ദുബൈ: കഠിനമായ വർക്കൗട്ടുകൾക്ക് മാത്രം പരിചിതമായ ജിമ്മുകൾ ഇനി വിശ്രമത്തിനും ഉറക്കത്തിനും വഴിയൊരുക്കുന്നു. യു.എ.ഇയിലെ പ്രമുഖ ഫിറ്റ്നസ് ശൃംഖലയായ ജിംനേഷൻ ‘നാപ് ടൈം’ എന്ന പേരിൽ മിഡിൽ ഈസ്റ്റിലെ ആദ്യ സ്ലീപ്പ് ക്ലാസ് ആരംഭിച്ചു.
നിത്യജീവിതത്തിലെ തിരക്കുകൾ കാരണം ഉറക്കക്കുറവ് അനുഭവിക്കുന്നവർക്കായി രൂപകൽപ്പന ചെയ്ത ഈ ക്ലാസ്, ശരീരവും മനസ്സും സമഗ്രമായി വിശ്രമത്തിലേക്ക് നയിക്കുകയാണ് ലക്ഷ്യമിടുന്നത്. കോച്ച് ഡെസ്മണ്ട് വോങ് വിശദീകരിച്ചതനുസരിച്ച് നാല് ഘട്ടങ്ങളാണ് ക്ലാസിന്റെ പ്രത്യേകത.
ആദ്യഘട്ടത്തിൽ യോഗാധിഷ്ഠിത സ്ട്രെച്ചിങ്ങിലൂടെ പേശികളുടെ വലിമുറുക്കം കുറയ്ക്കുന്നു. തുടർന്ന് ശ്വസന വ്യായാമങ്ങൾ വഴി ഹൃദയമിടിപ്പ് കുറയ്ക്കുകയും സമ്മർദ്ദം നിയന്ത്രിക്കുകയും ചെയ്യുന്നു. മൂന്നാം ഘട്ടത്തിൽ ഹാൻഡ്പാൻ സംഗീതത്തോടൊപ്പം ധ്യാനം, അവസാനമായി കിടക്കകളും ഐ-മാസ്കുകളും ഉപയോഗിച്ച് ശാന്തമായ ഉറക്കം ഉൾപ്പെടുത്തിയിരിക്കുന്നു.
ജിംനേഷൻ സി.എം.ഒ റോറി മക് എന്റീയുടെ വാക്കുകൾ പ്രകാരം, ദുബൈ പോലുള്ള അതിവേഗ നഗരജീവിതത്തിൽ മനസ്സിനെ ശാന്തമാക്കാൻ ആളുകൾക്ക് പ്രയാസമാണ്. അതിനാൽ തന്നെ ഈ ക്ലാസ് മാനസികാരോഗ്യത്തിനും ഉൽപ്പാദനക്ഷമതയ്ക്കും സഹായകരമാകും.
ഈ പദ്ധതി ഡോ. ഗുർവീൻ റേഞ്ചറുടെ സഹകരണത്തോടെയാണ് വികസിപ്പിച്ചത്. ശരിയായ ഉറക്കം പേശികളുടെ വളർച്ചയ്ക്കും ഹോർമോൺ ബാലൻസിനും ഓർമ്മശക്തി വർദ്ധിപ്പിക്കാനും നിർണായകമാണെന്ന് വിദഗ്ധർ ചൂണ്ടിക്കാട്ടുന്നു.
ജിമ്മിൽ എത്താൻ കഴിയാത്തവർക്ക് വീട്ടിലും ലഘുവായ സ്ട്രെച്ചിംഗ്, ശ്വാസ വ്യായാമങ്ങൾ, മൊബൈൽ ഫോണുകൾ ഒഴിവാക്കിയ ശാന്തമായ അന്തരീക്ഷം എന്നിവ ഉപയോഗിച്ച് സമാനമായ വിശ്രമാനുഭവം നേടാമെന്നും വിദഗ്ധർ നിർദേശിക്കുന്നു.
