ദുബായ്: യുഎഇയിൽ മികച്ച ജീവിത നിലവാരവും കൂടുതൽ ഐക്യബോധമുള്ള സമൂഹവും സൃഷ്ടിക്കുന്നതിനായുള്ള സാമൂഹിക വികസന പദ്ധതികൾക്ക് കൂടുതൽ ശക്തിയേകി ദുബായ് കമ്മ്യൂണിറ്റി ഡെവലപ്പ്മെന്റ് അതോറിറ്റി (CDA). ‘Year of the Family’ ആചരണത്തിന്റെ ഭാഗമായി നടപ്പിലാക്കുന്ന ‘Wesal – Positive Parenting Initiative’ കീഴിലുള്ള ‘Parental Well-Being Programme’ന്റെ രണ്ടാം ബാച്ച് ദുബൈയിൽ വിജയകരമായി പൂർത്തിയായി.
പരിപാടിയുടെ സമാപനച്ചടങ്ങിൽ സി.ഡി.എ ഡയറക്ടർ ജനറൽ ഹെസ്സ ബിന്റ് ഈസ ബുഹുമൈദ്, നോളജ് ഫണ്ട് എസ്റ്റാബ്ലിഷ്മെന്റ് സി.ഇ.ഒ അബ്ദുല്ല മുഹമ്മദ് അൽ അവർ, Taaleem ദുബൈ സ്കൂൾസ് ഡയറക്ടർ ഗ്രഹാം പാരിസ് എന്നിവർ പങ്കെടുത്തു.
കുടുംബ സ്ഥിരത ഉറപ്പാക്കുകയും മാതാപിതാക്കൾക്ക് ആധുനിക പേരന്റിംഗ് രീതികളിൽ കൂടുതൽ അറിവും പരിശീലനവും നൽകുകയുമാണ് പദ്ധതിയുടെ പ്രധാന ലക്ഷ്യമെന്ന് അധികൃതർ അറിയിച്ചു. കുട്ടികളുമായി ഫലപ്രദമായ ആശയവിനിമയം നടത്തൽ, കുടുംബത്തിനുള്ളിലെ സമ്മർദ്ദങ്ങൾ കാര്യക്ഷമമായി കൈകാര്യം ചെയ്യൽ, കുട്ടികളുടെ മാനസികാവസ്ഥയും പെരുമാറ്റവും കൂടുതൽ മനസ്സിലാക്കൽ തുടങ്ങിയ വിഷയങ്ങളിലാണ് പരിശീലനം കേന്ദ്രീകരിച്ചത്.
കുടുംബങ്ങളിൽ വിശ്വാസവും മാനസിക ബന്ധവും വർധിപ്പിക്കുന്നതിലൂടെ ആരോഗ്യകരമായ സാമൂഹിക അന്തരീക്ഷം സൃഷ്ടിക്കാൻ പദ്ധതി സഹായകരമാകുമെന്ന് സി.ഡി.എ വ്യക്തമാക്കി. മാതാപിതാക്കളുടെ മാനസികാരോഗ്യവും കുടുംബക്ഷേമവും സമൂഹത്തിന്റെ പുരോഗതിയിൽ നിർണായക പങ്കുവഹിക്കുന്നുവെന്ന തിരിച്ചറിവിലാണ് പദ്ധതി നടപ്പാക്കുന്നതെന്നും അധികൃതർ പറഞ്ഞു.
ദുബൈ സോഷ്യൽ അജണ്ട 33ന്റെ ഭാഗമായി മികച്ച ജീവിത നിലവാരവും കൂടുതൽ ഐക്യബോധമുള്ള സമൂഹവും രൂപപ്പെടുത്തുകയെന്ന ലക്ഷ്യങ്ങളോടും ഈ പദ്ധതി ചേർന്നുനിൽക്കുന്നതാണെന്ന് സി.ഡി.എ വിശദീകരിച്ചു. കുടുംബകേന്ദ്രിത സാമൂഹിക വികസനത്തിന് ദുബൈ സർക്കാർ നൽകുന്ന പ്രാധാന്യത്തിന്റെ ഉദാഹരണമായും ഈ പദ്ധതി വിലയിരുത്തപ്പെടുന്നു.
