ദുബായ്: ലോകത്തിലെ ഏറ്റവും ഏകോപിതവും സുസ്ഥിരവും മാതൃകാപരവുമായ സാമൂഹിക ആവാസവ്യവസ്ഥ സൃഷ്ടിക്കുകയെന്ന ‘ദുബായ് സോഷ്യൽ അജണ്ട 33’-ന്റെ ലക്ഷ്യങ്ങൾ യാഥാർഥ്യമാക്കുന്നതിനുള്ള ദുബായുടെ തുടർച്ചയായ ശ്രമങ്ങൾക്ക് കൂടുതൽ കരുത്തേകി, കമ്മ്യൂണിറ്റി ഡെവലപ്മെന്റ് അതോറിറ്റി (CDA) 2026-ലെ മൂന്നാം ബാച്ച് സോഷ്യൽ പ്രൊഫഷണലുകളുടെ ബിരുദദാനവും പ്രൊഫഷണൽ സത്യപ്രതിജ്ഞാ ചടങ്ങും സംഘടിപ്പിച്ചു. ദുബായിലെ അൽ വാർഖ മജ്ലിസിൽ നടന്ന ചടങ്ങിൽ 38 പുതിയ സോഷ്യൽ പ്രൊഫഷണലുകൾ ഔദ്യോഗികമായി സത്യപ്രതിജ്ഞ ചെയ്ത് ലൈസൻസ് ഏറ്റുവാങ്ങി. ഇതോടെ ദുബായിൽ ലൈസൻസും അംഗീകാരവുമുള്ള സാമൂഹിക, മനഃശാസ്ത്ര, വിദ്യാഭ്യാസ മേഖലകളിലെ പ്രൊഫഷണലുകളുടെ എണ്ണം 1,144 ആയി ഉയർന്നു. പുതിയ ബാച്ചിൽ വിവിധ മേഖലകളിൽ പ്രവർത്തിക്കുന്ന നിരവധി മലയാളി പ്രൊഫഷണലുകളും ഇടംപിടിച്ചു.
യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്റെ ദീർഘവീക്ഷണത്തിനനുസരിച്ച് സാമൂഹിക സേവനമേഖലയെ നിയന്ത്രിക്കുന്നതിനും പ്രൊഫഷണൽ നിലവാരം ഉറപ്പാക്കുന്നതിനുമായി ദുബായ് നടപ്പാക്കുന്ന മാതൃകാപരമായ സംവിധാനത്തിന്റെ ഭാഗമായാണ് ഈ ലൈസൻസിംഗ് പദ്ധതി. ചടങ്ങിൽ കമ്മ്യൂണിറ്റി ഡെവലപ്മെന്റ് അതോറിറ്റി ഡയറക്ടർ ജനറൽ ഹെസ്സ ബിൻത് ഈസ ബുഹുമൈദ് സത്യപ്രതിജ്ഞ ചൊല്ലിക്കൊടുത്തു. അക്കാദമിക യോഗ്യതയും പ്രൊഫഷണൽ മാനദണ്ഡങ്ങളും ലൈസൻസിംഗ് നടപടിക്രമങ്ങളും വിജയകരമായി പൂർത്തിയാക്കിയ ശേഷമാണ് പുതിയ പ്രൊഫഷണലുകൾ സാമൂഹിക സേവനരംഗത്തേക്ക് ഔദ്യോഗികമായി പ്രവേശിച്ചത്.
2025 അവസാനത്തോടെ 991 പ്രൊഫഷണലുകൾക്ക് ലൈസൻസ് നൽകിയിരുന്നു. 2026-ലെ ആദ്യ ആറുമാസത്തിനിടെ 115 പേർക്കും, ഏറ്റവും പുതിയ ബാച്ചിലെ 38 പേർക്കും ലൈസൻസ് ലഭിച്ചതോടെയാണ് ആകെ ലൈസൻസുള്ളവരുടെ എണ്ണം 1,144 ആയി ഉയർന്നത്. സൈക്കോളജിസ്റ്റ്, അസിസ്റ്റന്റ് സൈക്കോളജിസ്റ്റ്, സോഷ്യൽ വർക്കർ, സോഷ്യൽ കൗൺസിലർ, സ്പെഷ്യൽ എജ്യുക്കേഷൻ അധ്യാപകൻ, അസിസ്റ്റന്റ് ബിഹേവിയർ അനലിസ്റ്റ്, അസിസ്റ്റന്റ് ലേണിംഗ് സപ്പോർട്ട് പ്രൊഫഷണൽ, ബിഹേവിയർ അനലിസ്റ്റ് തുടങ്ങി വിവിധ സാമൂഹിക, മനഃശാസ്ത്ര, വിദ്യാഭ്യാസ മേഖലകളിലെ വിദഗ്ധരാണ് പുതിയ ബാച്ചിൽ ഉൾപ്പെട്ടത്.
