മനാമ: സുരക്ഷാ സാഹചര്യങ്ങൾ കണക്കിലെടുത്ത് ബഹ്റൈനിൽ ഡ്രോണുകളുടെ ഉപയോഗത്തിന് സമ്പൂർണ നിരോധനം ഏർപ്പെടുത്തിയതായി ആഭ്യന്തര മന്ത്രാലയം അറിയിച്ചു. അടുത്ത അറിയിപ്പ് ഉണ്ടാകുന്നത് വരെ നിരോധനം തുടരുമെന്നും അധികൃതർ വ്യക്തമാക്കി.
വ്യക്തിപരമായതോ വാണിജ്യപരമായതോ ആയ ഏത് ആവശ്യത്തിനും ഡ്രോണുകൾ പറത്തുന്നത് കർശനമായി വിലക്കിയിട്ടുണ്ട്. നിരോധനം ലംഘിക്കുന്നവർക്ക് കടുത്ത നിയമനടപടികൾ നേരിടേണ്ടിവരും.
പ്രാദേശിക സുരക്ഷാ വെല്ലുവിളികളും ഇറാനുമായി ബന്ധപ്പെട്ട സംഘർഷാവസ്ഥയും പരിഗണിച്ചാണ് ഈ നടപടി. രാജ്യത്തിന്റെ സുരക്ഷ ഉറപ്പാക്കുന്നതിനും സിവിൽ ഡിഫൻസ് നടപടികൾ ശക്തിപ്പെടുത്തുന്നതിനുമാണ് മുൻഗണന നൽകുന്നതെന്ന് മന്ത്രാലയം അറിയിച്ചു.
നിയമലംഘനം നടത്തുന്ന ഡ്രോണുകൾ സുരക്ഷാസേന തടയുകയും ആവശ്യമായാൽ നശിപ്പിക്കുകയും ചെയ്യുമെന്ന് മുന്നറിയിപ്പുണ്ട്. പൊതുജനങ്ങളുടെ സുരക്ഷ ഉറപ്പാക്കുന്നതിനായി സർക്കാർ നിർദ്ദേശങ്ങൾ കർശനമായി പാലിക്കണമെന്നും അധികൃതർ അഭ്യർത്ഥിച്ചു.
