സ്കൈ ന്യൂസ് അറേബ്യയുമായി സഹകരിച്ച് ഹൗസ് ഓഫ് വിസ്ഡത്തിൽ സംഘടിപ്പിച്ച പരിശീലനത്തിൽ കൃത്രിമബുദ്ധിയുടെ ഉപയോഗവും തെറ്റായ വിവരങ്ങൾ തടയാനുള്ള വഴികളും ചർച്ചയായി.
ഷാർജ — മാധ്യമപ്രവർത്തന രംഗത്തെ ആധുനിക സാങ്കേതികവിദ്യകൾ, ഫാക്ട് ചെക്കിങ് രീതികൾ, വാർത്താ അവതരണം എന്നിവയിൽ മാധ്യമപ്രവർത്തകർക്ക് പ്രായോഗിക പരിശീലനം നൽകി ഷാർജ പ്രസ് ക്ലബ്ബ് (എസ്പിസി).
ഷാർജ ഗവൺമെന്റ് മീഡിയ ബ്യൂറോയുടെ (എസ്ജിഎംബി) കീഴിലുള്ള ഷാർജ പ്രസ് ക്ലബ്ബ്, പ്രമുഖ അന്താരാഷ്ട്ര വാർത്താ ശൃംഖലയായ സ്കൈ ന്യൂസ് അറേബ്യയുമായി ചേർന്നാണ് ഹൗസ് ഓഫ് വിസ്ഡത്തിൽ പ്രത്യേക ശില്പശാല സംഘടിപ്പിച്ചത്. ‘ആധുനിക മാധ്യമപ്രവർത്തനം: ഫാക്ട് ചെക്കിങ്, സ്റ്റോറി ടെല്ലിങ്, ആർട്ടിഫിഷ്യൽ ഇന്റലിജൻസ്’ എന്ന പ്രമേയത്തിലായിരുന്നു പരിശീലനം.
വിവരശേഖരണം, കൃത്യത ഉറപ്പാക്കൽ, ബ്രേക്കിങ് ന്യൂസ് കൈകാര്യം ചെയ്യൽ, ന്യൂസ് റൂമുകളിൽ ആർട്ടിഫിഷ്യൽ ഇന്റലിജൻസ് (എഐ) പ്രയോജനപ്പെടുത്തൽ തുടങ്ങിയ വിഷയങ്ങൾ ശില്പശാല സമഗ്രമായി ചർച്ച ചെയ്തു. വ്യാജ വാർത്തകളും സമൂഹമാധ്യമങ്ങളിലൂടെ പ്രചരിക്കുന്ന തെറ്റിദ്ധരിപ്പിക്കുന്ന ഉള്ളടക്കങ്ങളും തിരിച്ചറിയാൻ അത്യാധുനിക ഡിജിറ്റൽ പരിശോധനാ മാർഗങ്ങൾ ഉപയോഗിക്കേണ്ടതിന്റെ പ്രാധാന്യം പരിശീലകർ വിശദീകരിച്ചു.
സാങ്കേതിക മാറ്റങ്ങൾക്കനുസരിച്ച് മാധ്യമപ്രവർത്തകർ പ്രൊഫഷണൽ മികവ് വർധിപ്പിക്കണമെന്ന് ഷാർജ ഗവൺമെന്റ് മീഡിയ ബ്യൂറോ ഡയറക്ടർ ജനറൽ താരിഖ് സഈദ് അല്ലാ വ്യക്തമാക്കി.
“മാധ്യമരംഗത്തുണ്ടാകുന്ന ദ്രുതഗതിയിലുള്ള മാറ്റങ്ങൾ മാധ്യമപ്രവർത്തകർക്ക് പുതിയ ഉത്തരവാദിത്തങ്ങളാണ് നൽകുന്നത്. വിവിധ സ്രോതസ്സുകളിൽ നിന്ന് ഒഴുകിയെത്തുന്ന വിവരങ്ങൾ കൃത്യമായി അപഗ്രഥിക്കാനും, വ്യക്തമായ പ്രൊഫഷണൽ മാനദണ്ഡങ്ങൾ പാലിച്ച് എഐ അടക്കമുള്ള പുതിയ സാങ്കേതികവിദ്യകൾ ജോലിയിൽ ഉൾപ്പെടുത്താനും മാധ്യമപ്രവർത്തകർക്ക് ഉയർന്ന ഗവേഷണ-എഡിറ്റോറിയൽ വൈദഗ്ധ്യം ആവശ്യമാണ്,” അല്ലാ ചൂണ്ടിക്കാട്ടി.
വാർത്തകളുടെ കൃത്യത, സുതാര്യത, വിശ്വസനീയത എന്നിവയിൽ വിട്ടുവീഴ്ച ചെയ്യാതെ പുതിയ സാങ്കേതികവിദ്യകളെ എങ്ങനെ സ്വീകരിക്കാമെന്ന് ശില്പശാല വിശദീകരിച്ചു. തലക്കെട്ടുകൾ നൽകുന്നതിലും വിഷയങ്ങൾ വായനക്കാരിലേക്ക് കൃത്യമായി എത്തിക്കുന്നതിലും പാലിക്കേണ്ട എഡിറ്റോറിയൽ രീതികൾ പ്രായോഗിക സെഷനുകളിൽ പരിശീലിപ്പിച്ചു.
വിവരങ്ങൾ പരിമിതമായ ബ്രേക്കിങ് ന്യൂസ് സാഹചര്യങ്ങളിൽ അടിയന്തരമായി തീരുമാനങ്ങൾ എടുക്കേണ്ട രീതികളും ശില്പശാലയിൽ ചർച്ചയായി. എഐ ടൂളുകൾ ഉപയോഗിച്ച് വാർത്താ പശ്ചാത്തലങ്ങൾ കണ്ടെത്താനും വിവരങ്ങൾ ചിട്ടപ്പെടുത്താനും സാധിക്കുമെങ്കിലും, അന്തിമ എഡിറ്റോറിയൽ ഉത്തരവാദിത്തം മാധ്യമപ്രവർത്തകരിൽ തന്നെ നിക്ഷിപ്തമാണെന്ന് പരിശീലകർ ഓർമ്മിപ്പിച്ചു.
‘വാർത്തകളിൽ നിന്ന് സമഗ്ര റിപ്പോർട്ടിലേക്ക്’ (From News to Stories) എന്ന പേരിൽ നടന്ന പ്രായോഗിക പരിശീലനത്തോടെയാണ് പരിപാടി സമാപിച്ചത്. ഇതിൽ പങ്കെടുത്ത മാധ്യമപ്രവർത്തകർ ലഭിച്ച വിവരങ്ങൾ പരിശോധിച്ചുറപ്പിച്ച് നിശ്ചിത സമയപരിധിക്കുള്ളിൽ വാർത്തകൾ തയ്യാറാക്കി. ഷാർജയിലെ മാധ്യമപ്രവർത്തകരുടെ പ്രൊഫഷണൽ നിലവാരം ഉയർത്തുന്നതിനായി എസ്പിസി നടപ്പാക്കുന്ന വിപുലമായ പദ്ധതികളുടെ ഭാഗമായാണ് ഈ പരിശീലനം സംഘടിപ്പിച്ചത്.
