ദുബായ്: ഈ വർഷത്തെ യാത്രകൾ മുൻകൂട്ടി പ്ലാൻ ചെയ്യുന്ന പ്രവാസികൾക്കും വിനോദസഞ്ചാരികൾക്കും ആശ്വാസ വാർത്തയുമായി എയർ ഇന്ത്യ എക്സ്പ്രസ്. ആഭ്യന്തര, അന്താരാഷ്ട്ര സർവീസുകൾക്കായി 20 ശതമാനം വരെ വിലക്കിഴിവ് പ്രഖ്യാപിച്ചുകൊണ്ടുള്ള ‘എക്സ്പ്രസ് മോർ സെയിൽ’ (Xpress More Sale) എയർലൈൻ ആരംഭിച്ചു. ഫെബ്രുവരി 11 മുതൽ ഡിസംബർ 31 വരെയുള്ള നീണ്ട കാലയളവിലെ യാത്രകൾക്കായി ഫെബ്രുവരി 5 വരെ ടിക്കറ്റുകൾ ബുക്ക് ചെയ്യുന്നവർക്കാണ് ഈ ആനുകൂല്യം ലഭിക്കുക. പ്രവാസികൾക്ക് നാട്ടിലേക്കും തിരിച്ചുമുള്ള യാത്രകൾ കുറഞ്ഞ ചെലവിൽ ഉറപ്പാക്കാൻ ഈ പരിമിതകാല ഓഫർ മികച്ച അവസരമൊരുക്കുന്നു.
ഗൾഫ് രാജ്യങ്ങളിൽ നിന്ന് ഇന്ത്യയിലേക്കുള്ള യാത്രക്കാർക്ക് ആകർഷകമായ നിരക്കുകളാണ് ഓഫറിന്റെ ഭാഗമായി നിശ്ചയിച്ചിട്ടുള്ളത്. യു.എ.ഇയിൽ നിന്നുള്ള യാത്രക്കാർക്ക് വെറും 320 ദിർഹം മുതൽ ടിക്കറ്റുകൾ ലഭ്യമാകും. സമാനമായ രീതിയിൽ ഒമാനിൽ നിന്ന് 23 റിയാൽ, ബഹ്റൈനിൽ നിന്ന് 46 ദിനാർ, ഖത്തറിൽ നിന്ന് 378 റിയാൽ, കുവൈറ്റിൽ നിന്ന് 27 ദിനാർ, സൗദി അറേബ്യയിൽ നിന്ന് 286 റിയാൽ എന്നിങ്ങനെയാണ് കുറഞ്ഞ നിരക്കുകൾ ആരംഭിക്കുന്നത്. എയർലൈനിന്റെ വെബ്സൈറ്റിലൂടെയോ മൊബൈൽ ആപ്പിലൂടെയോ നേരിട്ട് ബുക്ക് ചെയ്യുന്നവർക്ക് കൺവീനിയൻസ് ഫീ നൽകേണ്ടതില്ല എന്നതും ഒരു തവണ സൗജന്യമായി യാത്രാ തീയതി മാറ്റാം എന്നതും ഓഫറിനെ കൂടുതൽ ആകർഷകമാക്കുന്നു.
ലഗേജ് കുറവുള്ള യാത്രക്കാർക്കായി അവതരിപ്പിച്ച ‘എക്സ്പ്രസ് ലൈറ്റ്’ നിരക്കുകളിൽ യാത്ര ചെയ്യുന്നവർക്ക് അധിക ബാഗേജ് ആവശ്യമാണെങ്കിൽ കുറഞ്ഞ നിരക്കിൽ അത് സ്വന്തമാക്കാം. അന്താരാഷ്ട്ര സർവീസുകളിൽ 20 കിലോ അധിക ലഗേജിന് 2,500 രൂപയും ആഭ്യന്തര സർവീസുകളിൽ 15 കിലോയ്ക്ക് 1,500 രൂപയും മാത്രം നൽകിയാൽ മതിയാകും. ഇതിനുപുറമെ, ന്യൂ പാസ് (NeuPass) അംഗങ്ങൾക്ക് ബിസിനസ് ക്ലാസിന് തുല്യമായ ‘ബിസ്’ (Biz) വിഭാഗത്തിൽ 25 ശതമാനം വരെ കിഴിവ് ലഭിക്കും. എയർ ഇന്ത്യ എക്സ്പ്രസ് പുതുതായി ഉൾപ്പെടുത്തിയ 40-ലധികം ബോയിംഗ് 737-8 വിമാനങ്ങളിലെ വിശാലമായ ബിസ് സീറ്റുകളിലും ഈ ആനുകൂല്യം ലഭ്യമാണ്.
മുതിർന്ന പൗരന്മാർ, വിദ്യാർത്ഥികൾ, സായുധ സേനാംഗങ്ങൾ എന്നിവർക്ക് പ്രത്യേക ഇളവുകൾ നൽകുന്നതിനൊപ്പം തെരഞ്ഞെടുത്ത വിസ കാർഡുകൾ ഉപയോഗിക്കുന്നവർക്ക് അധിക ക്യാഷ്ബാക്ക് സൗകര്യവും എയർലൈൻ വാഗ്ദാനം ചെയ്യുന്നുണ്ട്. ഇന്ത്യയിലെ 45 നഗരങ്ങളിലേക്കും ഗൾഫ് ഉൾപ്പെടെയുള്ള 17 അന്താരാഷ്ട്ര കേന്ദ്രങ്ങളിലേക്കുമായി പ്രതിദിനം 500-ലധികം സർവീസുകൾ നടത്തുന്ന എയർ ഇന്ത്യ എക്സ്പ്രസ്, ഈ സെയിലിലൂടെ യാത്രാച്ചെലവ് ഗണ്യമായി കുറയ്ക്കാനാണ് ലക്ഷ്യമിടുന്നത്. മുൻകൂട്ടി പ്ലാൻ ചെയ്യുന്നവർക്ക് ബജറ്റ് ഒതുങ്ങുന്ന യാത്രകൾ ഉറപ്പാക്കാൻ ഇത്തരം അവസരങ്ങൾ ഫലപ്രദമായി ഉപയോഗപ്പെടുത്താവുന്നതാണ്.
