ദേവ്, ലുലു ഗ്രൂപ്പ് ചെയർമാൻ എം.എ. യൂസഫലി തുടങ്ങിയ പ്രമുഖരുടെ സാന്നിധ്യത്തിലായിരുന്നു ഉദ്ഘാടന ചടങ്ങുകൾ നടന്നത്.
കാർഷിക ഉത്പന്നങ്ങൾക്കും ഭക്ഷ്യസംസ്കരണ മേഖലയ്ക്കും പുത്തൻ ഉണർവ് നൽകുന്നതാണ് ഇത്തവണത്തെ ഇന്ത്യൻ പങ്കാളിത്തം. കശ്മീരിലെ കുങ്കുമപ്പൂവ് മുതൽ കേരളത്തിലെ സുഗന്ധവ്യഞ്ജനങ്ങൾ വരെ ഇരുന്നൂറിലധികം ഇന്ത്യൻ പ്രദർശകർ ഇവിടെ അണിനിരത്തിയിട്ടുണ്ട്. ലുലു ഗ്രൂപ്പുമായി സഹകരിച്ച് ഇന്ത്യയിലെ സ്റ്റാർട്ടപ്പുകൾക്ക് ആഗോള വിപണി കണ്ടെത്താനുള്ള സവിശേഷമായ പദ്ധതികളും മേളയുടെ ഭാഗമായി ആവിഷ്കരിച്ചിട്ടുണ്ട്. ആഗോളതലത്തിൽ ഇന്ത്യൻ ഉത്പന്നങ്ങൾക്ക് ലഭിക്കുന്ന സ്വീകാര്യത വർദ്ധിച്ചുവരികയാണെന്നും, മികച്ച ഗുണനിലവാരമുള്ള ഉത്പന്നങ്ങൾ ലോകമെമ്പാടുമുള്ള ഉപഭോക്താക്കളിലേക്ക് എത്തിക്കാൻ ഇത്തരം വേദികൾ സഹായിക്കുമെന്നും ഉദ്ഘാടന വേളയിൽ എം.എ. യൂസഫലി അഭിപ്രായപ്പെട്ടു.
മേളയിൽ ഏറ്റവുമധികം ശ്രദ്ധ പിടിച്ചുപറ്റിയത് ലുലു ഗ്രൂപ്പിന്റെ പവലിയനും അവിടെ അവതരിപ്പിക്കപ്പെട്ട നൂതനമായ ഉത്പന്നങ്ങളുമാണ്. മലയാളി സംരംഭകരുടെ ഉടമസ്ഥതയിലുള്ള ‘അടിപൊളി’ (Adipoli) എന്ന കഫീൻ രഹിത റീഫ്രെഷിങ്ങ് ഡ്രിങ്ക് ലുലു പവലിയനിൽ പുറത്തിറക്കിയത് സന്ദർശകർക്കിടയിൽ വലിയ താൽപ്പര്യമുണ്ടാക്കി. മഗ്നീഷ്യം, വിറ്റാമിനുകൾ, സ്വാഭാവിക പഞ്ചസാര എന്നിവ അടങ്ങിയ ഈ പാനീയം ആരോഗ്യകരമായ ജീവിതശൈലി ആഗ്രഹിക്കുന്നവർക്കായി പ്രത്യേകം രൂപകൽപ്പന ചെയ്തതാണ്. പാലക്കാട് സ്വദേശിയായ ചന്ദ്രമോഹൻ ഉൾപ്പെടെയുള്ള സംരംഭകരുടെ ഈ നൂതന ഉത്പന്നം ഉടൻ തന്നെ ലുലുവിന്റെ ആഗോള ഹൈപ്പർമാർക്കറ്റ് ശൃംഖലകളിലൂടെ വിപണിയിലെത്തും.
മേളയുടെ ഭാഗമായി ലുലു ഗ്രൂപ്പ് വിവിധ അന്താരാഷ്ട്ര മന്ത്രാലയങ്ങളുമായും ഏജൻസികളുമായും സുപ്രധാനമായ ധാരണാപത്രങ്ങളിൽ ഒപ്പുവെച്ചു. ലിത്വാനിയയിൽ നിന്നുള്ള ഭക്ഷ്യോത്പന്നങ്ങൾ വിപുലമാക്കുന്നതിന് ‘ലിറ്റ്ഫുഡ്’ (Litfood), സൗദി അറേബ്യയിലെ ‘അരാസ്കോ’ (Arasco), യുഎസ്എ ആസ്ഥാനമായ ‘ഗ്രിഫിത്ത് ഫുഡ്സ്’ എന്നിവയുമായുള്ള സഹകരണം ഇതിൽ പ്രധാനമാണ്. കാനഡ, ഓസ്ട്രേലിയ തുടങ്ങിയ രാജ്യങ്ങളിലെ മന്ത്രിമാരുമായി യൂസഫലി നടത്തിയ കൂടിക്കാഴ്ചകൾ കാർഷിക മേഖലയിലെ പുതിയ വാണിജ്യ സാധ്യതകൾക്ക് വഴിതുറക്കും. 190-ൽ പരം രാജ്യങ്ങളിൽ നിന്നുള്ള 8,500-ലധികം പ്രദർശകർ പങ്കെടുക്കുന്ന ഗൾഫുഡ് 2026, ആഗോള ഭക്ഷ്യ സുരക്ഷയിലും വിതരണ ശൃംഖലയിലും ഇന്ത്യയുടെ കരുത്ത് വിളിച്ചോതുന്ന വേദിയായി മാറുകയാണ്.
