ദുബൈ: സന്ദർശകരുടെ അമിത തിരക്ക് പരിഗണിച്ച് ദുബൈയിലെ പ്രമുഖ വിനോദസഞ്ചാര കേന്ദ്രമായ ദുബൈ മിറാക്കിൾ ഗാർഡൻ താൽക്കാലികമായി അടച്ചു. സുരക്ഷാ കാരണങ്ങളാലാണ് അധികൃതർ ഈ തീരുമാനം എടുത്തത്.
പെരുന്നാൾ അവധി ദിവസങ്ങളും പ്രവേശനം സൗജന്യമാക്കിയതും ചേർന്നതോടെ ഗാർഡനിലേക്ക് അഭൂതപൂർവമായ തിരക്കാണ് അനുഭവപ്പെട്ടത്. മാർച്ച് 15 മുതൽ 31 വരെ പ്രവേശനം സൗജന്യമാക്കിയിരുന്നു. ഇതിന് പിന്നാലെ ആയിരക്കണക്കിന് സന്ദർശകരാണ് ദിവസേന എത്തിയത്.
ഗാർഡന്റെ പ്രവേശന കവാടത്തിന് മുൻപിൽ വലിയ തിരക്ക് രൂപപ്പെട്ടതും അതിന്റെ ദൃശ്യങ്ങൾ സാമൂഹ്യമാധ്യമങ്ങളിൽ വൈറലായതും അധികൃതരുടെ ശ്രദ്ധയിൽപ്പെട്ടിരുന്നു. ഈ സാഹചര്യത്തിൽ സന്ദർശകരുടെ സുരക്ഷ ഉറപ്പാക്കുന്നതിനായി താൽക്കാലിക അടച്ചിടൽ അനിവാര്യമാണെന്ന് അധികൃതർ അറിയിച്ചു.
അസൗകര്യങ്ങൾക്ക് ക്ഷമ ചോദിക്കുന്നതായും, സ്ഥിതി സാധാരണ നിലയിലാകുന്ന ഉടൻ ഗാർഡൻ വീണ്ടും തുറക്കുമെന്ന് ബന്ധപ്പെട്ടവർ അറിയിച്ചു.
