കുവൈത്ത് സിറ്റി: രാജ്യത്ത് സ്കൂൾ പഠനം ഓൺലൈനായി തുടരുമെന്ന് വിദ്യാഭ്യാസ മന്ത്രാലയം വ്യക്തമാക്കി. സ്കൂളുകൾ ഉടൻ തുറക്കും എന്ന രീതിയിലുള്ള റിപ്പോർട്ടുകളും പ്രചാരണങ്ങളും മന്ത്രാലയം തള്ളി.
ഇനിയൊരു ഔദ്യോഗിക അറിയിപ്പ് ഉണ്ടാകുന്നതുവരെ പഠനം ഇ-ലേണിംഗ് രീതിയിലാണ് തുടരുക. നേരിട്ടുള്ള ക്ലാസ് പഠനത്തിലേക്ക് മടങ്ങുന്നതുമായി ബന്ധപ്പെട്ടോ നിലവിലെ സംവിധാനത്തിൽ മാറ്റം വരുത്തുന്നതുമായി ബന്ധപ്പെട്ടോ യാതൊരു പുതിയ തീരുമാനവും എടുത്തിട്ടില്ലെന്നും മന്ത്രാലയം അറിയിച്ചു.
വിദ്യാഭ്യാസവുമായി ബന്ധപ്പെട്ട വിവരങ്ങളിൽ കൃത്യത നിർണായകമാണെന്നും, ഔദ്യോഗിക ഉറവിടങ്ങളിൽ നിന്നുള്ള വിവരങ്ങൾ മാത്രമേ വിശ്വസിക്കാവൂ എന്നും പൊതുജനങ്ങളോട് അഭ്യർത്ഥിച്ചു. സ്ഥിരീകരിക്കാത്ത റിപ്പോർട്ടുകൾ പ്രചരിപ്പിക്കുന്നത് ഒഴിവാക്കണമെന്നും മുന്നറിയിപ്പ് നൽകി.
യു.എസ്,ഇസ്രായേൽ-ഇറാൻ സംഘർഷം ആരംഭിച്ചതിനെ തുടർന്ന് ഫെബ്രുവരി 28ന് ശേഷം മേഖലയിലുണ്ടായ പ്രത്യേക സാഹചര്യങ്ങളാൽ സ്കൂൾ പഠനം ഓൺലൈൻ സംവിധാനത്തിലേക്ക് മാറ്റിയിരുന്നു. സംഘർഷം ശമിക്കുന്നതിനനുസരിച്ച് പഠനം പഴയ രീതിയിലേക്ക് മടങ്ങുമെന്ന റിപ്പോർട്ടുകൾ പുറത്തുവന്നിരുന്നുവെങ്കിലും, നിലവിൽ അത്തരം തീരുമാനങ്ങളൊന്നും ഉണ്ടായിട്ടില്ലെന്ന് മന്ത്രാലയം വീണ്ടും വ്യക്തമാക്കി.
