യുഎഇയിൽ എവിടെയുള്ളവർക്കും വീണ്ടെടുത്ത സാധനങ്ങൾ കൊറിയർ വഴി ലഭിക്കും; സേവനത്തിനായി 901 എന്ന നമ്പറിൽ ബന്ധപ്പെടാം.
ദുബായ് : ദുബായ് പോലീസ് കണ്ടെത്തുന്ന നഷ്ടപ്പെട്ട വസ്തുക്കൾ ഇനി യുഎഇയിൽ എവിടെയുമുള്ള ഉടമസ്ഥരുടെ താമസസ്ഥലത്തോ ജോലിസ്ഥലത്തോ നേരിട്ടെത്തിച്ചു നൽകും. പോലീസ് സ്റ്റേഷനുകൾ സന്ദർശിക്കാതെ തന്നെ വസ്തുക്കൾ തിരികെ ലഭിക്കുന്ന പുതിയ ഹോം ഡെലിവറി സേവനത്തിന് ദുബായ് പോലീസ് തുടക്കമിട്ടു.
ദുബായ് പോലീസിന്റെ കസ്റ്റഡിയിലുള്ളതും ഉടമസ്ഥരെ കണ്ടെത്തിയതുമായ സാധനങ്ങളാണ് അംഗീകൃത കൊറിയർ ശൃംഖല വഴി വീടുകളിലെത്തിക്കുക. രാജ്യാന്തര വിനോദസഞ്ചാരികൾക്കും പ്രാദേശികവാസികൾക്കും ഒരുപോലെ ഉപയോഗപ്രദമാകുന്ന രീതിയിലാണ് ഈ സംവിധാനം രൂപകൽപ്പന ചെയ്തിരിക്കുന്നത്.
ഈ സേവനം ആവശ്യമുള്ളവർക്ക് ദുബായ് പോലീസിന്റെ നോൺ-എമർജൻസി കോൾ സെന്റർ നമ്പറായ 901-ൽ ബന്ധപ്പെടാവുന്നതാണ്. വ്യക്തിഗത വിവരങ്ങളും വസ്തുവിന്റെ വിശദാംശങ്ങളും സ്ഥിരീകരിച്ച ശേഷം, ഡെലിവറി തീയതിയും വിലാസവും കൊറിയർ ഏജൻസിയെ അറിയിക്കും.
“നിങ്ങളുടെ നഷ്ടപ്പെട്ട വസ്തുക്കൾ, നിങ്ങൾ എവിടെയായിരുന്നാലും തൊട്ടുമുന്നിലെത്തും,” എന്ന് ഔദ്യോഗിക സോഷ്യൽ മീഡിയ പ്ലാറ്റ്ഫോമുകളിലൂടെ ദുബായ് പോലീസ് അറിയിച്ചു.
പൊതുസ്ഥലങ്ങൾ, പൊതുഗതാഗത സംവിധാനങ്ങൾ, വ്യാപാരി സമുച്ചയങ്ങൾ എന്നിവിടങ്ങളിൽ നിന്ന് ലഭിക്കുന്ന ഇലക്ട്രോണിക് ഉപകരണങ്ങൾ, ഔദ്യോഗിക രേഖകൾ, മറ്റ് വ്യക്തിഗത സാധനങ്ങൾ എന്നിവയെല്ലാം ഈ സേവനത്തിന്റെ പരിധിയിൽ വരും.
പൊതുജനസേവനങ്ങൾ പൂർണ്ണമായും ഡിജിറ്റലൈസ് ചെയ്യാനും നഗരവാസികളുടെ ജീവിതസൗകര്യം വർദ്ധിപ്പിക്കാനുമുള്ള ദുബായ് പോലീസിന്റെ വിപുലമായ പദ്ധതികളുടെ ഭാഗമായാണ് പുതിയ നടപടി. സ്മാർട്ട് സാങ്കേതികവിദ്യ പ്രയോജനപ്പെടുത്തി ആളുകൾ പോലീസ് സ്റ്റേഷനുകളിൽ നേരിട്ടെത്തുന്നത് പരമാവധി കുറയ്ക്കുകയാണ് ഇതിലൂടെ ലക്ഷ്യമിടുന്നത്.
പ്രതിവർഷം ആയിരക്കണക്കിന് നഷ്ടപ്പെട്ട വസ്തുക്കളാണ് ദുബായ് പോലീസിന് ലഭിക്കുന്നത്. മറ്റ് എമിറേറ്റുകളിൽ താമസിക്കുന്നവർക്കും സമയപരിമിതിയുള്ളവർക്കും ഈ പുതിയ ഹോം ഡെലിവറി സംവിധാനം വലിയ ആശ്വാസമാകും.
