അബൂദബി: റമദാൻ മാസത്തിൽ കുടുംബങ്ങളുടെ വീട്ടുചെലവ് കുറയ്ക്കാൻ 823 ഭക്ഷ്യവസ്തുക്കൾക്ക് വിലക്കുറവ് പ്രഖ്യാപിച്ച് അൽ ദഫ്റ റീജ്യൻ. അല് ദഫ്റ മുനിസിപ്പാലിറ്റിയാണ് റമദാനോടനുബന്ധിച്ച് ഈ പ്രത്യേക ഡിസ്കൗണ്ട് പദ്ധതി നടപ്പിലാക്കുന്നത്. ഇതിന് പുറമെ 10 അവശ്യവസ്തുക്കൾക്ക് നിലവിൽ നൽകിയിരുന്ന വിലക്കുറവും തുടരും.
മാറിക്കൊണ്ടിരിക്കുന്ന സാമ്പത്തിക സാഹചര്യത്തിൽ ജീവിതച്ചെലവ് നിയന്ത്രിക്കാൻ കുടുംബങ്ങളെ സഹായിക്കുന്നതിനായാണ് പദ്ധതി രൂപകൽപ്പന ചെയ്തതെന്ന് അധികൃതർ വ്യക്തമാക്കി. ഭക്ഷ്യസുരക്ഷ ഉറപ്പാക്കുകയും അവശ്യവസ്തുക്കളുടെ ലഭ്യത നിലനിർത്തുകയും ചെയ്യുന്നതും പദ്ധതിയുടെ ലക്ഷ്യങ്ങളിലൊന്നാണ്.
അബൂദബി കോഓപറേറ്റീവ് സൊസൈറ്റിയുമായി സഹകരിച്ച് റീജ്യനിലെ 13 റീട്ടെയിൽ ഔട്ട്ലെറ്റുകളിലൂടെ താമസക്കാർക്ക് വിലക്കുറവിൽ സാധനങ്ങൾ വാങ്ങാം.
സർക്കാർ പ്ലാറ്റ്ഫോമായ TAMM മുഖേന ഓൺലൈനായും ഡിസ്കൗണ്ട് ലഭ്യമായ ഭക്ഷ്യവസ്തുക്കൾ ഓർഡർ ചെയ്യാം. വയോജനങ്ങൾക്കും നിശ്ചയദാർഢ്യജനതയ്ക്കുമായി മുനിസിപ്പാലിറ്റി സൗജന്യ ഹോം ഡെലിവറി സൗകര്യവും ഒരുക്കിയിട്ടുണ്ട്.
റമദാൻ കാലത്ത് കുടുംബങ്ങൾക്ക് സാമ്പത്തിക ആശ്വാസം നൽകുകയാണ് ഈ പദ്ധതിയുടെ പ്രധാന ഉദ്ദേശ്യമെന്ന് അധികൃതർ കൂട്ടിച്ചേർത്തു.
