അബുദാബി: ആഗോള എണ്ണ വിപണിയിൽ വലിയ പ്രതികരണങ്ങൾക്ക് വഴിവയ്ക്കുന്ന നിർണായക തീരുമാനമായി, യു.എ.ഇ ഇന്ന് Organization of the Petroleum Exporting Countries (ഒപെക്)യും ഒപെക് പ്ലസ് കൂട്ടായ്മയും വിട്ടുപോകുന്നതായി പ്രഖ്യാപിച്ചു. 2026 മേയ് 1 മുതൽ തീരുമാനം പ്രാബല്യത്തിൽ വരും.
രാജ്യത്തിന്റെ ദീർഘകാല സാമ്പത്തിക-തന്ത്രപരമായ ലക്ഷ്യങ്ങൾ, ഊർജ മേഖലയിൽ നടക്കുന്ന മാറ്റങ്ങൾ, ആഭ്യന്തര ഊർജ ഉൽപ്പാദനത്തിലേക്കുള്ള വേഗത്തിലുള്ള നിക്ഷേപങ്ങൾ എന്നിവ പരിഗണിച്ചാണ് ഈ തീരുമാനം എടുത്തതെന്ന് അധികൃതർ വ്യക്തമാക്കി. ആഗോള ഊർജ വിപണിയിൽ ഉത്തരവാദിത്വപരവും വിശ്വസനീയവുമായ പങ്കാളിത്തം തുടരുമെന്നും യു.എ.ഇ ഉറപ്പുനൽകി.
ദേശീയ താൽപര്യത്തിന് മുൻഗണന
യു.എ.ഇയുടെ ഉൽപ്പാദന നയം, നിലവിലെ ശേഷി, ഭാവി സാധ്യതകൾ എന്നിവ സമഗ്രമായി വിലയിരുത്തിയ ശേഷമാണ് ഈ തീരുമാനം. വിപണിയുടെ അടിയന്തര ആവശ്യങ്ങൾ നിറവേറ്റുന്നതിൽ കൂടുതൽ ഫലപ്രദമായി സംഭാവന ചെയ്യുന്നതിനും ഇത് സഹായകരമാകുമെന്ന് സർക്കാർ വിലയിരുത്തുന്നു.
പുതിയ ഊർജ കാലഘട്ടത്തിലെ ഉത്തരവാദിത്വം
അറേബ്യൻ ഗൾഫ് മേഖലയിലും ഹോർമുസ് കടലിടുക്കിലും നിലനിൽക്കുന്ന സംഘർഷങ്ങളും വിതരണത്തിലെ അസ്ഥിരതകളും കുറച്ചുകാലം സ്വാധീനം ചെലുത്തുന്നുണ്ടെങ്കിലും, ദീർഘകാലത്ത് ആഗോള ഊർജ ആവശ്യകത ഉയർന്ന നിലയിൽ തുടരുമെന്നാണ് വിലയിരുത്തൽ. സ്ഥിരതയുള്ള ആഗോള ഊർജ സംവിധാനത്തിന് സൗകര്യപ്രദവും വിശ്വസനീയവും ചെലവുകുറഞ്ഞതുമായ വിതരണമാണ് ആവശ്യമെന്നും യു.എ.ഇ വ്യക്തമാക്കി.
ചരിത്രപരമായ സഹകരണം
1967ൽ അബുദാബി മുഖേനയാണ് യു.എ.ഇ ഒപെക്കിൽ അംഗമായത്. 1971ൽ യു.എ.ഇ രൂപീകരണത്തിന് ശേഷവും അംഗത്വം തുടരുകയും ആഗോള എണ്ണ വിപണിയുടെ സ്ഥിരതയ്ക്കും ഉൽപ്പാദക രാജ്യങ്ങൾ തമ്മിലുള്ള സഹകരണത്തിനും സജീവ പങ്കുവഹിക്കുകയും ചെയ്തു.
ഭാവി നിലപാട്
ഒപെക്കിൽ നിന്ന് പിന്മാറിയ ശേഷവും വിപണി ആവശ്യങ്ങൾക്കും സാഹചര്യങ്ങൾക്കും അനുസൃതമായി, ഘട്ടംഘട്ടമായി എണ്ണ ഉൽപ്പാദനം വർധിപ്പിച്ച് ഉത്തരവാദിത്വപരമായി പ്രവർത്തിക്കുമെന്ന് യു.എ.ഇ അറിയിച്ചു.
ലോകത്തിലെ ഏറ്റവും ചെലവുകുറഞ്ഞതും കുറഞ്ഞ കാർബൺ പുറന്തള്ളലുള്ളതുമായ എണ്ണ ഉൽപ്പാദകരിൽ ഒരാളായ യു.എ.ഇ, ആഗോള വളർച്ചക്കും കാർബൺ കുറയ്ക്കലിനും പിന്തുണ നൽകുന്നതിൽ തുടർന്നും നിർണായക പങ്ക് വഹിക്കുമെന്നും വ്യക്തമാക്കി.
