ദുബൈ: ലോകത്തിലെ ഏറ്റവും വലിയ പുസ്തക വിൽപ്പന മേളയായ ‘ബിഗ് ബാഡ് വുൾഫ് (BBW) ബുക്സ്’ 2026 എഡിഷന് ദുബൈയിൽ ഭംഗിയേറിയ തുടക്കം. ദുബൈ സ്റ്റുഡിയോ സിറ്റിയിലെ സൗണ്ട് സ്റ്റേജ് പ്രദർശന കേന്ദ്രത്തിലാണ് ഫെബ്രുവരി 26 മുതൽ മാർച്ച് 8 വരെ നടക്കുന്ന 10 ദിവസത്തെ മേള അരങ്ങേറുന്നത്.
ഷാർജ ബുക്ക് അതോറിറ്റിയും ദുബൈ കൾച്ചർ & ആർട്സ് അതോറിറ്റിയുടെയും സഹകരിച്ചാണ് മേള സംഘടിപ്പിച്ചിരിക്കുന്നത്. ഒരു മില്യണിലധികം പുസ്തകങ്ങൾ ഒരൊറ്റ കുടക്കീഴിൽ ലഭ്യമാക്കുന്ന ഈ വൻ മേളയിൽ 95 ശതമാനം വരെ വിലക്കുറവും 2 ദിർഹം മുതൽ ആരംഭിക്കുന്ന വിലയും വായനാപ്രേമികൾക്കായി ഒരുക്കിയിട്ടുണ്ട്. പ്രവേശനം സൗജന്യമാണ്.
ഉദ്ഘാടന വേളയിൽ ബിഗ് ബാഡ് വുൾഫ് സ്ഥാപകൻ ആൻഡ്രൂ യാപ്, എല്ലാവർക്കും വായന സുലഭമാക്കുക, ഓരോ വ്യക്തിയുടെയും കൈയിൽ പുസ്തകം എത്തിക്കുക എന്നതാണ് മേളയുടെ ലക്ഷ്യമെന്ന് വ്യക്തമാക്കി. റമദാൻ മാസത്തിൽ നടക്കുന്ന മേള കുടുംബങ്ങൾക്കായി ഗുണപ്രദമായ സമയം ചെലവഴിക്കാനുള്ള വേദിയുമാകുമെന്ന് അദ്ദേഹം കൂട്ടിച്ചേർത്തു.
ഫിക്ഷൻ, നോൺ-ഫിക്ഷൻ, ബാലസാഹിത്യം, പാചകം, വിദ്യാഭ്യാസം, മാനേജ്മെന്റ്, വ്യക്തിത്വ വികസനം, കല, സംസ്കാരം തുടങ്ങി എല്ലാ സാഹിത്യശാഖകളിലെയും വൈവിധ്യമാർന്ന പുസ്തകങ്ങൾ ഇവിടെ ലഭ്യമാണ്. ലോകത്തിലെ വിവിധ രാജ്യങ്ങളിൽ നിന്നുള്ള ബെസ്റ്റ്സെല്ലറുകളും അപൂർവ ഗ്രന്ഥങ്ങളും തിരഞ്ഞെടുത്ത് സ്വന്തമാക്കാൻ സന്ദർശകർക്ക് അവസരമുണ്ട്.
ഈ വർഷത്തെ മേള “ബിയോണ്ട് ദ് നോയിസ്” എന്ന പ്രമേയത്തിലാണ് സംഘടിപ്പിച്ചിരിക്കുന്നത്. ഡിജിറ്റൽ തിരക്കുകളിൽ നിന്ന് വിട്ട് ശ്രദ്ധാപൂർവവും അർത്ഥപൂർണവുമായ വായനയിലേക്കുള്ള മടങ്ങിവരവാണ് ഈ ആശയം പ്രതിഫലിപ്പിക്കുന്നതെന്ന് സംഘാടകർ അറിയിച്ചു.
വിദ്യാർത്ഥികൾക്കും അധ്യാപകർക്കും സ്കൂൾ ഐഡി കാർഡ് കാണിക്കുമ്പോൾ എല്ലാ ഇംഗ്ലീഷ് പുസ്തകങ്ങൾക്കും 5 ശതമാനം അധിക വിലക്കുറവ് ലഭിക്കും. വീടുകളിലും സ്ഥാപനങ്ങളിലുമായി ലൈബ്രറികൾ ഒരുക്കുന്നതിനും വിദ്യാഭ്യാസ സ്ഥാപനങ്ങളെ പിന്തുണയ്ക്കുന്നതിനുമായി പ്രത്യേക ഓഫറുകളും സജ്ജീകരിച്ചിട്ടുണ്ട്.
രാവിലെ 10 മുതൽ പുലർച്ചെ 2 വരെ മേള തുറന്നിരിക്കും. റമദാൻ സന്ദർഭത്തിൽ ഇഫ്താർ സൗകര്യങ്ങൾ, ഫുഡ് ട്രക്കുകൾ, വിശാലമായ പ്രാർത്ഥനാ ഇടങ്ങൾ എന്നിവയും ഒരുക്കിയിട്ടുണ്ട്.
വാരാന്ത്യങ്ങളിൽ കുട്ടികൾക്കായി പ്രത്യേക വായനാ ഇടങ്ങൾ, കഥപറയൽ, രചന വർക്ക്ഷോപ്പുകൾ, ഇന്ററാക്ടീവ് പരിപാടികൾ എന്നിവയും നടക്കും. ‘സ്റ്റേജ് റൈറ്റ് 2026’ എന്ന 48 മണിക്കൂർ നാടക രചന മത്സരം ഈ വർഷത്തെ പ്രധാന ആകർഷണങ്ങളിൽ ഒന്നാണ്. വിജയിക്കുന്ന രചനയ്ക്ക് 500 ദിർഹം കാഷ് വൗച്ചറും ദുബായിലെ ദി ജംഗ്ഷൻ നാടകവേദിയുടെ സഹകരണത്തോടെ എക്സ് ഫെസ്റ്റ് 2026ൽ ലൈവ് അവതരണത്തിനുള്ള അവസരവും ലഭിക്കും.
കുറഞ്ഞത് 200 ദിർഹം വിലയുള്ള പുസ്തകങ്ങൾ വാങ്ങുന്നവർക്ക് നറുക്കെടുപ്പിലൂടെ മാക്ബുക്ക് എയർ ഉൾപ്പെടെയുള്ള സമ്മാനങ്ങൾ നേടാം. കൂടുതൽ ചെലവഴിക്കുന്നവർക്ക് കൂടുതൽ എൻട്രികൾ ലഭിക്കും. 1,000 ദിർഹം വിലമതിക്കുന്ന വൗച്ചറുകളും ഒരുക്കിയിട്ടുണ്ട്.
മേളയുടെ വിശദാംശങ്ങൾ:
വേദി: സൗണ്ട് സ്റ്റേജ്, ദുബൈ സ്റ്റുഡിയോ സിറ്റി
തീയതി: ഫെബ്രുവരി 26 – മാർച്ച് 8, 2026
സമയം: രാവിലെ 10 മുതൽ പുലർച്ചെ 2 വരെ
പ്രവേശനം: സൗജന്യം
പുസ്തകവില: 2 ദിർഹം മുതൽ
English Summary:
Big Bad Wolf Books Dubai 2026 has officially opened at Sound Stage, Dubai Studio City, featuring over one million books with discounts up to 95% and prices starting from AED 2. The 10-day mega book sale runs from February 26 to March 8 with free entry, extended hours until 2 AM, student discounts, workshops, competitions, and exciting prize draws.
