ദുബായ്: ദുബായ് ഔഖാഫുമായി സഹകരിച്ച് ലുലു ഗ്രൂപ്പ് നടപ്പാക്കുന്ന ആദ്യ റീട്ടെയിൽ പദ്ധതിയായി അൽ ഖവാനീജിലെ ഖവാനീജ് ഗേറ്റിൽ പുതിയ ലുലു എക്സ്പ്രസ് സ്റ്റോർ തുറന്നു. മിഡിൽ ഈസ്റ്റിലെ സാമ്പത്തിക മേഖലയെ ശക്തിപ്പെടുത്തുന്നതിനും നിക്ഷേപകർക്ക് ആത്മവിശ്വാസം പകരുന്നതിനുമായി ലുലു ഗ്രൂപ്പ് മേഖലയിലുടനീളം പുതിയ പദ്ധതികൾ നടപ്പാക്കുന്നുവെന്ന് അധികൃതർ അറിയിച്ചു.
ലുലു ഗ്രൂപ്പ് ചെയർമാൻ എം.എ. യൂസഫലി, ദുബായ് ഔഖാഫ് സെക്രട്ടറി ജനറൽ അലി മുഹമ്മദ് അൽ മുത്വവ എന്നിവർ സാക്ഷികളായ ചടങ്ങിൽ ദുബായ് ഔഖാഫ് ചെയർമാൻ ഈസ അബ്ദുല്ല അൽ ഗുരൈർ പുതിയ ലുലു എക്സ്പ്രസ് സ്റ്റോർ ഉദ്ഘാടനം ചെയ്തു.
ലുലു ഗ്രൂപ്പുമായി സഹകരിച്ച് പുതിയ റീട്ടെയിൽ പദ്ധതികൾ യാഥാർത്ഥ്യമാകുന്നതിൽ സന്തോഷമുണ്ടെന്ന് ഈസ അബ്ദുല്ല അൽ ഗുരൈർ പറഞ്ഞു. അൽ ഖവാനീജിലെ ഷോപ്പിങ് സെന്ററിൽ നിന്ന് ലഭിക്കുന്ന വരുമാനം മസ്ജിദുകളുടെ പ്രവർത്തനങ്ങൾക്കും ദുബായിലെ വിവിധ വികസന പ്രവർത്തനങ്ങൾക്കുമായി വിനിയോഗിക്കുമെന്ന് അദ്ദേഹം വ്യക്തമാക്കി.
ഔഖാഫുമായി സഹകരിച്ച് മികച്ച റീട്ടെയിൽ പദ്ധതികളാണ് ലുലു ഗ്രൂപ്പ് നടപ്പാക്കുന്നതെന്നും, ഔഖാഫ് നടപ്പാക്കുന്ന പതിനാറിലധികം പദ്ധതികളിൽ ലുലു പങ്കാളിത്തം വഹിക്കുമെന്നും ലുലു ഗ്രൂപ്പ് ചെയർമാൻ എം.എ. യൂസഫലി പറഞ്ഞു.
മേഖലയിലെ ഭക്ഷ്യസുരക്ഷ, ഉൽപ്പന്നങ്ങളുടെ സുഗമമായ ലഭ്യത, വിലസ്ഥിരത എന്നിവ ഉറപ്പാക്കുന്നതിന് ലുലു ഗ്രൂപ്പ് വിവിധ നടപടികൾ സ്വീകരിക്കുന്നുണ്ടെന്നും അദ്ദേഹം വ്യക്തമാക്കി. ലോകത്തിന്റെ വിവിധ ഭാഗങ്ങളിൽ നിന്ന് കൂടുതൽ ചരക്ക് വിമാന സർവീസുകൾ വഴി ഉൽപ്പന്നങ്ങൾ എത്തിക്കുന്നതിനുള്ള സംവിധാനങ്ങളും ഒരുക്കിയിട്ടുണ്ടെന്നും ആശങ്കപ്പെടേണ്ട സാഹചര്യമില്ലെന്നും യൂസഫലി പറഞ്ഞു.
19,800 സ്ക്വയർ ഫീറ്റ് വിസ്തൃതിയുള്ള ലുലു എക്സ്പ്രസ് സ്റ്റോറിൽ ദൈനംദിന ആവശ്യവസ്തുക്കളുടെ വിപുലമായ ശേഖരമാണ് ഒരുക്കിയിരിക്കുന്നത്. ഉപഭോക്താക്കൾക്ക് കൂടുതൽ സൗകര്യമൊരുക്കുന്നതിനായി സെൽഫ് ചെക്ക്-ഔട്ട് കൗണ്ടറുകൾ, വിശാലമായ പാർക്കിംഗ് സൗകര്യം എന്നിവയും സ്റ്റോറിൽ ഒരുക്കിയിട്ടുണ്ട്.
English Summary : LuLu Group has opened a new LuLu Express store at Khawaneej Gate in Dubai in partnership with Dubai Awqaf. The retail project was inaugurated in the presence of M.A. Yusuffali and Awqaf officials. The 19,800 sq ft store offers a wide range of daily essentials and modern shopping facilities, while supporting food security and product availability across the UAE.
