അജ്മാൻ: കനത്ത മഴയെ തുടർന്നുണ്ടാകുന്ന വെള്ളക്കെട്ട് പ്രശ്നങ്ങൾക്ക് ശാശ്വത പരിഹാരം കാണുന്നതിനായി 10.9 കോടി ദിർഹം ചെലവിൽ മഴവെള്ള ഡ്രെയിനേജ് ശൃംഖലകളും പമ്പിങ് സ്റ്റേഷനുകളും വികസിപ്പിക്കുന്ന വൻ പദ്ധതിയുമായി അജ്മാൻ നഗരസഭയും ആസൂത്രണ വകുപ്പും. എമിറേറ്റിലെ വിവിധ സുപ്രധാന മേഖലകളിലായി നടപ്പാക്കുന്ന പദ്ധതി അടിസ്ഥാന സൗകര്യങ്ങളുടെ സന്നദ്ധത വർധിപ്പിക്കുന്നതിനും ഡ്രെയിനേജ് സംവിധാനങ്ങളുടെ കാര്യക്ഷമത മെച്ചപ്പെടുത്തുന്നതിനുമാണ് ലക്ഷ്യമിടുന്നത്.
വെള്ളക്കെട്ട് കുറച്ച് താമസക്കാരുടെ ജീവിതനിലവാരം ഉയർത്താനുള്ള അജ്മാൻ ഭരണകൂടത്തിന്റെ ദീർഘകാല വികസന പദ്ധതികളുടെ ഭാഗമായാണ് പുതിയ പദ്ധതി നടപ്പാക്കുന്നത്. എമിറേറ്റിനെ കൂടുതൽ ആകർഷകവും ആധുനികവുമായ നഗരമാക്കി മാറ്റുകയെന്ന ലക്ഷ്യത്തോടെ തയ്യാറാക്കിയ അജ്മാൻ വിഷൻ 2030 പദ്ധതിയുമായും ഇത് ബന്ധപ്പെട്ടിരിക്കുന്നു.
ഇൻഫ്രാസ്ട്രക്ചർ ഡെവലപ്മെന്റ് സെക്ടർ എക്സിക്യൂട്ടീവ് ഡയറക്ടർ ഡോ. എഞ്ചിനീയർ മുഹമ്മദ് അഹമ്മദ് ബിൻ ഉമൈർ അൽ മുഹൈരി പറയുന്നതനുസരിച്ച്, അൽ സഫിയ, ഷെയ്ഖ് സായിദ് റോഡ്, സിറ്റി സെന്റർ എന്നിവ ഉൾപ്പെടെയുള്ള പ്രധാന മേഖലകളിലാണ് പദ്ധതികൾ നടപ്പാക്കുന്നത്. ഈ പ്രദേശങ്ങളിൽ പുതിയ പമ്പിങ് സ്റ്റേഷനുകളും സംയോജിത മഴവെള്ള ഡ്രെയിനേജ് ശൃംഖലകളും നിർമ്മിക്കും.
പദ്ധതി പൂർത്തിയാകുന്നതോടെ നിലവിലെ ഡ്രെയിനേജ് ശൃംഖലയുടെ ശേഷി ഗണ്യമായി വർധിക്കും. പ്രത്യേകിച്ച് കനത്ത മഴക്കാലങ്ങളിൽ വലിയ അളവിലുള്ള മഴവെള്ളം അതിവേഗം ഒഴുക്കിക്കളയാൻ കഴിയുന്ന സംവിധാനമാണ് ഒരുക്കുന്നത്. ഇതിലൂടെ റോഡുകളിലും താമസമേഖലകളിലും ഉണ്ടാകുന്ന വെള്ളക്കെട്ട് കുറയുകയും ഗതാഗതവും പൊതുജീവിതവും കൂടുതൽ സുഗമമാകുകയും ചെയ്യും.
അൽ സഫിയ മേഖലയിൽ പ്രത്യേക സ്റ്റോം വാട്ടർ ഡ്രെയിനേജ് സ്റ്റേഷൻ നിർമ്മിക്കുന്ന പദ്ധതിയും പുരോഗമിക്കുന്നതായി അധികൃതർ അറിയിച്ചു. 22.5 ദശലക്ഷം ദിർഹം ചെലവിൽ അജ്മാൻ ക്രീക്കിലേക്ക് ശേഖരിക്കുന്ന മഴവെള്ളം ഒഴുക്കിവിടുന്നതിനായി പുതിയ പമ്പിങ് സ്റ്റേഷനും പ്രധാന പൈപ്പ് ലൈനും സ്ഥാപിക്കും. ഏകദേശം അഞ്ച് കിലോമീറ്റർ നീളമുള്ള ഡ്രെയിനേജ് ശൃംഖലയാണ് പദ്ധതിയുടെ ഭാഗമായി നിർമ്മിക്കുന്നത്.
ഭാവിയിൽ കാലാവസ്ഥാ വ്യതിയാനങ്ങളുടെയും അതിശക്തമായ മഴയുടെയും ആഘാതം കുറയ്ക്കുന്നതിനും നഗരത്തിന്റെ അടിസ്ഥാന സൗകര്യങ്ങൾ കൂടുതൽ ശക്തിപ്പെടുത്തുന്നതിനുമുള്ള നിർണായക നീക്കമായാണ് ഈ പദ്ധതിയെ വിലയിരുത്തുന്നത്.
