ദുബായ്: ദുബായ് മറീനയിലെ നിർമാണത്തിലിരുന്ന ഉയരം കൂടിയ ടവറിൽ തീപിടിത്തമുണ്ടായതായി റിപ്പോർട്ട്. ഇന്ന് രാവിലെ ഏകദേശം 7.30ഓടെയാണ് സംഭവം നടന്നത്. ഹാബ്ടൂർ ഗ്രാൻഡ് ഹോട്ടൽ സമീപമുള്ള ‘ദ റെസിഡൻസസ്, അൽ ഹാബ്ടൂർ ഗ്രാൻഡ്’ മേഖലയിലാണ് തീപിടിത്തമുണ്ടായത്.
സംഭവത്തെ തുടർന്ന് പൊലീസ്, സിവിൽ ഡിഫൻസ് സംഘങ്ങൾ സ്ഥലത്തെത്തി രക്ഷാപ്രവർത്തനവും തീ നിയന്ത്രണ നടപടികളും ആരംഭിച്ചു. തീപിടിത്തത്തിൽ നിന്നുയർന്ന കനത്ത പുക പ്രദേശമൊട്ടാകെ ദൃശ്യമായിരുന്നു. സമീപ പ്രദേശങ്ങളിലെ താമസക്കാരും വാഹനയാത്രക്കാരും വലിയ ആശങ്കയിലാണ്.
തീപിടിത്തമുണ്ടായ ടവർ പ്രദേശത്തെ പ്രധാന അൽ മാർസ സിവിൽ ഡിഫൻസ് സ്റ്റേഷൻ നിന്ന് വെറും ഏതാനും നൂറ് മീറ്റർ മാത്രം അകലെയായതിനാൽ അതിവേഗമാണ് രക്ഷാസേന സ്ഥലത്തെത്തിയത്. ആളപായമോ പരിക്കുകളോ സംബന്ധിച്ച ഔദ്യോഗിക വിവരങ്ങൾ ഇതുവരെ പുറത്തുവന്നിട്ടില്ല.
പുതിയ ഹാർബർ മേഖലയോട് ചേർന്നുള്ള 50 നില കെട്ടിടമാണ് തീപിടിത്തമുണ്ടായ ടവർ. 2027 മാർച്ചോടെ പദ്ധതി പൂർത്തിയാക്കാനായിരുന്നു ലക്ഷ്യമിട്ടിരുന്നത്. തീപിടിത്തത്തിന്റെ കാരണം കണ്ടെത്തുന്നതിനായി ബന്ധപ്പെട്ട അധികൃതർ അന്വേഷണം ആരംഭിച്ചിട്ടുണ്ട്.
