ദുബൈ: അടുത്ത അഞ്ച് വർഷത്തിനുള്ളിൽ ഏകദേശം 20,000 പുതിയ ജീവനക്കാരെ കൂടി നിയമിക്കാൻ എമിറേറ്റ്സ് എയർലൈൻസ് ഒരുങ്ങുന്നു. എമിറേറ്റ്സ് ഡെപ്യൂട്ടി പ്രസിഡന്റും ചീഫ് ഓപ്പറേറ്റിംഗ് ഓഫീസറുമായ ആദിൽ അൽ റെദയാണ് ഇക്കാര്യം വ്യക്തമാക്കിയത്.
ക്യാബിൻ ക്രൂ, പൈലറ്റുമാർ, എഞ്ചിനീയർമാർ, ടെക്നീഷ്യൻമാർ, എയർപോർട്ട് സ്റ്റാഫ് തുടങ്ങിയ വിവിധ വിഭാഗങ്ങളിലായിരിക്കും നിയമനം നടക്കുക. കമ്പനിയുടെ പ്രവർത്തന വ്യാപ്തി വർധിപ്പിക്കുന്നതിന്റെ ഭാഗമായാണ് വലിയ തോതിലുള്ള നിയമന നടപടികൾ ആസൂത്രണം ചെയ്തിരിക്കുന്നതെന്ന് അദ്ദേഹം പറഞ്ഞു.
അടുത്ത പത്ത് വർഷത്തിനുള്ളിൽ കൂടുതൽ റൂട്ടുകൾ, പുതിയ വിമാനങ്ങൾ, അധിക ലക്ഷ്യസ്ഥാനങ്ങൾ എന്നിവ അവതരിപ്പിക്കാനും എമിറേറ്റ്സ് പദ്ധതിയിടുന്നുണ്ടെന്നും ആദിൽ അൽ റെദ വ്യക്തമാക്കി. ദീർഘകാല വളർച്ച ലക്ഷ്യമിട്ടുള്ള വികസന പദ്ധതികളുടെ ഭാഗമായാണ് ഈ നീക്കം.
നിലവിലെ കണക്കുകൾ പ്രകാരം എമിറേറ്റ്സ് ഗ്രൂപ്പിൽ 1,24,000 ജീവനക്കാരാണ് പ്രവർത്തിക്കുന്നത്. പുതിയ നിയമനങ്ങൾ പൂർത്തിയാകുന്നതോടെ ഗ്രൂപ്പിന്റെ തൊഴിൽശേഷി ഗണ്യമായി വർധിക്കുമെന്നാണ് വിലയിരുത്തൽ.
