അഹമ്മദാബാദ്: ന്യൂസീലൻഡിനെ തോൽപ്പിച്ച് ടി20 ലോകകപ്പ് 2026 കിരീടം സ്വന്തമാക്കിയതിന് പിന്നാലെ ഇന്ത്യൻ ക്യാപ്റ്റൻ സൂര്യകുമാർ യാദവിന്റെ വികാരനിർഭരമായ ആഘോഷം ശ്രദ്ധേയമായി. മത്സരത്തിന് ശേഷം പിച്ചിലേക്ക് എത്തിയ സൂര്യകുമാർ യാദവ് ആദ്യം പിച്ചിനെ സ്പർശിച്ച് വന്ദിക്കുകയും പിന്നീട് അവിടത്തെ മണ്ണെടുത്ത് നെറ്റിയിൽ ചാർത്തുകയും ചെയ്തു.
കിവീസിന്റെ അവസാന വിക്കറ്റ് വീണതോടെ ഇന്ത്യയുടെ താരങ്ങൾ ആവേശത്തോടെ വിജയാഘോഷം തുടങ്ങി. ചരിത്ര വിജയത്തിന്റെ ആവേശത്തിൽ പല താരങ്ങളുടെയും കണ്ണുകൾ നിറഞ്ഞപ്പോൾ ചിലർ പരസ്പരം ചേർത്ത് പിടിച്ച് സന്തോഷം പങ്കിട്ടു.
ഈ ആഘോഷം ആരാധകർക്ക് 2024 ടി20 ലോകകപ്പ് വിജയത്തിനു ശേഷം രോഹിത് ശർമ്മ നടത്തിയ ആഘോഷം ഓർമ്മിപ്പിച്ചു. അന്ന് ബാർബഡോസിലെ കെൻസിങ്ടൺ ഓവലിൽ കിരീടം നേടിയതിന് പിന്നാലെ രോഹിത് പിച്ചിലെ മണ്ണെടുത്ത് രുചിച്ചാണ് തന്റെ ആഘോഷം പൂർത്തിയാക്കിയത്.
സൂര്യകുമാർ യാദവിന്റെ ഈ വികാരഭരിതമായ നിമിഷം സോഷ്യൽ മീഡിയയിൽ വൈറലായി മാറിയിരിക്കുകയാണ്. ടീമിന്റെ ചരിത്ര വിജയം താരങ്ങൾക്ക് എത്രമാത്രം പ്രാധാന്യമുള്ളതാണെന്ന് ഈ ആഘോഷം തെളിയിക്കുന്നുവെന്നാണ് ആരാധകർ പറയുന്നത്.
English Summary: After India won the T20 World Cup 2026, captain Suryakumar Yadav paid an emotional tribute to the pitch by touching it and applying a handful of soil to his forehead. The moment reminded fans of Rohit Sharma’s iconic celebration in 2024, when he tasted the pitch soil after India’s World Cup victory. The gesture quickly went viral on social media.
