അജ്മാൻ: യു.എ.ഇയിലെ അതിവേഗം വളരുന്ന നഗരങ്ങളിലൊന്നായി മാറിയ അജ്മാൻ എമിറേറ്റിന്റെ വികസന ചരിത്രത്തിൽ നിർണായക പങ്കുവഹിച്ച അജ്മാൻ നഗരസഭ 58-ാം വാർഷികം ആഘോഷിക്കുന്നു. 1968-ൽ പ്രവർത്തനം ആരംഭിച്ച നഗരസഭ, എമിറേറ്റിന്റെ ജനസാന്ദ്രതയ്ക്കും വികസന ആവശ്യങ്ങൾക്കും അനുസൃതമായി വിവിധ പദ്ധതികൾ നടപ്പാക്കി ശ്രദ്ധേയ നേട്ടങ്ങളാണ് കൈവരിച്ചിരിക്കുന്നത്.
അജ്മാനെ രാജ്യത്തെ ഏറ്റവും വേഗത്തിൽ വളരുന്ന നഗരങ്ങളുടെ പട്ടികയിൽ ഉൾപ്പെടുത്തുന്നതിൽ ഭരണാധികാരികളുടെ ദീർഘവീക്ഷണവും സർക്കാർ സംവിധാനങ്ങളുടെ ഏകോപിത പ്രവർത്തനവും നിർണായകമായി. പ്രത്യേകിച്ച് ദുബൈയിലെ താമസ ചെലവുകൾ ഉയർന്നതോടെ കൂടുതൽ ആളുകൾ വടക്കൻ എമിറേറ്റായ അജ്മാനിലേക്ക് താമസം മാറിയ സാഹചര്യത്തിൽ, വർധിച്ച ജനസംഖ്യയുടെ ആവശ്യങ്ങൾ നിറവേറ്റുന്നതിനായി നഗരസഭയും മറ്റ് സർക്കാർ വകുപ്പുകളും വിപുലമായ അടിസ്ഥാന സൗകര്യ വികസന പദ്ധതികൾ നടപ്പാക്കി.
ഈ നീക്കങ്ങളുടെ ഫലമായി അജ്മാനിലെ റിയൽ എസ്റ്റേറ്റ് മേഖലയിൽ കഴിഞ്ഞ വർഷങ്ങളിൽ വലിയ വളർച്ചയാണ് രേഖപ്പെടുത്തിയത്. താമസ സൗകര്യങ്ങൾ, റോഡ് വികസനം, പൊതുസേവനങ്ങൾ, ഗതാഗത സംവിധാനങ്ങൾ എന്നിവയുടെ വിപുലീകരണം നഗരത്തിന്റെ ആകർഷണീയത വർധിപ്പിച്ചു.
പൊതുജനങ്ങൾക്ക് മികച്ച സേവനങ്ങൾ ഉറപ്പാക്കുക, വിവിധ മേഖലകളിലേക്ക് ദേശീയ മാനവവിഭവശേഷിയെ ആകർഷിക്കുക, പരിസ്ഥിതി സംരക്ഷണത്തിനും പൊതുജനാരോഗ്യത്തിനും മുൻഗണന നൽകുക തുടങ്ങിയ മേഖലകളിൽ നഗരസഭ സ്വീകരിച്ച നയങ്ങൾ ശ്രദ്ധേയമാണ്. ഭക്ഷ്യസുരക്ഷയും ആരോഗ്യ മേഖലയുമായി ബന്ധപ്പെട്ട നിയന്ത്രണ സംവിധാനങ്ങളിൽ ആധുനിക സാങ്കേതികവിദ്യകൾ പ്രയോജനപ്പെടുത്തുകയും യോഗ്യരായ ജീവനക്കാരെ നിയമിക്കുകയും ചെയ്തതിലൂടെ നഗരസഭ ദേശീയ-അന്തർദേശീയ തലങ്ങളിൽ നിരവധി പുരസ്കാരങ്ങൾ സ്വന്തമാക്കിയിട്ടുണ്ട്.
സമഗ്ര നഗര പദ്ധതി വികസനത്തിന് വഴികാട്ടി
അജ്മാൻ നഗരസഭയുടെ ആസൂത്രണ വകുപ്പിന്റെ പ്രധാന നേട്ടങ്ങളിലൊന്നാണ് സമഗ്ര നഗര പദ്ധതിയുടെ പൂർത്തീകരണം. നഗരവികസനവും ഭാവി ആവശ്യങ്ങളും മുൻകൂട്ടി കണ്ട് രൂപപ്പെടുത്തിയ ഈ പദ്ധതി, എമിറേറ്റിന്റെ വിവിധ ഭാഗങ്ങളിലേക്കുള്ള വികസന സാധ്യതകൾ കൂടുതൽ ശക്തമാക്കി.
മസ്ഫൂത്, മനാമ തുടങ്ങിയ അജ്മാനിലെ അകന്ന പ്രദേശങ്ങളിലും വികസന പ്രവർത്തനങ്ങൾ കാര്യക്ഷമമായി നടപ്പാക്കുന്നതിനുള്ള പദ്ധതികൾ രൂപപ്പെടുത്തുന്നതിൽ നഗരസഭ ചെയർമാൻ ശൈഖ് റാഷിദ് ബിൻ ഹുമൈദ് അൽ നുഐമിയുടെ നേതൃത്വത്തിന് നിർണായക പങ്കുണ്ടായി. ഗതാഗതം, വാർത്താവിനിമയം, റോഡ് ശൃംഖല വികസനം തുടങ്ങിയ മേഖലകൾക്ക് പ്രത്യേക പ്രാധാന്യം നൽകിയാണ് പദ്ധതികൾ നടപ്പാക്കിയത്.
എമിറേറ്റിലെ വിവിധ നഗരങ്ങളെയും ഗ്രാമപ്രദേശങ്ങളെയും ബന്ധിപ്പിക്കുന്ന റോഡ്-ഗതാഗത സംവിധാനങ്ങൾ ശക്തിപ്പെടുത്തിയതോടെ താമസക്കാരുടെയും നിക്ഷേപകരുടെയും വിശ്വാസം വർധിക്കുകയും അജ്മാന്റെ വികസനയാത്രയ്ക്ക് പുതിയ വേഗത ലഭിക്കുകയും ചെയ്തു.
