ദുബൈ: എമിറേറ്റിന്‍റെ സാംസ്കാരിക മേഖലയിൽ സന്ദർശകർക്കായി പുതിയൊരു വിസ്മയം കൂടി മിഴി തുറക്കുന്നു. ഡിജിറ്റൽ കലകളും പുത്തൻ സാങ്കേതിക വിദ്യകളും പരിചയപ്പെടുത്തുന്നതിനായി ഡി.ഐ.എഫ്.സി സഅബീൽ ഡിസ്ട്രിക്ടിൽ ഡിജിറ്റൽ ആർട്ട് മ്യൂസിയം തുറക്കുന്നു.
ദുബൈ കൾച്ചർ ആൻഡ് ആർട്സ് അതോറിറ്റി (ദുബൈ കൾച്ചർ) ചെയർപേഴ്സൺ ശൈഖ ലത്തീഫ ബിൻത് മുഹമ്മദ് ബിൻ റാശിദ് ആൽ മക്തൂം മ്യൂസിയത്തിന്റെ ലോഞ്ചിങ് നിർവഹിച്ചു. ദുബൈ ഇന്‍റർനാഷനൽ ഫിനാൻഷ്യൽ സെന്‍റർ ഗവർണർ ഇസാ കാസിമും ചടങ്ങിൽ പങ്കെടുത്തു.
ദുബൈ കൾച്ചറിനാണ് മ്യൂസിയത്തിന്റെ നിർമാണ നടത്തിപ്പ് ചുമതല. അതിവേഗം വളരുന്ന ദുബൈയുടെ പുരാവസ്തു മേഖലയേയും സാംസ്കാരിക അന്തരീക്ഷത്തേയും കൂടുതൽ ശക്തിപ്പെടുത്തുന്നതിൽ ഡിജിറ്റൽ ആർട്ട് മ്യൂസിയം നിർണായക പങ്കുവഹിക്കുമെന്ന് ശൈഖ് ലത്തീഫ പറഞ്ഞു.
മേഖലയിൽ ആദ്യമായാണ് ഇത്തരമൊരു ഡിജിറ്റൽ ആർട്ട് മ്യൂസിയം ആരംഭിക്കുന്നത്. ആർട്ട് ദുബൈയുടെ 20ാമത് എഡിഷൻ അടയാളപ്പെടുത്തുന്ന സന്ദർഭത്തിൽ തന്നെയാണ് ഡിജിറ്റൽ ആർട്ട് മ്യൂസിയം പ്രഖ്യാപനമെന്നതും യാദൃശ്ചികമായി.
സംസ്കാരത്തിന്റെയും സർഗാത്മകതയുടെയും ആഗോള കേന്ദ്രമെന്ന ദുബൈയുടെ സ്ഥാനത്തെ കൂടുതൽ ശക്തിപ്പെടുത്തുന്ന പദ്ധതിയാണിതെന്ന് അധികൃതർ വ്യക്തമാക്കി. പരമ്പരാഗത കലാ ആശയങ്ങൾക്കപ്പുറം, അറിവും നവീകരണവും സാങ്കേതികവിദ്യയും സമന്വയിപ്പിച്ച പുതിയ അനുഭവമായിരിക്കും മ്യൂസിയം സന്ദർശകർക്ക് സമ്മാനിക്കുക.
