തിരുവനന്തപുരം: നിയമസഭ തെരഞ്ഞെടുപ്പിനുള്ള നാമനിർദേശ പത്രിക സമർപ്പിക്കാൻ ഇനി മൂന്ന് പ്രവൃത്തിദിവസം മാത്രം ശേഷിക്കെ സ്ഥാനാർഥികൾ നെട്ടോട്ടത്തിലാണ്. മാർച്ച് 23 ആണ് പത്രിക സമർപ്പിക്കാനുള്ള അവസാന തീയതി. ഇതിന് ഇടയിൽ ഈദുൽ ഫിത്വറും ഞായറാഴ്ചയും പൊതുഅവധി ദിവസങ്ങളായതിനാൽ സമയം കൂടുതൽ ചുരുങ്ങിയിരിക്കുകയാണ്.
ഞായറാഴ്ച പ്രവൃത്തി ദിവസമാക്കണമെന്ന ആവശ്യവുമായി രാഷ്ട്രീയ പാർട്ടികൾ മുന്നോട്ടുവന്നെങ്കിലും കേന്ദ്ര തെരഞ്ഞെടുപ്പ് കമീഷൻ ഇത് പരിഗണിച്ചിട്ടില്ല. ഇതോടെ സ്ഥാനാർഥികൾക്ക് കുറച്ച് ദിവസത്തിനുള്ളിൽ തന്നെ പത്രികകൾ തയ്യാറാക്കി സമർപ്പിക്കേണ്ട സാഹചര്യം ഉണ്ടായിരിക്കുകയാണ്.
സ്വത്ത് വിവരങ്ങൾ, ബാധ്യതകൾ, ക്രിമിനൽ കേസുകൾ സംബന്ധിച്ച സത്യവാങ്മൂലം എന്നിവ അടങ്ങിയ രേഖകൾ കൃത്യമായി തയ്യാറാക്കേണ്ടതായതിനാൽ വലിയ തിരക്കിലാണ് സ്ഥാനാർഥികൾ. ചെറിയ പിഴവുകൾ പോലും പത്രിക തള്ളപ്പെടാൻ കാരണമാകുന്നതിനാൽ അതീവ ജാഗ്രത പാലിക്കേണ്ടതുണ്ട്.
ഇതിനിടെ ഇടതു മുന്നണി സ്ഥാനാർഥി നിർണയം ഏകദേശം പൂർത്തിയാക്കിയെങ്കിലും കോൺഗ്രസ് ഇപ്പോഴും നിരവധി സീറ്റുകളിൽ സ്ഥാനാർഥികളെ പ്രഖ്യാപിച്ചിട്ടില്ല. അവസാന ദിവസങ്ങളിൽ വലിയ തിരക്ക് ഒഴിവാക്കാൻ മുൻകൂട്ടി പത്രിക സമർപ്പിക്കാൻ പലരും ശ്രമം തുടങ്ങി.
സാങ്കേതിക പിഴവുകൾ ഒഴിവാക്കാൻ ‘ഡമ്മി’ സ്ഥാനാർഥികളെയും പാർട്ടികൾ ഒരുക്കുന്നുണ്ട്. അതേസമയം സിറ്റിങ് എം.എൽ.എമാർക്ക് ബാധ്യതാരഹിത സർട്ടിഫിക്കറ്റ് നേടുന്നതുമായി ബന്ധപ്പെട്ടും ചില തടസ്സങ്ങൾ നേരിടുന്നുണ്ട്.
മുഖ്യ തെരഞ്ഞെടുപ്പ് ഓഫീസർ രത്തൻ യു. ഖേൽക്കർ വ്യക്തമാക്കി: പൊതുഅവധി ദിവസങ്ങളിൽ നാമനിർദേശ പത്രിക സ്വീകരിക്കില്ല. നിയമപ്രകാരം അവധി ദിവസങ്ങളിൽ പത്രിക സ്വീകരിക്കാൻ അനുമതിയില്ലെന്നും അദ്ദേഹം പറഞ്ഞു.
1951ലെ ജനപ്രാതിനിധ്യ നിയമപ്രകാരം പൊതുഅവധി ദിവസങ്ങളിൽ വരണാധികാരിക്ക് പത്രിക സ്വീകരിക്കാൻ കഴിയില്ല. അതിനാൽ സ്ഥാനാർഥികൾ സമയപരിധി കൃത്യമായി പാലിക്കണമെന്നും രാഷ്ട്രീയ പാർട്ടികൾ നിർദേശങ്ങൾ നൽകണമെന്നും കമീഷൻ അറിയിച്ചു.
