ദുബൈ: ദുബായിലെ റോഡ്സ് ആൻഡ് ട്രാൻസ്പോർട്ട് അതോറിറ്റിയും കരീമും ചേർന്ന് ആരംഭിച്ച കരീം ബൈക്ക് സേവനം 1 കോടി (10 മില്യൺ) സൈക്ലിംഗ് യാത്രകൾ പൂർത്തിയാക്കിയതായി അധികൃതർ അറിയിച്ചു. 2020ൽ ആരംഭിച്ച ഈ സേവനം നഗരത്തിലെ സുസ്ഥിര ഗതാഗത ശ്രമങ്ങൾക്ക് ശക്തമായ പിന്തുണയായി മാറിയിരിക്കുകയാണ്.
ഒരു മില്യൺത്തിലധികം ഉപയോക്താക്കൾ ഇതിനകം സേവനം ഉപയോഗിച്ചിട്ടുണ്ടെന്നും, ഏകദേശം 6,590 ടൺ കാർബൺ ഡൈഓക്സൈഡ് പുറന്തള്ളൽ കുറയ്ക്കാൻ ഈ പദ്ധതിയിലൂടെ സാധിച്ചതായും അധികൃതർ വ്യക്തമാക്കി.
ഈ നേട്ടത്തിന്റെ ഭാഗമായി ഏറ്റവും സജീവമായ ഉപയോക്താക്കളെ സൗജന്യ സബ്സ്ക്രിപ്ഷനുകളും ഡൈനിംഗ് വൗച്ചറുകളും നൽകി ആദരിച്ചു. കൂടാതെ, ഏപ്രിൽ 11നും 12നും പുതിയ ഉപയോക്താക്കൾക്ക് പ്രത്യേക ഓഫറിന്റെ ഭാഗമായി കുറഞ്ഞ നിരക്കിൽ യാത്ര ചെയ്യാനുള്ള അവസരവും ഒരുക്കിയിട്ടുണ്ട്.
ദുബായിൽ സൈക്ലിംഗ് അടിസ്ഥാന സൗകര്യങ്ങൾ വേഗത്തിൽ വികസിച്ചതും നഗരത്തെ സൈക്കിൾ സൗഹൃദ നഗരമാക്കാനുള്ള ദീർഘകാല ലക്ഷ്യവും ഈ നേട്ടത്തിലൂടെ പ്രതിഫലിക്കുന്നുവെന്ന് അധികൃതർ കൂട്ടിച്ചേർത്തു.
