ആർട്ടിഫിഷ്യൽ ഇന്റലിജൻസ്, സൈബർ സുരക്ഷ, എൻജിനീയറിങ് മേഖലകളിൽ യുഎഇ പൗരന്മാർക്ക് മുൻഗണന; യോഗ്യരായവർക്ക് നേരിട്ട് ഇന്റർവ്യൂ
ദുബായ്, സെപ്റ്റംബർ 28, 2026 : ദുബായിലെ ഗതാഗത, പശ്ചാത്തല വികസന മേഖലകളിൽ സ്വദേശി സാന്നിധ്യം ശക്തമാക്കുന്നതിനായി 195-ലധികം പുതിയ തൊഴിലവസരങ്ങളുമായി റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ). തിങ്കളാഴ്ച ആരംഭിച്ച ‘റൂയ കരിയേഴ്സ് യുഎഇ 2026’ തൊഴിൽമേളയിലാണ് ആർടിഎ പുതിയ റിക്രൂട്ട്മെന്റ് ഡ്രൈവിന് തുടക്കമിട്ടത്.
സെപ്റ്റംബർ 30 വരെ നീളുന്ന മേളയിൽ ആർട്ടിഫിഷ്യൽ ഇന്റലിജൻസ് (AI), സൈബർ സുരക്ഷ, എൻജിനീയറിങ്, ഫ്ലെക്സിബിൾ ഇൻസ്പെക്ഷൻ, ഇന്റേണൽ ഓഡിറ്റ് എന്നീ അഞ്ച് പ്രധാന വിഭാഗങ്ങളിലാണ് ആർടിഎ നിയമനം നടത്തുന്നത്. സാങ്കേതിക മുന്നേറ്റത്തിനും ഡിജിറ്റൽ സമ്പദ്വ്യവസ്ഥയ്ക്കും മുൻഗണന നൽകുന്ന ദുബായ് സർക്കാരിന്റെ നയങ്ങൾക്ക് കരുത്തുപകരുന്നതാണ് ഈ നീക്കം.
ഭാവി പദ്ധതികൾ വിജയകരമായി നയിക്കാൻ പ്രാപ്തിയുള്ള യുഎഇ പൗരന്മാരെ കണ്ടെത്തുകയാണ് ലക്ഷ്യമെന്ന് ആർടിഎ കോർപ്പറേറ്റ് അഡ്മിനിസ്ട്രേറ്റീവ് സപ്പോർട്ട് സർവീസസ് വിഭാഗം ഹ്യൂമൻ റിസോഴ്സസ് ആൻഡ് ഡെവലപ്മെന്റ് എക്സിക്യൂട്ടീവ് ഡയറക്ടർ അഥാരി മുഹമ്മദ് വ്യക്തമാക്കി. സുസ്ഥിര പശ്ചാത്തല സൗകര്യ വികസനത്തിന് ആവശ്യമായ എൻജിനീയർമാർ, ഡാറ്റാ സയൻസ്, സൈബർ സെക്യൂരിറ്റി വിദഗ്ധർ എന്നിവർക്കാണ് ഇത്തവണ കൂടുതൽ പ്രാധാന്യം നൽകുന്നതെന്നും അവർ പറഞ്ഞു.
തൊഴിലന്വേഷകർക്ക് നടപടിക്രമങ്ങൾ വേഗത്തിലാക്കാൻ ഡിജിറ്റൽ സംവിധാനങ്ങളാണ് ആർടിഎ പവലിയനിൽ ഒരുക്കിയിരിക്കുന്നത്. ഉദ്യോഗാർഥികൾക്ക് പവലിയനിലെത്തി ഡിജിറ്റലായി രജിസ്റ്റർ ചെയ്യാം. തുടർന്ന് അവരുടെ യോഗ്യതകൾക്കനുസരിച്ചുള്ള തസ്തികകളിലേക്ക് പ്രൊഫൈൽ പരിശോധിക്കുകയും നിശ്ചിത മാനദണ്ഡങ്ങൾ പാലിക്കുന്നവർക്ക് പവലിയനിൽ വെച്ചുതന്നെ നേരിട്ട് ഇന്റർവ്യൂ നടത്തുകയും ചെയ്യും.
വ്യക്തിഗത അഭിമുഖങ്ങൾക്കായി പ്രത്യേക കാബിനുകളും അതോറിറ്റിയുടെ പ്രധാന പ്രൊജക്റ്റുകളും കരിയർ സാധ്യതകളും വിശദീകരിക്കുന്ന മൂന്ന് ഇന്ററാക്ടീവ് സോണുകളും മേളയിലുണ്ട്. ബിരുദധാരികളും സാങ്കേതിക രംഗത്തെ പരിചയസമ്പന്നരുമായ നിരവധി സ്വദേശി ഉദ്യോഗാർഥികളാണ് ആദ്യ ദിനത്തിൽ ആർടിഎ സ്റ്റാളിൽ എത്തിയത്. ഗതാഗത സംവിധാനങ്ങളുടെ ആധുനികവൽക്കരണത്തിലും സ്മാർട്ട് മൊബിലിറ്റി പദ്ധതികളിലും നിർണായക പങ്കുവഹിക്കാൻ തദ്ദേശീയ പ്രതിഭകളെ സജ്ജമാക്കുകയാണ് അതോറിറ്റി.
