ദുബായ്: യുഎഇയിലെ ദുബായ് എമിറേറ്റ്സ് റോഡിലുണ്ടായ കടുത്ത വാഹനാപകടത്തിൽ മരണസംഖ്യ എട്ടായി ഉയർന്നതായി പുതിയ റിപ്പോർട്ടുകൾ. മിനിബസും ട്രക്കും തമ്മിൽ കൂട്ടിയിടിച്ചുണ്ടായ ദാരുണമായ ഈ അപകടത്തിൽ മരിച്ചവരിൽ ആറ് പേർ ഇന്ത്യക്കാരാണ്. മറ്റ് രണ്ട് പേർ ശ്രീലങ്ക, നേപ്പാൾ സ്വദേശികളാണെന്നും വിവരമുണ്ട്. ‘മോട്ടീവ് ടെക്നിക്കൽ സർവീസ്’ (Motive Technical Service) കമ്പനിയിലെ ജീവനക്കാരാണ് അപകടത്തിൽപ്പെട്ടത്.
സാങ്കേതിക തകരാറിനെ തുടർന്ന് റോഡിന് നടുവിൽ പെട്ടെന്ന് നിർത്തേണ്ടി വന്ന ട്രക്കിന് പിന്നിലേക്ക് കമ്പനി ജീവനക്കാരുമായി വന്ന മിനിബസ് ഇടിച്ചുകയറുകയായിരുന്നുവെന്ന് ദുബായ് പോലീസ് നടത്തിയ പ്രാഥമിക അന്വേഷണത്തിൽ വ്യക്തമായി. ഉച്ചയ്ക്കായിരുന്നു പ്രവാസികളെയും യാത്രക്കാരെയും ഞെട്ടിച്ച ഈ ദാരുണ സംഭവം നടന്നത്.
മിനിബസ് ഡ്രൈവറുടെ ശ്രദ്ധക്കുറവും മുൻപിലുള്ള വാഹനവുമായി സുരക്ഷിതമായ അകലം പാലിക്കാതിരുന്നതുമാണ് അപകടത്തിന്റെ ആഘാതം വർദ്ധിപ്പിച്ചതെന്നാണ് പോലീസിന്റെ പ്രാഥമിക നിഗമനം. അപകടത്തിൽ ഒൻപത് പേർക്ക് പരിക്കേറ്റിട്ടുണ്ട്. ഇതിൽ അഞ്ച് പേരുടെ നില അതീവ ഗുരുതരമായി തുടരുകയാണ്. മറ്റ് നാല് പേർക്ക് ഇടത്തരം പരിക്കുകളുണ്ട്. പരിക്കേറ്റവരിൽ രണ്ട് പേർ ഇന്ത്യക്കാരാണെന്നും റിപ്പോർട്ടുകൾ സൂചിപ്പിക്കുന്നു.
അപകടത്തെക്കുറിച്ച് വിവരം ലഭിച്ചയുടൻ തന്നെ ദുബായ് പോലീസിന്റെ ട്രാഫിക് പട്രോളിംഗ് സംഘവും രക്ഷാപ്രവർത്തകരും സംഭവസ്ഥലത്തേക്ക് കുതിച്ചെത്തി. കമാൻഡ് ആൻഡ് കൺട്രോൾ സെന്ററിൽ നിന്ന് ലഭിച്ച അടിയന്തര സന്ദേശത്തിന്റെ അടിസ്ഥാനത്തിലായിരുന്നു ദ്രുതഗതിയിലുള്ള ഇടപെടൽ. പരിക്കേറ്റ എല്ലാവരെയും അടിയന്തര വൈദ്യസഹായത്തിനായി ദുബായിലെ വിവിധ ആശുപത്രികളിലേക്ക് മാറ്റിയിട്ടുണ്ടെന്ന് ദുബായ് പോലീസ് ട്രാഫിക് ജനറൽ ഡിപ്പാർട്ട്മെന്റ് ഡയറക്ടർ ബ്രിഗേഡിയർ ജുമാ സലേം ബിൻ സുവൈദാൻ അറിയിച്ചു. സംഭവത്തിൽ കൂടുതൽ വിവരങ്ങൾ ലഭ്യമായിവരുന്നതേയുള്ളൂ.
