അൽ ഐൻ: കായിക-വിനോദ സൗകര്യങ്ങൾ ഒരുമിപ്പിച്ച് അത്യാധുനിക രീതിയിൽ നിർമ്മിച്ച അൽ റീഫ് പാർക്ക് പൊതുജനങ്ങൾക്കായി തുറന്നു. അൽ ഐൻ നഗരസഭയുടെ മേൽനോട്ടത്തിൽ ഒരുക്കിയിരിക്കുന്ന പാർക്ക് നഗരത്തിലെ കുടുംബങ്ങൾക്കും കായിക പ്രേമികൾക്കും കുട്ടികൾക്കും ഒരുപോലെ ആകർഷകമായ പുതിയ പൊതുഇടമായി മാറുമെന്നാണ് പ്രതീക്ഷ.
അൽ റീഫ് മേഖലയിലെ അബൂ അസീറ ബിൻ അൽ ഹാരിത് സ്ട്രീറ്റിൽ 1,19,000 ചതുരശ്ര മീറ്റർ വിസ്തൃതിയിലാണ് പാർക്ക് നിർമ്മിച്ചിരിക്കുന്നത്. എല്ലാ പ്രായവിഭാഗങ്ങൾക്കും അനുയോജ്യമായ രീതിയിൽ കായിക, ആരോഗ്യ, വിനോദ, സാമൂഹിക സൗകര്യങ്ങൾ ഉൾപ്പെടുത്തിയാണ് പദ്ധതി രൂപകൽപ്പന ചെയ്തിരിക്കുന്നതെന്ന് അൽ ഐൻ നഗരസഭ പ്രോജക്ട് ഇംപ്ലിമെന്റേഷൻ ഡയറക്ടർ സ്വാലിഹ് അൽ അരിയാനി വ്യക്തമാക്കി.
ആരോഗ്യകരമായ ജീവിതശൈലി പ്രോത്സാഹിപ്പിക്കുക എന്ന ലക്ഷ്യത്തോടെ ഫുട്ബോൾ പിച്ച്, വോളിബോൾ കോർട്ട്, രണ്ട് മൾട്ടി പർപ്പസ് കോർട്ടുകൾ എന്നിവ ഉൾപ്പെടെ നാല് പ്രധാന കായിക കോർട്ടുകളാണ് പാർക്കിൽ സജ്ജമാക്കിയിരിക്കുന്നത്. കായിക പ്രവർത്തനങ്ങളിൽ താൽപര്യമുള്ള യുവാക്കൾക്കും കുട്ടികൾക്കും മികച്ച സൗകര്യങ്ങൾ ഇവിടെ ലഭ്യമാകും.
കുട്ടികൾക്കായി രണ്ട് പ്രത്യേക കളിസ്ഥലങ്ങളും വിവിധ പ്രായക്കാർക്ക് ഉപയോഗിക്കാവുന്ന ഏഴ് ഫിറ്റ്‌നസ് സോണുകളും പാർക്കിന്റെ ഭാഗമാണ്. കൂടാതെ മുതിർന്നവർക്കും കുട്ടികൾക്കുമായി പ്രത്യേകം സൈക്ലിങ് ട്രാക്കുകളും ഒരുക്കിയിട്ടുണ്ട്. 1.4 കിലോമീറ്റർ നീളമുള്ള വാക്കിങ് ട്രാക്ക് ആരോഗ്യപരിപാലനത്തിനും വിനോദ സഞ്ചാരത്തിനും അനുയോജ്യമായ സൗകര്യമായി മാറും.
സമൂഹകേന്ദ്രിത പ്രവർത്തനങ്ങൾക്ക് പ്രാധാന്യം നൽകുന്ന രീതിയിൽ കമ്മ്യൂണിറ്റി പരിപാടികൾ സംഘടിപ്പിക്കാനുള്ള തിയേറ്റർ, തണൽ വിരിച്ച വിശ്രമകേന്ദ്രങ്ങൾ, റിസപ്ഷൻ സെന്റർ, കഫേ, പ്രാർഥനാ മുറികൾ, ശൗചാലയങ്ങൾ തുടങ്ങിയ സൗകര്യങ്ങളും പാർക്കിൽ ഉൾപ്പെടുത്തിയിട്ടുണ്ട്.
കുടുംബങ്ങൾക്കും സുഹൃത്തുക്കൾക്കും ഒരുമിച്ച് സമയം ചെലവഴിക്കാനും സാമൂഹിക ഇടപെടലുകൾ നടത്താനും അനുയോജ്യമായ സുരക്ഷിതവും മനോഹരവുമായ അന്തരീക്ഷമാണ് അൽ റീഫ് പാർക്കിൽ ഒരുക്കിയിരിക്കുന്നതെന്ന് നഗരസഭ അധികൃതർ അറിയിച്ചു. അൽ ഐനിലെ പൊതുജനങ്ങൾക്ക് ആരോഗ്യകരവും സജീവവുമായ ജീവിതശൈലി പ്രോത്സാഹിപ്പിക്കുന്ന പുതിയ കേന്ദ്രമായി പാർക്ക് മാറുമെന്നാണ് വിലയിരുത്തൽ.
