ആർട്ടിഫിഷ്യൽ ഇന്റലിജൻസ് സാങ്കേതികവിദ്യകൾ വഴിയുള്ള തട്ടിപ്പുകൾ, കള്ളപ്പണം വെളുപ്പിക്കൽ, ഭീകരവാദ ധനസഹായം എന്നിവ തടയാൻ ആഗോളതലത്തിൽ സംയുക്ത നീക്കം
അബുദാബി, സെപ്റ്റംബർ 29, 2026 :ആഗോളതലത്തിൽ വ്യാപിക്കുന്ന സാമ്പത്തിക കുറ്റകൃത്യങ്ങളും കള്ളപ്പണം വെളുപ്പിക്കലും തടയുന്നതിനായി അടുത്ത അഞ്ച് വർഷത്തേക്കുള്ള സമഗ്ര കർമ്മപദ്ധതിക്ക് രൂപംനൽകി പതിനഞ്ചാമത് യുഎൻ ക്രൈം കോൺഗ്രസ് ‘അബുദാബി പ്രഖ്യാപനം’ പാസാക്കി.
അബുദാബി നാഷണൽ എക്സിബിഷൻ സെന്ററിൽ (ADNEC) നടന്ന പതിനഞ്ചാമത് യുണൈറ്റഡ് നേഷൻസ് കോൺഗ്രസ് ഓൺ ക്രൈം പ്രിവൻഷൻ ആൻഡ് ക്രിമിനൽ ജസ്റ്റിസ് സമ്മേളനത്തിലാണ് അംഗരാജ്യങ്ങൾ നയരേഖയ്ക്ക് ഔദ്യോഗിക അംഗീകാരം നൽകിയത്. കള്ളപ്പണം വെളുപ്പിക്കൽ, ഭീകരവാദ പ്രവർത്തനങ്ങൾക്കുള്ള സാമ്പത്തിക സഹായം, ഡിജിറ്റൽ സംവിധാനങ്ങൾ ദുരുപയോഗം ചെയ്തുള്ള പുതിയ സാമ്പത്തിക തട്ടിപ്പുകൾ എന്നിവയെ ചെറുക്കാൻ അബുദാബി പ്രഖ്യാപനം ശക്തമായ മാർഗ്ഗരേഖ നൽകുന്നുവെന്ന് യുഎൻ ഉദ്യോഗസ്ഥർ വ്യക്തമാക്കി.
ആർട്ടിഫിഷ്യൽ ഇന്റലിജൻസ് ഉൾപ്പെടെയുള്ള പുതിയ സാങ്കേതികവിദ്യകൾ ഉപയോഗിച്ചുള്ള കുറ്റകൃത്യങ്ങൾ തടയുന്നതിനാണ് അന്താരാഷ്ട്ര സമൂഹം മുൻഗണന നൽകുന്നതെന്ന് യുഎൻ ഓഫീസ് ഓൺ ഡ്രഗ്സ് ആൻഡ് ക്രൈം (UNODC) ജിസിസി മേഖലാ പ്രതിനിധി ജഡ്ജ് ഹാതിം അലി ചൂണ്ടിക്കാട്ടി. എമിറേറ്റ്സ് ന്യൂസ് ഏജൻസിക്ക് (വാം) നൽകിയ അഭിമുഖത്തിലാണ് അദ്ദേഹം പുതിയ തീരുമാനങ്ങൾ വിശദീകരിച്ചത്.
സാമ്പത്തിക തട്ടിപ്പുകൾ തടയുന്നതിൽ നിയമപാലകരെയും നീതിന്യായ വകുപ്പുകളെയും സഹായിക്കാൻ ജനങ്ങളെയും സാമൂഹിക കൂട്ടായ്മകളെയും സജ്ജമാക്കുക എന്നതാണ് പുതിയ പ്രഖ്യാപനത്തിന്റെ പ്രധാന ലക്ഷ്യങ്ങളിലൊന്ന്. സോഷ്യൽ മീഡിയ പ്ലാറ്റ്‌ഫോമുകളും ഡിജിറ്റൽ സങ്കേതങ്ങളും ഫലപ്രദമായി പ്രയോജനപ്പെടുത്തി പൊതുജനങ്ങളിൽ ജാഗ്രത വളർത്താനും കുറ്റകൃത്യങ്ങൾ വേഗത്തിൽ കണ്ടെത്താനും സാധിക്കും.
നിയമപാലക സംവിധാനങ്ങൾക്ക് പുറമെ പൊതുസമൂഹത്തെ കൂടി ഉൾപ്പെടുത്തിയുള്ള പ്രതിരോധ പ്രവർത്തനങ്ങൾ കുറ്റകൃത്യങ്ങൾ തടയുന്നതിൽ നിർണായക പങ്കുവഹിക്കുമെന്ന് ഹാതിം അലി വ്യക്തമാക്കി. അതിർത്തികൾ കടന്നുള്ള സൈബർ സാമ്പത്തിക തട്ടിപ്പുകൾ തടയാൻ ലോകരാജ്യങ്ങൾ തമ്മിലുള്ള വിവര കൈമാറ്റവും സഹകരണവും കൂടുതൽ ശക്തമാക്കും.
പ്രഖ്യാപനത്തിലെ നിർദ്ദേശങ്ങൾ ഫലപ്രദമായി നടപ്പിലാക്കുന്നതിനായി ‘പ്ലെഡ്ജ്4ജസ്റ്റിസ്’ (Pledge4Justice) എന്ന പ്രത്യേക പ്ലാറ്റ്‌ഫോമിനും രൂപം നൽകിയിട്ടുണ്ട്. ഇതിലേക്ക് ആദ്യ സംഭാവനയായി 5 ദശലക്ഷം യുഎസ് ഡോളർ (ഏകദേശം 50 ലക്ഷം ഡോളർ) യുഎഇ പ്രഖ്യാപിച്ചു. 2026 മുതൽ 2031 വരെയുള്ള അഞ്ച് വർഷങ്ങളിൽ പ്രതിവർഷം 10 ലക്ഷം ഡോളർ വീതമാണ് ഈ ഫണ്ടിലേക്ക് യുഎഇ നൽകുക. വിവിധ രാജ്യങ്ങളിലെ നീതിന്യായ സംവിധാനങ്ങൾ ആധുനികവൽക്കരിക്കാനും അന്വേഷണ ഏജൻസികളുടെ സാങ്കേതിക ശേഷി വർദ്ധിപ്പിക്കാനും ഈ തുക വിനിയോഗിക്കും.
അഞ്ച് വർഷത്തിലൊരിക്കൽ ചേരുന്ന യുഎൻ ക്രൈം കോൺഗ്രസിന്റെ അബുദാബി സമ്മേളനത്തിൽ അംഗരാജ്യങ്ങളിലെ നീതിന്യായ മന്ത്രിമാർ, അറ്റോർണി ജനറൽമാർ, പോലീസ് മേധാവികൾ, അന്താരാഷ്ട്ര നിയമ വിദഗ്ദ്ധർ എന്നിവർ പങ്കെടുത്തു. കോൺഗ്രസ് അംഗീകരിച്ച അബുദാബി പ്രഖ്യാപനം തുടർനടപടികൾക്കായി വിയന്നയിലെ യുഎൻ കമ്മീഷൻ ഓൺ ക്രൈം പ്രിവൻഷൻ ആൻഡ് ക്രിമിനൽ ജസ്റ്റിസിനും (CCPCJ) ന്യൂയോർക്കിലെ യുഎൻ പൊതുസഭയ്ക്കും സമർപ്പിക്കും.
