ദുബൈ: അസാധ്യമായി തോന്നുന്ന ആശയങ്ങളെ അതിവേഗത്തിലും ഉയർന്ന നിലവാരത്തോടെയും യാഥാർഥ്യമാക്കുന്ന ദുബൈയുടെ പ്രവർത്തന ശൈലി ഭാവിതലമുറയ്ക്ക് കൈമാറുക എന്ന ലക്ഷ്യത്തോടെ ‘ദുബൈ-ഇറ്റ്’ (Dubai It) എന്ന പുതിയ പദ്ധതിക്ക് തുടക്കമിട്ട് യു.എ.ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാശിദ് ആൽ മക്തൂം.
തന്റെ ഔദ്യോഗിക സാമൂഹിക മാധ്യമ അക്കൗണ്ടുകളിലൂടെയാണ് ശൈഖ് മുഹമ്മദ് പുതിയ പദ്ധതിയുടെ പ്രഖ്യാപനവും ആശയ വിശദീകരണവും പങ്കുവെച്ചത്. ദുബൈയുടെ വിജയത്തിന് പിന്നിലെ പ്രധാന ഘടകങ്ങളിലൊന്നായ വേഗത, കാര്യക്ഷമത, ഗുണനിലവാരം എന്നിവയുടെ സമന്വയമാണ് ‘ദുബൈ-ഇറ്റ്’ പദ്ധതിയിലൂടെ ലക്ഷ്യമിടുന്നതെന്ന് അദ്ദേഹം വ്യക്തമാക്കി.
ഏതൊരു വലിയ പദ്ധതിയും മികച്ച ഗുണനിലവാരം ഉറപ്പാക്കി റെക്കോർഡ് സമയത്തിനുള്ളിൽ പൂർത്തിയാക്കുക എന്നതാണ് ‘ദുബൈ-ഇറ്റ്’ എന്ന ആശയത്തിന്റെ അടിസ്ഥാനമെന്ന് ശൈഖ് മുഹമ്മദ് പറഞ്ഞു. ഏതാനും ദശാബ്ദങ്ങൾക്കുള്ളിൽ മരുഭൂമിയിൽ നിന്ന് ലോക ശ്രദ്ധ നേടിയ ആഗോള നഗരമായി ദുബായ് മാറിയതിന് പിന്നിൽ പ്രവർത്തിച്ച അതേ മനോഭാവവും ദൃഢനിശ്ചയവുമാണ് ഈ ആശയത്തിന്റെ കേന്ദ്രബിന്ദുവെന്നും അദ്ദേഹം കൂട്ടിച്ചേർത്തു.
വലിയ സ്വപ്നങ്ങൾ കാണുന്നതിലും ലക്ഷ്യങ്ങൾ പ്രഖ്യാപിക്കുന്നതിലും മാത്രമല്ല, അവ ഫലപ്രദമായി നടപ്പാക്കുന്നതിലാണ് യഥാർഥ വിജയമെന്നും ശൈഖ് മുഹമ്മദ് അഭിപ്രായപ്പെട്ടു. നടപ്പാക്കാൻ കഴിയാത്ത ലക്ഷ്യങ്ങൾക്ക് യാതൊരു മൂല്യവുമില്ലെന്നും അദ്ദേഹം ഓർമിപ്പിച്ചു.
വേഗത എന്നത് ധൃതിപിടിച്ച് പ്രവർത്തിക്കുന്നതല്ലെന്നും ഗുണനിലവാരം ഉറപ്പാക്കുക എന്നത് കാര്യങ്ങൾ അനാവശ്യമായി വൈകിപ്പിക്കുന്നതുമല്ലെന്നും അദ്ദേഹം വ്യക്തമാക്കി. കുറഞ്ഞ സമയത്തിനുള്ളിൽ മികച്ച ഫലങ്ങൾ കൈവരിക്കുന്നതിലൂടെ ദുബൈയുടെ വികസന മാതൃക കൂടുതൽ ശക്തിപ്പെടുത്തുകയാണ് പുതിയ പദ്ധതിയുടെ ലക്ഷ്യമെന്ന് അദ്ദേഹം പറഞ്ഞു.
ദുബൈയുടെ ഭാവി വികസന പദ്ധതികൾക്കും സർക്കാർ-സ്വകാര്യ മേഖലകളിലെ പ്രവർത്തനങ്ങൾക്കും പുതിയ ദിശാബോധം നൽകുന്നതായാണ് ‘ദുബൈ-ഇറ്റ്’ പദ്ധതിയെ വിലയിരുത്തപ്പെടുന്നത്. നവീകരണം, വേഗത, മികവ് എന്നിവയെ അടിസ്ഥാനമാക്കിയുള്ള ഈ പ്രവർത്തന സംസ്കാരം ദുബൈയുടെ ആഗോള മത്സരശേഷി കൂടുതൽ ഉയർത്തുമെന്നാണ് പ്രതീക്ഷ.
