ന്യൂഡൽഹി: ഇറാനെതിരായ ഇസ്രയേൽ–യുഎസ് സൈനിക നീക്കങ്ങൾ ശക്തമായതോടെ ഇന്ത്യൻ ബസ്മതി അരി കയറ്റുമതി മേഖലയിലും ആശങ്ക ഉയരുന്നു. നിലവിലുള്ള ഓർഡറുകൾ റദ്ദാകുമോ, ഷിപ്പിംഗ് തടസപ്പെടുമോ, ഇൻഷുറൻസ് ചെലവ് കുത്തനെ ഉയരുമോ എന്ന ഭീതിയിലാണ് വ്യാപാരികൾ.
ഇന്ത്യയുടെ ബസ്മതി അരി കയറ്റുമതിയുടെ ഏകദേശം പകുതിയും പശ്ചിമേഷ്യൻ രാജ്യങ്ങളായ സൗദി അറേബ്യ, ഇറാൻ, ഇറാഖ്, യുഎഇ, യമൻ എന്നിവിടങ്ങളിലേക്കാണ്. ഈ രാജ്യങ്ങളിലേക്കുള്ള കപ്പൽ ഗതാഗതത്തിന്റെ പ്രധാന മാർഗം ഹോർമുസ് കടലിടുക്കാണ്. സംഘർഷം രൂക്ഷമാവുകയും ഇറാൻ ഹോർമുസ് കടലിടുക്ക് അടയ്ക്കുകയും ചെയ്താൽ കയറ്റുമതി താത്കാലികമായി നിലയ്ക്കാൻ സാധ്യതയുണ്ടെന്നാണ് വിലയിരുത്തൽ.
സങ്കീർണ സാഹചര്യത്തെ മുൻനിർത്തി പുതിയ കരാറുകളിൽ ഏർപ്പെടുമ്പോൾ ജാഗ്രത പുലർത്തണമെന്ന് ഇന്ത്യൻ റൈസ് എക്സ്പോർട്ടേഴ്സ് ഫെഡറേഷൻ വ്യാപാരികൾക്ക് നിർദേശം നൽകിയിട്ടുണ്ട്. ഇന്ധനവില വർധന, കണ്ടെയ്നർ ക്ഷാമം, ഷിപ്പിംഗ് നിരക്കുകൾ ഉയരൽ തുടങ്ങിയ ഘടകങ്ങളും കയറ്റുമതിയെ പ്രതികൂലമായി ബാധിക്കാനിടയുണ്ട്. യുദ്ധസാഹചര്യത്തിൽ ഇൻഷുറൻസ് പ്രീമിയം തുകകളിൽ വൻ വർധനവുണ്ടാകാനിടയുണ്ടെന്നും സംഘടന മുന്നറിയിപ്പ് നൽകുന്നു.
ബസ്മതി അരി കയറ്റുമതിയിൽ ഇന്ത്യ ലോകത്തിൽ ഒന്നാമതാണ്. ആഗോള ഉത്പാദനത്തിന്റെ ഏകദേശം 70 ശതമാനവും ഇന്ത്യയിലാണ്. 2024-25 സാമ്പത്തിക വർഷത്തിൽ ഏകദേശം 50,000 കോടി രൂപ മൂല്യമുള്ള ബസ്മതി അരിയാണ് ഇന്ത്യ കയറ്റുമതി ചെയ്തത്. നിലവിലെ സംഘർഷാവസ്ഥ ദീർഘകാലം തുടരുകയാണെങ്കിൽ ഈ മേഖലയ്ക്ക് വലിയ തിരിച്ചടിയുണ്ടാകുമെന്ന ആശങ്ക ശക്തമാണ്.
സാഹചര്യം എങ്ങനെ മാറുമെന്ന് കാത്തുനോക്കുകയാണ് ഇപ്പോൾ കയറ്റുമതി മേഖലയിലെ പ്രധാന കമ്പനികൾ.
English Summary
India’s basmati rice exporters are facing uncertainty amid escalating tensions between Iran, Israel, and the United States. Nearly 50% of India’s basmati rice exports are shipped to West Asian countries including Saudi Arabia, Iran, Iraq, the UAE, and Yemen — most of which rely on the Strait of Hormuz for maritime trade.Exporters fear that any closure of the Strait of Hormuz could severely disrupt shipments. The Indian Rice Exporters Federation has advised traders to exercise caution before entering into new contracts. Rising fuel costs, container shortages, shipping delays, and potential increases in insurance premiums are also adding to concerns.
