മസ്‌കത്ത്: വാദി അദായി-ആമിറാത്ത് റോഡ് മേഖലയിൽ മലഞ്ചെരിവിൽ നിന്ന് പാറക്കഷണങ്ങൾ വീണതിനെ തുടർന്ന് ഗതാഗതം തടസ്സപ്പെട്ടു. ശനിയാഴ്ചയാണ് സംഭവം ഉണ്ടായത്.
സംഭവത്തെക്കുറിച്ച് ദേശീയ അടിയന്തര മാനേജ്മെന്റ് കമ്മിറ്റി (എൻ.സി.ഇ.എം) അറിയിച്ചു. സുരക്ഷാ മുൻകരുതലിന്റെ ഭാഗമായി വാഹന ഗതാഗതം രണ്ടുലൈനുകളിലൂടെ തിരിച്ചുവിട്ടിട്ടുണ്ട്.
മലയുടെ ഒരുഭാഗത്ത് നിന്ന് പാറക്കഷണങ്ങൾ റോഡിന്റെ വിവിധ ഭാഗങ്ങളിലേക്ക് പതിച്ചതോടെ യാത്ര തടസ്സപ്പെട്ടു. സംഭവത്തിൽ ആർക്കും പരിക്കേറ്റതായി റിപ്പോർട്ടില്ലെന്ന് അധികൃതർ വ്യക്തമാക്കി.
പ്രത്യേക ദൗത്യസംഘങ്ങൾ സ്ഥലത്തെത്തി പാറക്കഷണങ്ങൾ നീക്കം ചെയ്യുന്ന പ്രവർത്തനങ്ങൾ തുടരുകയാണ്. ഗതാഗതം സാധാരണ നിലയിലാക്കുന്നതിനുള്ള നടപടികൾ വേഗത്തിലാക്കിയിട്ടുണ്ടെന്നും അധികൃതർ അറിയിച്ചു.