2026-ലെ കമ്മ്യൂണിറ്റി ഡെവലപ്മെന്റ് അതോറിറ്റിയെ സംബന്ധിച്ച നിയമം നമ്പർ 12 പ്രകാരമാണ് സാമൂഹിക പ്രൊഫഷണലുകളെ നിയന്ത്രിക്കാനും ലൈസൻസ് നൽകാനും മേൽനോട്ടം വഹിക്കാനുമുള്ള അധികാരം സി.ഡി.എയ്ക്ക് നൽകിയിരിക്കുന്നത്. എക്സിക്യൂട്ടീവ് കൗൺസിൽ പ്രമേയം നമ്പർ 20 (2011)-ന്റെ എക്സിക്യൂട്ടീവ് ചട്ടങ്ങളിലെ ആർട്ടിക്കിൾ 14 പ്രകാരമാണ് പ്രൊഫഷണൽ സത്യപ്രതിജ്ഞ നിർബന്ധമാക്കിയത്. ഇതിലൂടെ അക്കാദമിക യോഗ്യതയ്ക്കൊപ്പം പ്രൊഫഷണൽ ധാർമികതയും ഉറപ്പുവരുത്തുകയാണ് ലക്ഷ്യം.മനുഷ്യരിലേക്കും അവരുടെ ജീവിതനിലവാരത്തിലേക്കുമുള്ള നിക്ഷേപമാണ് സാമൂഹിക പ്രൊഫഷണലുകളുടെ യോഗ്യതാ വികസനവും ലൈസൻസിംഗുമെന്നും സി ഡി എ ഡയറക്ടർ ജനറൽ ഹെസ്സ ബിൻത് ഈസ ബുഹുമൈദ് പറഞ്ഞു. ഉയർന്ന അക്കാദമിക നിലവാരവും പ്രൊഫഷണൽ മികവും ധാർമിക മൂല്യങ്ങളും പുലർത്തുന്ന വിദഗ്ധരെ വളർത്തിയെടുക്കുന്നതിലൂടെ സമൂഹത്തിന്റെ മാറിവരുന്ന ആവശ്യങ്ങൾ നിറവേറ്റാൻ കഴിയുന്ന കൂടുതൽ കാര്യക്ഷമവും സുസ്ഥിരവുമായ സാമൂഹിക സേവന സംവിധാനമാണ് ദുബായ് കെട്ടിപ്പടുക്കുന്നതെന്നും അവർ വ്യക്തമാക്കി.
2024-ന്റെ തുടക്കത്തിൽ 450 ലൈസൻസുള്ള പ്രൊഫഷണലുകൾ മാത്രമുണ്ടായിരുന്ന ദുബായിൽ വെറും രണ്ടര വർഷത്തിനിടെ ആ എണ്ണം രണ്ടര മടങ്ങിലേറെ വർധിച്ച് 1,144 ആയി ഉയർന്നത് സാമൂഹിക സേവനരംഗത്ത് കൈവരിച്ച ശ്രദ്ധേയമായ മുന്നേറ്റത്തിന്റെ തെളിവാണെന്നും അവർ ചൂണ്ടിക്കാട്ടി.
“പ്രൊഫഷണൽ സത്യപ്രതിജ്ഞ വെറുമൊരു ഔപചാരിക ചടങ്ങല്ല. ഉത്തരവാദിത്തം, സത്യസന്ധത, സമഗ്രത, പൊതുജനവിശ്വാസം എന്നിവ ഉയർത്തിപ്പിടിക്കുന്ന ശക്തമായ ധാർമികവും പ്രൊഫഷണലുമായ പ്രതിബദ്ധതയാണത്. സാമൂഹിക സേവനരംഗത്തും ജീവിതനിലവാരത്തിലും ദുബായെ ആഗോള മാതൃകയാക്കി മാറ്റാനുള്ള ഞങ്ങളുടെ യാത്രയിൽ മനുഷ്യരും കുടുംബവും സമൂഹവും എന്നും കേന്ദ്രസ്ഥാനത്തായിരിക്കും,” എന്ന് ഹെസ്സ ബിൻത് ഈസ ബുഹുമൈദ് പറഞ്ഞു.
