അബുദാബി: യുഎഇയിൽ അടുത്ത ദിവസങ്ങളിൽ ഇടവിട്ട മഴയും മേഘാവൃതമായ കാലാവസ്ഥയും അനുഭവപ്പെടാൻ സാധ്യതയുണ്ടെന്ന് National Center of Meteorology അറിയിച്ചു. മാർച്ച് 6 മുതൽ 10 വരെ രാജ്യത്തെ കാലാവസ്ഥയെക്കുറിച്ചുള്ള പ്രവചനമാണ് അധികൃതർ പുറത്തുവിട്ടത്.
വെള്ളി, ശനി ദിവസങ്ങളിൽ പൊതുവെ തെളിഞ്ഞ അന്തരീക്ഷമായിരിക്കുമെങ്കിലും പടിഞ്ഞാറൻ മേഖലകളിൽ ഭാഗികമായി മേഘാവൃതമാകാൻ സാധ്യതയുണ്ട്. വടക്കുപടിഞ്ഞാറൻ കാറ്റ് ശക്തമാകുന്നതിനാൽ പൊടിപടലങ്ങൾ ഉയരാനും അറബിക്കടലിലും ഒമാൻ കടലിലും കടൽ പ്രക്ഷുബ്ധമാകാനും സാധ്യതയുണ്ടെന്ന് മുന്നറിയിപ്പുണ്ട്.
ശനിയാഴ്ചയോടെ താപനിലയിൽ നേരിയ വർധനവ് അനുഭവപ്പെടും. ഞായറാഴ്ച പുലർച്ചെ ഉൾപ്രദേശങ്ങളിൽ മൂടൽമഞ്ഞ് രൂപപ്പെടാൻ സാധ്യതയുണ്ടെന്നും കാലാവസ്ഥാ കേന്ദ്രം അറിയിച്ചു.
അതേസമയം ഞായറാഴ്ച മുതൽ പടിഞ്ഞാറൻ മേഖലകൾ, തീരപ്രദേശങ്ങൾ, ദ്വീപുകൾ എന്നിവിടങ്ങളിൽ നേരിയ മഴ ലഭിക്കാമെന്നാണ് പ്രവചനം. തിങ്കളാഴ്ചയും ചൊവ്വാഴ്ചയും മേഘാവൃതമായ കാലാവസ്ഥ തുടരുകയും ചൊവ്വാഴ്ച വടക്കൻ പ്രദേശങ്ങളിൽ മഴ ലഭിക്കാനും സാധ്യതയുണ്ട്.
വരാനിരിക്കുന്ന റമസാൻ കാലയളവിൽ കാലാവസ്ഥാ വ്യതിയാനങ്ങൾ കണക്കിലെടുത്ത് യാത്രകൾ മുൻകൂട്ടി ക്രമീകരിക്കണമെന്ന് അധികൃതർ നിർദേശിച്ചു.
English Summary
The UAE National Center of Meteorology has forecast cloudy weather and intermittent rain across the UAE from March 6 to March 10. Light rain is expected in western and coastal areas, while fog may form in inland regions early Sunday. Strong northwesterly winds could also raise dust and cause rough sea conditions in the Arabian Sea and Oman Sea. Authorities advised residents to plan travel carefully during the upcoming Ramadan period due to changing weather conditions.
